Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 18

Babas ti Beapi

Babas ti Beapi

Moses diau ba menua Midian pengelama 40 taun. Iya bebini lalu bisi anak. Bisi sekali, lebuh iya benung ngibun raban bedus semak Bukit Sinai, iya tepedaka utai ti nyelai. Siti babas mau laban api, tang babas nya enda angus! Lebuh Moses mansang semak deka meresa babas nya, iya ninga siti nyawa ari babas nya madah: ‘Moses! Anang datai semak. Buka selipar nuan laban nuan bediri ba tanah ti kudus.’ Nya nyawa Jehovah ke bejaku ngena seiku melikat.

Moses nyadi takut lalu nutup mua iya. Ku nyawa nya: ‘Aku udah meda pemedis bala nembiak Aku. Aku deka ngelepaska sida ari jari orang Ejip, lalu mai sida ngagai menua ti manah. Aku udah milih nuan ngiring bala nembiak Aku pansut ari Ejip.’ Kati asai ati Moses lebuh ninga pasal tu?

Moses nanya: ‘Nama patut dipadah aku enti sida nanya sapa nganjung aku?’ Saut Petara: ‘Padahka ngagai sida, Jehovah, Petara ke disembah Abraham, Isak enggau Jakop, udah nganjung nuan ngagai sida.’ Moses nanya baru: ‘Kati enti sida enggai ningaka aku?’ Jehovah meri Moses tanda ti nunjukka Iya deka nulung Moses. Iya ngasuh Moses nikauka tungkat iya ke tanah. Tungkat nya lalu bebali nyadi ular! Lebuh Moses megai iku ular nya, ular nya bebali nyadi tungkat baru. Jehovah lalu madah: ‘Enti nuan ngereja kereja ajih tu, tu deka nunjukka Aku udah nganjung nuan.’

Ku Moses: ‘Aku enda lanchar bejaku.’ Jehovah besemaya enggau iya: ‘Aku deka madahka utai ti patut disebut nuan lalu aku deka nganjung menyadi nuan Aron kena nulung nuan.’ Ketegal Moses nemu Jehovah deka nulung iya, iya lalu mai bini enggau bala anak iya mupuk pulai ke menua Ejip.

“Anang irauka jalai kita deka bejaku tauka utai ti deka disebut kita, laban kita deka diberi utai ti deka disebut kita lebuh maya nya.”—Matthew 10:19