Ninting hari, seiku lelaki ke enda ulih bejalai duduk minta sedekah ba mua pintu rumah sembiang. Bisi sekali, iya tepedaka Peter enggau John tama ngagai rumah sembiang. Iya madah ngagai seduai iya: ‘Tulung meri aku duit.’ Ku Peter: ‘Aku bisi utai ti manah agi ari duit ke ulih diberi ngagai nuan. Dalam nama Jesus, bediri nuan lalu bejalai!’ Peter nulung iya bediri lalu lelaki nya berengkah bejalai! Orang mayuh amat gaga ati enggau kereja ajih nya nyentukka mayuh agi orang nyadi murid.

Tang bala imam enggau orang Saduki pedis ati. Sida nangkap bala rasul, mai sida ngagai Kunsil lalu nanya: ‘Sapa meri kita kuasa ngeraika orang tu?’ Ku Peter: ‘Kami nerima kuasa ari Jesus Kristus, ke udah dibunuh kita.’ Bala tuai pengarap merak sida: ‘Badu agi bejaku pasal Jesus!’ Tang bala rasul nyaut: ‘Kami patut bejaku pasal iya. Kami enggai badu.’

Pengudah Peter enggau John dilepaska, seduai mansang ngagai bala murid ke bukai lalu madah utai ti nyadi. Sida sama besampi minta Jehovah: ‘Tulung kami nyadi berani ngambika ulih terus ngereja pengawa Nuan.’ Jehovah meri sida roh kudus, lalu sida neruska pengawa nginjil sereta ngeraika orang. Majak mayuh orang nyadi murid. Orang Saduki amat chemburu nyentukka sida nangkap bala rasul lalu ngurung sida ba rumah jil. Tang malam nya, Jehovah nganjung seiku melikat muka pintu rumah jil lalu ngasuh bala rasul: ‘Mupuk kita ngagai rumah sembiang baru lalu ngajar dia.’

Pagi hari siti, Kunsil enggau bala tuai pengarap nerima berita: ‘Pintu rumah jil agi dikunchi, tang orang ke ditangkap kita nadai agi dia! Sida bisi ba rumah sembiang, benung ngajar orang!’ Sekali agi, bala rasul ditangkap lalu dibai ngagai Kunsil. Ku imam besai: ‘Kami udah ngerara kita  anang bejaku pasal Jesus!’ Tang Peter nyaut: ‘Kami enda tau enda ngasika Petara, ukai ngasika mensia.’

Bala tuai pengarap amat ringat nyentukka sida deka munuh bala rasul. Tang seiku orang Parisi ke benama Gamaliel bediri lalu bejaku: ‘Berunding enggau manah utai ke deka dikereja kita ngagai orang tu. Kati kita amat deka ngelaban Petara?’ Sida mendingka iya. Udah bala rasul disipat, bala tuai pengarap sekali agi ngasuh sida badu nginjil lalu ngelepaska sida udah nya. Tang tu enda nagang bala rasul. Sida terus nginjil pasal berita manah enggau berani ba rumah sembiang sereta ari rumah ke rumah.

‘Kami enda tau enda ngasika Petara, ukai ngasika mensia.’—Kereja Rasul 5:29