Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 32

Tuai ti Baru enggau Dua Iku Indu ti Berani

Tuai ti Baru enggau Dua Iku Indu ti Berani

Pengudah betaun-taun nguluka nembiak Jehovah, Josua mati lebuh beumur 110 taun. Seagi-agi iya idup, orang Israel nyembah Jehovah. Tang udah Josua mati, sida berengkah nyembah patung baka orang Kanaan. Ketegal bansa Israel enda agi nitihka Iya, Jehovah nejuka seiku raja Kanaan ke benama Jabin nekan sereta merinsaka sida. Sida lalu minta tulung Jehovah. Nya alai, Jehovah meri sida tuai ti baru, iya nya Barak. Iya deka nulung sida pulai baru ngagai Jehovah.

Deborah, seiku nabi, minta Barak betemu enggau iya. Iya bisi pesan ari Jehovah ke Barak: ‘Bai 10,000 iku orang, lalu betemu enggau bala soldadu Jabin ba Sungai Kison. Din nuan deka ngalahka Sisera, tuai soldadu Jabin.’ Barak madahka Deborah: ‘Aku deka mupuk enti nuan mupuk enggau aku.’ Ku Deborah nyaut: ‘Aku deka mupuk enggau nuan, tang ukai nuan ke munuh Sisera. Jehovah udah madahka Sisera deka dibunuh seiku indu.’

Deborah mupuk enggau Barak sereta bala soldadu iya ngagai Bukit Tabor, sedia deka beperang. Lebuh Sisera nemu pasal tu, iya ngumpul kerita perang enggau semua soldadu iya ba lebak. Deborah lalu bejaku enggau Barak: ‘Saritu Jehovah deka ngasuh  nuan menang.’ Barak nurun bukit mai 10,000 iku soldadu mansang betemu enggau soldadu Sisera ti kering.

Jehovah ngasuh ai Sungai Kison ampuh. Kerita perang Sisera lekat ba tanah luchak. Sisera ninggalka kerita perang lalu rari. Barak enggau bala soldadu iya ngalahka bala soldadu Sisera. Tang, Sisera ngerarika diri lalu belalai ba langkau kain seiku indu ke benama Jael. Iya meri Sisera ngirup ai tusu lalu mungkur iya enggau pua. Sisera lalu tinduk. Udah nya, Jael belubah-lubah mansang ngagai Sisera lalu mantang pala iya ngena pasak langkau. Sisera lalu mati.

Barak datai ngiga Sisera. Jael lalu pansut ari langkau kain iya ngambat Barak. Ku Jael: ‘Tama kitu! Aku deka nunjukka orang ke digiga nuan.’ Barak tama ngagai langkau kain lalu meda Sisera tegaring-garing mati. Barak enggau Deborah muji Jehovah ngena lagu laban udah nulung orang Israel menang ngalahka munsuh. Dalam 40 taun udah nya, orang Israel bisi pemaik.

“Mayuh bala indu mai berita manah tu.”—Masmur 68:11, NW