Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 91

Jesus Diangkat Idup Baru

Jesus Diangkat Idup Baru

Pengudah Jesus mati, seiku lelaki kaya ke benama Josep minta pemendar Pilate nurunka tubuh Jesus ari tiang. Josep malut tubuh nya enggau rempah sereta kain linin ti manah lalu ngengkahka tubuh Jesus ba kubur ti baru. Iya ngasuh batu ti berat diengkah ba penama kubur nya. Bala imam besai madahka Pilate: ‘Kami takut sekeda ari murid Jesus deka ngambi tubuh iya lalu madahka iya udah idup baru.’ Pilate lalu madahka sida: ‘Empang ngena batu penama ba kubur lalu jaga kubur nya.’

Tiga hari udah nya, ba tumu pagi, sekeda indu mansang ngagai kubur lalu meda batu penama nya udah dibaringka. Ari dalam kubur, seiku melikat bejaku ngagai bala indu nya: ‘Anang takut. Jesus udah diangkat idup baru. Mupuk lalu asuh bala murid iya betemu enggau iya ba Galili.’

Maria Magdalin beguai ngiga Peter enggau John. Iya madahka seduai: ‘Bisi orang udah ngambi tubuh Jesus!’ Peter enggau John belanda ngagai kubur. Lebuh seduai iya meda kubur nya kusung, seduai pulai baru ngagai rumah.

Lebuh Maria pulai baru ngagai kubur, iya tepedaka dua iku melikat ba dalam lalu ku iya: ‘Aku enda nemu kini sida udah mai Tuan aku.’ Udah nya, iya tepeda seiku lelaki ke dikumbai iya tukang kebun lalu ku Maria: ‘Tuan, padah ngagai aku endur nuan udah ngengkahka iya.’ Tang lebuh lelaki nya madah, ‘Maria!’ iya nemu nya Jesus. Maria ngangau enggau nyawa ti inggar: ‘Pengajar!’ lalu merap iya. Jesus madahka iya: ‘Mupuk meh nuan lalu padah ngagai bala menyadi aku nuan udah meda aku.’ Tekala nya, Maria belanda ngagai bala murid Jesus lalu madah ngagai sida, iya udah meda Jesus.

Ba hari nya mega, dua iku murid benung bejalai ari Jerusalem ngagai Emaus. Seiku lelaki bejalai enggau seduai ba rantau jalai lalu nanya utai ti dikerandauka seduai. Ku seduai iya: ‘Kati nuan bedau ninga? Tiga hari sebedau tu, bala tuai imam munuh Jesus. Diatu sekeda indu madahka iya idup baru!’ Lelaki nya nanya: ‘Kati seduai enda arapka bala nabi? Sida madah Kristus deka mati lalu angkat  idup baru.’ Iya terus nerangka Jaku Petara ngagai sida. Lebuh sida datai ba Emaus, dua iku murid nya mai lelaki nya enggau seduai iya. Pengudah iya besampi ke ruti, nya baru seduai iya nemu nya Jesus. Udah nya, Jesus lalu lesap.

Dua iku murid nya beguai pulai ngagai rumah endur bala rasul begempuru ba Jerusalem lalu madahka sida utai ti udah nyadi. Lebuh sida ba rumah nya, Jesus ngayanka diri ngagai sida. Keterubah iya, bala rasul enda pechaya nya Jesus. Udah nya Jesus madah: ‘Peda jari aku; tegu meh aku. Laban udah ditulis Kristus endang deka angkat idup baru.’

‘Aku tu meh jalai, pemendar, enggau pengidup. Nadai orang ulih datai ngagai Apai enti enda nengah aku.’—John 14:6