Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 100

Paul enggau Timoti

Paul enggau Timoti

Timoti menyadi Kristian lelaki ke biak ba eklisia Listra. Apai iya orang bansa Gerika lalu indai iya orang Judah. Indai iya, Eunis enggau ini iya, Lois ngajar Timoti pasal Jehovah kenyau ari iya agi mit.

Lebuh Paul nemuai ngagai Listra maya meritaka injil kali kedua, iya meda Timoti amat rinduka bala menyadi Kristian sereta keran deka nulung sida. Paul mai Timoti enggau iya ba pejalai nya. Nyau kelama, Paul ngelatih Timoti nyadi penginjil ti landik sereta pengajar berita manah.

Roh kudus ngiring Paul enggau Timoti enda ngira dini pejalai seduai iya. Ba siti malam, Paul bisi genera pasal seiku lelaki ke minta iya datai ngagai menua Masedonia lalu nulung sida. Nya alai Paul, Timoti, Silas enggau Luke mansang kin ngambika ulih nginjil lalu ngepunka eklisia.

Ba nengeri Masedonia ke dikumbai Tesalonika, mayuh lelaki enggau indu nyadi orang Kristian. Tang sekeda orang Judah chemburu enggau Paul sereta bala kaling iya. Sida ngempuruka orang mayuh lalu ngirit Paul sereta bala kaling iya ngagai bala pemesai, lalu manjung: ‘Tu munsuh perintah Rome!’ Tu ulih ngasuh Paul enggau Timoti kena bunuh. Nya alai sida ngerarika diri ngagai Beria malam nya.

Orang ba Beria keran deka belajar pasal berita manah, lalu orang Gerika enggau orang Judah dia nyadi orang Kristian. Tang lebuh sekeda orang Judah ke datai ari Tesalonika ngaga pengachau dia, Paul mupuk ngagai Atens. Timoti enggau Silas tinggal ba Beria ngambika ulih negapka pengarap bala menyadi dia. Nyau kelama, Paul nganjung Timoti pulai ngagai Tesalonika kena nulung bala menyadi Kristian dia napi pemerinsa ti balat. Udah nya, Paul nganjung Timoti nemuai mayuh eklisia ke bukai lalu meransang sida.

 Paul madahka Timoti: ‘Sida ke deka nyembah Jehovah deka diperinsa.’ Timoti kala diperinsa sereta dijil ketegal pengarap iya. Iya gaga ati laban bisi peluang nunjukka penetap ati iya ngagai Jehovah.

Paul madahka orang Kristian ba Pilipi: ‘Aku deka nganjung Timoti nemuai ngagai kita. Iya deka ngajar kita reti idup nyadi nembiak Jehovah, lalu iya deka ngelatih kita ba pengawa nginjil.’ Paul nemu iya ulih bepanggai ba Timoti. Seduai iya betaun-taun nyadi kaling sereta sama bekereja enggau pangan diri.

“Aku nadai orang bukai ke baka iya, ke deka balat ibuhka pengelantang kita. Semua orang bukai semina berundingka pekara diri empu aja, ukai berundingka pekara Jesus Kristus.”—Pilipi 2:20, 21