Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 PELAJAR 90

Jesus Mati ba Golgota

Jesus Mati ba Golgota

Bala tuai imam mai Jesus ngagai istana gabenor. Pilate nanya sida: ‘Nama dawa kena kita ngelaban orang tu?’ Ku sida: ‘Iya ngumbai diri raja!’ Pilate nanya Jesus: ‘Kati nuan Raja orang Judah?’ Disaut Jesus: ‘Perintah aku ukai enggi dunya tu.’

Udah nya, Pilate nganjung Jesus ngagai Herod, pemerintah menua Galili, kena ngiga penyalah Jesus. Tang, Herod nadai tetemuka penyalah Jesus lalu nganjung iya pulai baru ngagai Pilate. Pilate lalu madah ngagai orang mayuh: ‘Indah Herod tauka aku nadai tetemuka penyalah ke dikereja orang tu. Aku deka ngelepaska iya.’ Orang mayuh manjung: ‘Bunuh iya! Bunuh iya!’ Soldadu nyipat Jesus, ngeludah sereta malu iya. Sida ngengkah makota duri ba pala iya sereta ngelese iya ngena jaku: ‘Tabi ke nuan Raja orang Judah.’ Sekali agi, Pilate madah ngagai orang mayuh: ‘Aku nadai tetemuka penyalah orang tu.’ Tang sida manjung: ‘Bunuh iya ba tiang!’ Nya alai, Pilate nyerahka iya ngambika diukum bunuh.

Bala soldadu mai Jesus ngagai siti endur ke dikumbai Golgota. Sida mantang iya ba tiang lalu ngangkatka tiang nya. Jesus besampi: ‘Apai, ampun sida, laban sida enda nemu utai ti dikereja diri.’ Ku orang mayuh ngeleseka Jesus: ‘Enti nuan Anak Petara, nurun nuan ari tiang nya! Selamatka diri empu.’

Seiku ari perumpak ke dipantang ba sepiak Jesus madah: ‘Kingatka aku lebuh nuan datai ngagai Perintah nuan.’ Jesus besemaya enggau iya: ‘Nuan deka sama enggau aku ba Paradais.’ Ba urung tengah hari, pemetang nyadi ba menua nya pengelama tiga jam. Sekeda ari bala murid iya bediri semak tiang, nyengkaum Maria, indai Jesus. Jesus ngasuh John nyaga Maria baka ke Maria nya indai iya empu.

Pengujung iya, ku Jesus: “Udah tembu!” Iya ngendukka pala lalu ngapuska seput. Tekala nya, tanah berenyang ti balat nyadi. Ba rumah sembiang, kain tirai entara Endur ti Kudus enggau Endur  ti Pemadu Kudus charik belah dua. Ku seiku kepala soldadu: ‘Tu amat Anak Petara!’

‘Dalam iya semua semaya Petara endang “Au” magang.’—2 Korint 1:20