Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 26

Dua Belas Iku Pematau

Dua Belas Iku Pematau

Orang Israel ninggalka Bukit Sinai lalu bejalai nengah menua puang Paran ngagai endur ti dikumbai Kades. Dia, Jehovah madahka Moses: ‘Anjung 12 iku lelaki, seiku ari tiap raban bansa orang Israel, kena matau menua Kanaan, ti deka diberi Aku ngagai orang Israel.’ Moses lalu milih 12 iku lelaki, ku iya madahka sida: ‘Mupuk kita ngagai menua Kanaan, lalu peratika enti tanah dia ulih kena betanam. Peda enti orang dia lemi tauka kering, enti sida diau ba langkau kain tauka ba kuta.’ 12 iku pematau nya, nyengkaum Josua enggau Kalep mupuk ngagai menua Kanaan.

Pengudah 40 hari, bala pematau pulai mai buah ara, delima enggau anggur. Ku sida: ‘Menua nya menua ti manah, tang orang ke nguan menua nya kering sereta kuta nya bisi dinding ti tinggi.’ Kalep lalu bejaku: ‘Kitai ulih ngalahka sida. Aram mupuk diatu!’ Nemu nuan kebuah Kalep madah munyi nya? Laban iya enggau Josua amat arapka Jehovah. Tang sepuluh iku pematau ke bukai madah: ‘Anang! Orang din amat besai gamal, baka gerasi! Kitai tu baka buntak enti banding enggau sida.’

Orang Israel lemi semengat. Sida berengkah mutap lalu bejaku enggau pangan diri: ‘Aram kitai milih seiku tuai ke bukai, lalu pulai baru ngagai menua Ejip. Nama kebuah kitai patut ngagai menua nya  lalu dibunuh?’ Josua enggau Kalep madah: ‘Kitai patut nangika Jehovah. Anang takut. Jehovah deka nulung kitai.’ Tang, orang Israel enda ninga. Sida indah berunding deka munuh Josua enggau Kalep!

Nama digaga Jehovah? Iya madah ngagai Moses: ‘Mayuh amat utai ke udah dikereja Aku ke orang Israel, tang sida agi enda ngasika Aku. Nya alai, sida deka diau ba menua puang tu pengelama 40 taun, lalu ditu sida deka mati. Semina anak sida, Josua enggau Kalep deka diau ba menua ke udah disemayaka Aku.’

“Nama kebuah kita takut? Mit amat meh pengarap kita.”—Matthew 8:26