Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 79

Jesus Ngereja Mayuh Kereja Ajih

Jesus Ngereja Mayuh Kereja Ajih

Jesus datai ke dunya ngambika ulih nusui berita manah pasal Perintah Petara. Kena nunjukka utai ke deka dikereja Jesus lebuh nyadi Raja, Jehovah meri iya roh kudus kena ngereja kereja ajih. Iya ulih ngeraika bemacham penyakit. Enda ngira dini endur iya, orang ke sakit datai ngagai iya minta tulung, lalu iya ngeraika semua sida. Orang buta ulih meda, orang pekak ulih ninga, orang ke bajung ulih bejalai, lalu orang ke dirasuk antu ulih dilepaska. Taja pan semina negu ujung baju iya aja, sida ulih gerai. Orang mayuh nitihka Jesus enda ngira kini penunga iya. Indah lebuh iya deka kediri, iya agi nerima penatai sida.

Bisi sekali, orang mayuh mai seiku lelaki ti bajung ngagai endur Jesus diau. Tang rumah nya penuh enggau orang nyentukka sida enda ulih tama. Nya alai, sida ngaga lubang ba perabung ngambika ulih ngulurka lelaki nya ke baruh ngagai Jesus. Udah nya, Jesus madah ngagai lelaki nya: ‘Angkat lalu bejalai.’ Lebuh lelaki nya angkat lalu bejalai, orang balat alit ati.

Ba maya ti bukai, lebuh Jesus tama ngagai siti nengeri, sepuluh iku orang ke sakit lan bediri ari jauh ngangau enggau nyawa ti inggar: ‘Jesus, tulung kami!’ Ba jeman nya, orang ke sakit lan enda ulih mansang semak ngagai orang bukai. Jesus ngasuh sida ngagai rumah sembiang. Nitihka Adat Jehovah, tu utai ke patut digaga orang ke sakit lan pengudah sida gerai. Lebuh  sida bejalai ngagai rumah sembiang, sida lalu gerai. Seiku ari sida ngasaika diri udah gerai, lalu nikal baru ngagai Jesus meri terima kasih sereta muji Petara. Ari sepuluh iku, semina iya aja meri terima kasih ngagai Jesus.

Bisi seiku indu ke sakit pengelama 12 taun keran deka gerai. Iya datai ari belakang Jesus ba bala orang mayuh lalu negu ujung kelambi Jesus. Tekala nya, iya lalu gerai. Lebuh tu nyadi, Jesus nanya: ‘Sapa negu aku?’ Indu nya takut, tang iya mansang ke mua lalu madah utai ti bendar. Jesus merindang iya enggau jaku: ‘Anak, mupuk meh nuan enggau selamat.’

Seiku pemesai ke benama Jairus minta Jesus: ‘Datai meh ngagai rumah aku! Anak indu aku balat sakit.’ Tang sebedau Jesus datai ngagai rumah Jairus, anak mit indu nya udah mati. Lebuh Jesus datai, iya meda mayuh orang udah datai nyabak enggau sida diri sebilik. Jesus madah ngagai sida: ‘Anang nyabak. Iya semina tinduk.’ Udah nya, iya megai jari anak mit nya lalu madah: ‘Endu, angkat nuan!’ Tekala nya iya angkat, lalu Jesus ngasuh apai indai iya meri anak nya pemakai. Uji perundingka asai ati apai indai nya!

“Petara nata iya ngena roh kudus enggau kuasa, lalu Jesus bejalai ngagai mayuh bengkah endur ngereja pengawa ti manah, sereta ngeraika semua orang ke dirasuk antu, laban Petara bisi enggau iya.”—Kereja Rasul 10:38, NW