Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 98

Pengarap Kristian Ngerembai Ngagai Mayuh Menua

Pengarap Kristian Ngerembai Ngagai Mayuh Menua

Bala rasul ngasika pesan Jesus enggau ngerembaika berita manah ngagai serata dunya. Ba 47 M., bala menyadi Kristian ke lelaki ba Antiok nganjung Paul enggau Barnabas bejalai meritaka injil. Dua iku penginjil ti ransing tu bejalai ngagai serata Asia Minor (diatu dikumbai menua Turki) baka Derbe, Listra enggau Ikonium.

Paul enggau Barnabas nginjil ngagai semua orang, enda ngira seranta tauka kaya, biak tauka tuai. Mayuh orang nerima pemendar pasal Kristus. Lebuh Paul enggau Barnabas nginjil ngagai gabenor menua Saiprus iya nya Sergius Paulus, seiku manang nguji nagang sida. Paul madah ngagai manang nya: ‘Jehovah deka ngukum nuan.’ Tekala nya, manang nya nyadi buta. Lebuh Gabenor Paulus meda utai nya nyadi, iya lalu nyadi murid Jesus.

Paul enggau Barnabas nginjil ba sebarang endur, ari rumah ke rumah, ba pasar, rantau jalai sereta rumah sembiang. Lebuh seduai iya ngeraika seiku lelaki ke enda ulih bejalai ba Listra, orang ke meda kereja ajih nya ngumbai seduai iya petara lalu nguji deka nyembah seduai. Tang Paul enggau Barnabas nagang sida, ku seduai: ‘Sembah Petara seiku aja! Kami semina mensia.’ Udah nya sekeda orang Judah datai lalu nguingka ati orang mayuh ngelaban Paul. Orang mayuh nuku Paul ngena batu, ngirit iya pansut ari kuta nya, lalu ngelakka iya mati dia. Taja pia, Paul agi idup! Tekala nya, sekeda menyadi Kristian datai nyelamatka iya lalu mai iya pulai baru ngagai kuta nya. Udah nya, Paul pulai baru ngagai Antiok.

Ba 49 M., Paul mupuk baru bejalai meritaka injil. Pengudah iya betemu enggau bala menyadi Kristian ba Asia Minor, iya ngerembaika  berita manah ngagai endur ke jauh agi, ngagai menua Eropah. Iya ngagai Atens, Epesus, Pilipi, Tesalonika sereta endur bukai. Silas, Luke enggau seiku nembiak lelaki ke benama Timoti begulai enggau Paul ba pejalai nya. Sida sama gawa ngepunka eklisia sereta nulung eklisia nyadi kering. Paul diau ba Korint pengelama setaun setengah, ngeringka bala menyadi Kristian dia. Iya nginjil, ngajar sereta nulis surat ngagai eklisia. Iya mega gawa begagaka langkau kain. Nyau kelama, Paul pulai baru ngagai Antiok.

Udah nya, ba 52 M., Paul mupuk bejalai meritaka injil ketiga kali, berengkah ari Asia Minor. Iya bejalai jauh ke utara nyentukka Pilipi lalu nurun ngagai Korint. Paul ngabiska beberapa taun ba Epesus, ngajar, ngeraika sereta nulung eklisia. Iya mega meri cheramah ninting hari ba balai sekula. Mayuh orang ninga lalu ngubah chara pengidup sida. Penudi sekali, pengudah iya nginjilka berita manah ba mayuh menua, Paul mansang ngagai Jerusalem.

‘Nya alai, bejalai kita ngagai semua bansa lalu gaga sida nyadi murid aku.’—Matthew 28:19