Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 101

Paul Dianjung ngagai Rome

Paul Dianjung ngagai Rome

Pejalai Paul meritaka injil kali ketiga tembu ba Jerusalem. Dia iya ditangkap lalu dikurung ba rumah jil. Ba siti malam, Jesus bejaku enggau iya ngena genera: ‘Nuan deka mansang ngagai Rome lalu nginjil dia.’ Paul dibai ngagai Siseria ari Jerusalem, endur iya dijil pengelama dua taun. Lebuh iya diakim ba mua Gabenor Pestus, Paul madah: ‘Tejuka aku diakim Raja Besai ba Rome.’ Pestus nyaut: ‘Nuan minta diakim Raja Besai. Ngagai Raja Besai meh nuan deka mupuk.’ Paul dibai ngagai Rome ngena kapal, lalu dua iku menyadi Kristian, iya nya Luke enggau Aristarkus mupuk enggau iya.

Lebuh ba tasik, kabut ti balat nyadi beberapa hari. Semua orang ke ba kapal ngumbai diri deka mati. Tang Paul madah: ‘Seiku melikat bejaku enggau aku dalam mimpi: “Anang takut, Paul. Nuan deka datai ba Rome, lalu semua orang ba kapal enggau nuan deka selamat.” Anang takut! Kitai deka selamat.’

Kabut nyadi pengelama 14 hari. Nyau kelama, baru sida ulih tepedaka tebing. Tebing pulau Malta. Kapal nya ngelanggar tebing lalu pechah magang, tang 276 iku orang ba kapal nya selamat datai ke tebing. Sekeda nyemerai lalu ke bukai bepaut ba papan kapal ti pechah. Orang ba pulau Malta nyaga sida lalu nungkun api kena ngangatka tubuh sida.

Tiga bulan pengudah nya, bala soldadu mai Paul ngagai Rome ngena kapal ke bukai. Lebuh iya datai, bala menyadi Kristian betemu enggau iya. Lebuh iya meda sida, Paul meri terima kasih ngagai Jehovah lalu berasai diperansang. Taja pan Paul nyadi orang jil, iya dikemendarka diau ba rumah sua ti dijaga seiku soldadu. Iya diau dia pengelama dua taun. Mayuh orang datai meda iya, lalu iya nginjil ngagai sida pasal Perintah Petara sereta ngajar sida pasal Jesus. Paul mega nulis surat ngagai eklisia ba Asia Minor sereta Judea. Jehovah ngena Paul enggau naka ulih kena ngerembaika berita manah ngagai semua bansa.

‘Dalam semua utai enggau ngena semua macham chara kami udah ngayanka diri amat ulun Petara. Kami udah tan natka penusah, pemerinsa enggau penyuntuk.’—2 Korint 6:4