Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 3

Adam enggau Hawa Enda Ngasika Petara

Adam enggau Hawa Enda Ngasika Petara

Bisi sekali lebuh Hawa kediri, seiku ular bejaku enggau iya. Ku ular nya: ‘Kati amat Petara enda ngasuh seduai makai buah ari semua pun kayu tu?’ Saut Hawa: ‘Kami duai tau makai buah ari sebarang kayu dalam kebun tu kelimpah ari siti pun kayu. Enti kami makai buah ari kayu nya, kami deka mati.’ Ular nya nyaut: ‘Enda seduai mati. Tang seduai deka nyadi sebaka enggau Petara.’ Kati tu amat? Enda, ular nya bula. Tang, Hawa pechayaka iya. Majak Hawa meda buah nya, balat agi pengingin iya ke buah nya. Iya makai buah nya lalu meri sekeda ngagai Adam. Adam nemu seduai iya deka mati enti enda ngasika Petara. Tang, Adam enda peduli lalu terus makai buah nya.

Udah nya, Jehovah bejaku enggau Adam seduai Hawa. Iya nanya kebuah seduai iya enda ngasika Iya. Hawa nyalahka ular, lalu Adam nyalahka Hawa. Ketegal Adam enggau Hawa enda ngasika Iya, Jehovah muru seduai iya ari kebun nya. Kena nentuka seduai iya enda tama baru ngagai kebun nya, Iya ngengkahka melikat enggau pedang ti beapi-api kena nyaga jalai tama ngagai kebun nya.

Jehovah madah ular ti bula ngagai Hawa pan deka diukum. Ke bendar iya, ukai ular ke bejaku enggau Hawa. Jehovah enda ngaga ular nemu bejaku. Tang bisi seiku melikat ti jai ke ngasuh ular nemu bejaku. Iya ngereja tu kena nipu Hawa. Melikat nya dikumbai Antu Sitan. Jemah ila, Jehovah deka ngemunaska Sitan ngambika enda terus nipu orang ngereja pengawa ti jai.

“Sitan . . . endang pemunuh kenyau ari pun, lalu iya enda bepegai teguh ba pemendar, laban iya nadai pemendar dalam iya.” —John 8:44, NW

Belajar Lebih Agi

CHERITA BA BUP KUDUS

Adam Enggau Hawa Berengkah Berundingka Diri Empu

Nama penyadi ketegal pemutus sida ke enda manah?