Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 PELAJAR 24

Sida Enda Ngamatka Semaya

Sida Enda Ngamatka Semaya

Jehovah madah ngagai Moses: ‘Niki ke atas ngagai Aku ba bukit tu. Aku deka nulis adat Aku ba lampang batu lalu meri nya ke nuan.’ Moses niki bukit nya lalu diau dia 40 hari enggau 40 malam. Lebuh iya dia, Jehovah nulis Sepuluh Pesan ba dua lampang batu lalu meri nya ngagai Moses.

Pengudah siti timpuh, orang Israel ngumbai Moses udah ninggalka sida. Sida madah ngagai Aron: ‘Kami deka orang nguluka kami. Gaga seiku petara ke kami!’ Ku Aaron: ‘Beri emas kita ngagai aku.’ Iya ngeluluhka emas lalu ngaga patung anak sapi. Ku orang mayuh bejaku: ‘Anak sapi tu Petara kitai ke udah ngulu kitai pansut ari menua Ejip!’ Sida berengkah nyembah patung anak sapi emas nya lalu berami. Kati tu salah? Ya, laban sida udah besemaya deka nyembah Jehovah seiku aja. Tang diatu, sida enda ngamatka semaya nya.

 Jehovah meda utai ti nyadi, lalu madah ngagai Moses: ‘Turun nuan ngagai bala nembiak nuan. Sida udah bedosa lalu nyembah petara pelesu.’ Moses nurun ke baruh bukit, mai dua iti lampang batu.

Lebuh iya datai semak ngagai kem, Moses ninga orang belagu. Iya meda sida betanda lalu meremi ngagai patung anak sapi. Iya amat pedis ati. Iya ngempaska lampang batu ti dibai iya, lalu lampang batu nya pechah. Iya lalu nganchurka patung nya. Udah nya, iya nanya Aron: ‘Nama utai ke dipadah sida nyentukka nuan ngereja dosa tu?’ Disaut Aron: ‘Anang ringat ngagai aku. Nuan nemu gaya orang tu. Sida deka ke seiku petara, nya alai aku ngeluluhka emas sida lalu anak sapi emas tu nyadi!’ Aron enda patut ngereja nya. Moses niki baru ngagai bukit lalu minta Jehovah ngampunka sida.

Jehovah ngampun orang ke sanggup nangika Iya. Kati nuan ulih meda kebuah orang Israel patut nitihka iring Moses?

‘Lebuh nuan ngaga semaya enggau Petara, nuan enda tau enda enggau naka pengelengkas ngamatka semaya nya. Petara enda begunaka orang ke beli. Kereja aja utai ti disemaya nuan.’—Pengajar 5:4