Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 89

Peter Nyangkal Jesus

Peter Nyangkal Jesus

Lebuh Jesus enggau bala rasul iya ba sadau rumah, iya madah ngagai sida: ‘Malam tu semua kita deka rari ninggalka aku.’ Ku Peter: ‘Ukai aku! Enti sema sida ninggalka nuan, aku endang enda.’ Tang Jesus madah ngagai Peter: ‘Sebedau manuk mengkukuk, nuan deka madahka diri enda ngelala aku tiga kali.’

Lebuh bala soldadu mai Jesus ngagai rumah Kaiapas, mayuh ari rasul ngerarika diri. Tang dua iku ari sida nitih orang mayuh. Seiku nya Peter. Iya tama ngagai tengah laman rumah Kaiapas lalu bekindu semak api. Ba penampak api nya, seiku indu ulun meda mua Peter lalu madah: ‘Aku ngelala nuan! Nuan bisi enggau Jesus!’

Ku Peter: ‘Nadai aku enggau iya! Enda aku nemu utai ku nuan!’ Iya lalu mansang ngagai pintu penama. Tang enda lama udah nya, seiku da agi indu ulun meda iya lalu madahka orang mayuh: ‘Orang tu bisi enggau Jesus!’ Peter madah: ‘Aku enda ngelala Jesus!’ Seiku lelaki madah: ‘Nuan seiku ari sida! Aku nemu ari chara nuan bejaku, nuan ari Galili baka Jesus.’ Tang, Peter besumpah: ‘Aku enda ngelala iya!’

Tekala nya, manuk mengkukuk. Peter meda Jesus nguing lalu meda iya. Nya baru Peter ingat utai ti udah disebut Jesus ngagai iya. Peter pansut lalu duie-duie nyabak.

Ba maya nya, Kunsil begempuru ngambika Jesus dipechara ba rumah Kaiapas. Sida udah mutuska deka munuh Jesus, lalu diatu sida ngiga kebuah ngereja nya. Tang sida nadai tetemuka kebuah deka munuh Jesus. Pengujung iya, Kaiapas nanya Jesus enggau terang: ‘Kati nuan Anak Petara?’ Saut Jesus: ‘Au.’ Kaiapas madah: ‘Kitai enda begunaka bukti bukai. Tu jaku busung!’ Raban Kunsil setuju: ‘Iya patut dibunuh.’ Sida nampar Jesus, ngeludah sereta mampul mata iya, malu iya lalu madah: ‘Enti nuan endang nabi, padahka sapa malu nuan!’

 Ba hari siti, sida mai Jesus ngagai Kunsil lalu nanya iya sekali agi: ‘Kati nuan Anak Petara?’ Saut Jesus: ‘Kita ngumbai aku Anak Petara.’ Udah nya sida ngumbai iya salah laban bejaku busung lalu mai iya ngagai istana Pontius Pilate, gabenor Rome. Nama nyadi udah nya? Aram kitai meda.

‘Maya . . . udah datai diatu, alai semua kita deka pambar, lalu genap iku kita deka pulai ngagai rumah diri empu, lalu ninggalka aku kediri. Tang aku ukai kediri, laban Apai bisi enggau aku.’—John 16:32