Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 14

Seiku Ulun ti Ngasika Petara

Seiku Ulun ti Ngasika Petara

Josep seiku ari anak Jakop ke biak. Bala menyadi iya ke tuai meda apai sida rindu agi ke Josep. Ba runding nuan, baka ni asai ati sida? Sida chemburu ngagai Josep sereta begedika iya. Lebuh Josep bisi mimpi ti nyelai, iya madahka nya ngagai bala menyadi iya. Reti mimpi nya, dudi hari ila bala menyadi iya deka meremi ngagai iya. Tu ngasuh sida balat agi begedika iya!

Bisi sekali, bala menyadi Josep benung ngibun bedus semak nengeri Sekem. Jakop nganjung Josep ngagai bala menyadi iya. Ari jauh sida tepedaka Josep lalu ku sida: ‘Nyin bujang ke bemimpi datai. Aram kitai munuh iya!’ Sida narit lalu muai iya ke dalam telaga ti rangkai. Tang Judah, seiku ari bala menyadi iya, madah: ‘Anang munuh iya! Aram kitai nyual iya nyadi ulun.’ Nya alai, sida nyual Josep enggau rega 20 singkap pirak ngagai bala orang dagang ari Midian ke deka ngagai Ejip.

Udah nya, bala menyadi Josep nyepuhka baju panjai iya ke dalam darah kambin lalu mai baju panjai nya ngagai apai sida, ku sida: ‘Kati tu gari anak nuan?’ Jakop ngumbai Josep dibunuh jelu. Ati iya balat merinsa. Nadai orang ulih merindang ati iya.

Ba Ejip, Josep dijual ngagai seiku pemesai raja ke benama Potipar. Tang, Jehovah bisi enggau Josep. Potipar meda Josep ngereja pengawa enggau manah lalu ulih dikearapka. Enda lama udah nya, Potipar ngasuh Josep ngemataka rumah iya enggau semua reta tengkira iya.

 Bini Potipar meda Josep nya orang ti tegap sereta sigat gamal. Ninting hari, iya mai Josep beleman enggau iya. Nama patut digaga Josep? Iya nulak lalu madah: ‘Enggai! Tu salah. Tuan arapka aku, lalu nuan bini iya. Enti aku beleman enggau nuan, aku bedosa ngelaban Petara!’

Bisi sekali, bini Potipar ngansak Josep beleman enggau iya. Iya narit Josep ba gari iya, tang Josep ngerarika diri. Lebuh Potipar pulai ke rumah, bini iya madahka Josep deka masung iya. Iya bula. Potipar amat pedis ati, lalu ngasuh Josep dijil. Taja pia, Jehovah seruran ingatka Josep.

‘Diau enggau ati ti baruh, di baruh jari Petara ti bekuasa, ngambika Iya ngangkatka kita tinggi ba maya ti patut.’—1 Peter 5:6