Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 11

Pengarap Iya Diuji

Pengarap Iya Diuji

Abraham ngajar anak iya Isak rinduka Jehovah lalu arapka semua semaya Jehovah. Tang, lebuh Isak beumur kira-kira 25 taun, Jehovah ngasuh Abraham ngereja siti pengawa ke amat tusah digaga. Nama pengawa nya?

Petara madah ngagai Abraham: ‘Bai anak tunggal nuan mansang ngagai menua Moriah, lalu serahka iya dia nyadika pemeri.’ Abraham enda nemu kebuah Jehovah ngasuh iya ngereja nya. Taja pia, iya tetap ngasika Jehovah.

Tumu pagi hari siti, Abraham mai Isak enggau dua iku orang gaji iya ngagai bukit Moriah. Pengudah tiga hari, sida ulih meda bukit nya ari jauh. Abraham ngasuh orang gaji iya nganti seraya iya enggau Isak mupuk meri pemeri. Abraham ngasuh Isak ngesan kayu, lalu Abraham mai sebilah duku. Isak nanya apai iya: ‘Dini bedus ke nyadi pemeri tunu?’ Ku Abraham nyaut: ‘Anak, Jehovah deka meri nya.’

Lebuh datai ba bukit, seduai iya ngaga siti alta. Udah nya, Abraham nanchang kaki enggau jari Isak lalu ngengkahka iya ba atas alta nya.

Abraham megai duku. Tekala nya, melikat Jehovah ngangauka Abraham ari serega: ‘Abraham! Anang ngemediska nembiak nya! Diatu aku nemu nuan arapka Petara, laban nuan  sanggup nyerahka anak nuan.’ Udah nya, Abraham tepedaka seiku bedus tekait tanduk ba babas. Iya enggau jampat muka tanchang Isak lalu meri bedus nya nyadika pemeri.

Berengkah ari nya, Jehovah ngangau Abraham pangan Iya. Nemu nuan nama kebuah? Laban Abraham udah ngereja utai ke diasuh Jehovah, taja pan iya enda nemu kebuah Jehovah ngasuh iya ngereja nya.

Jehovah ngulang semaya Iya ngagai Abraham: ‘Aku deka merekatka nuan, lalu deka meri nuan mayuh peturun.’ Reti nya, Jehovah deka meri berekat ngagai semua mensia ti manah nengah ruang bilik Abraham.

‘Petara balat rinduka dunya, nya alai Iya meri Anak Tunggal Iya, ngambika genap iku orang ke arapka Iya enda mati tang bulih pengidup ti meruan belama iya.’—John 3:16

Belajar Lebih Agi

CHERITA BA BUP KUDUS

Abraham Nyadi Pangan Petara

Petara nganggauka Abraham pangan Iya. Baka ni kitai nyadi pangan Petara?