Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 86

Jesus Ngangkatka Lasarus Idup Baru

Jesus Ngangkatka Lasarus Idup Baru

Jesus bisi tiga iku pangan ti rapat ke diau ba Betani. Sida iya, Lasarus enggau dua iku menyadi indu iya, Maria enggau Marta. Ba siti hari, lebuh Jesus ba seberai Sungai Jordan, Maria enggau Marta nganjung pesan ti berat ngagai Jesus: ‘Lasarus sakit raya. Datai meh enggau jampat!’ Tang Jesus enda mupuk ba maya nya. Iya nganti dua hari agi, lalu udah nya, iya madah ngagai bala rasul iya: ‘Aram kitai mansang ngagai Betani. Lasarus udah tinduk tang aku deka kin ngerak iya.’ Ku sida nyaut: ‘Enti Lasarus tinduk, iya deka gerai.’ Jesus lalu madah enggau terang ngagai sida: ‘Lasarus udah mati.’

Lebuh Jesus datai ba Betani, Lasarus udah dikuburka empat hari. Mayuh orang datai ngagai Marta seduai Maria, deka ngelantangka seduai iya. Lebuh Marta ninga Jesus udah datai, iya lalu beguai betemu enggau Jesus. Ku Marta: ‘Tuan, enti nuan bisi ditu maya nya, menyadi aku tentu enda mati!’ Jesus nyaut iya: ‘Menyadi nuan deka angkat idup baru. Kati nuan arapka tu, Marta?’ Saut Marta: ‘Aku nemu iya deka angkat idup baru lebuh pengangkat orang ari mati.’ Jesus nyaut iya: ‘Aku tu meh pengangkat enggau pengidup.’

Udah nya Marta mansang ngagai Maria lalu madahka iya: ‘Jesus bisi ditu.’ Maria belanda ngagai Jesus, lalu orang mayuh nitihka iya. Iya nyungkurka diri ba kaki Jesus, lalu enda ngetu nyabak. Ku iya: ‘Tuan, enti nuan bisi ditu maya nya, menyadi kami tentu enda mati!’ Jesus meda pemalat pemerinsa Maria, lalu iya mega berengkah nyabak. Lebuh orang mayuh meda iya nyabak, ku sida: ‘Peda pemalat Jesus rinduka Lasarus.’ Tang sekeda ngumbai: ‘Nama kebuah iya enda nyelamatka pangan iya?’ Nama deka digaga Jesus udah nya?

Jesus mansang ngagai kubur, lalu bisi siti batu besai ke nutup pintu penama. Ku Jesus: ‘Pindahka batu nya.’ Ku Marta: ‘Tang iya udah mati empat hari! Iya tentu udah bau but.’ Taja pia, sida terus mindahka batu nya, lalu Jesus besampi: ‘Apai, terima kasih laban Nuan udah ningaka aku. Aku nemu Nuan seruran ningaka aku, tang  aku deka bejaku enggau inggar ngambika sida nemu Nuan ngirumka aku.’ Udah nya Jesus ngangau enggau nyawa ti inggar: ‘Lasarus, pansut nuan!’ Utai ti ngalitka ati nyadi: Lasarus pansut ari kubur, agi dibalut enggau kain linin. Ku Jesus: ‘Buka kain nya ngambika iya ulih bejalai.’

Mayuh orang ke meda tu arapka Jesus. Tang sekeda mansang lalu madah ngagai orang Parisi. Berengkah ari nya, orang Parisi deka munuh Lasarus enggau Jesus. Seiku ari 12 iku rasul, iya nya Judas Iskariot, belalai mansang ngagai orang Parisi lalu nanya: ‘Berapa deka diberi kita ngagai aku enti aku nyerahka Jesus ngagai kita?’ Sida setuju mayar 30 singkap duit pirak, lalu Judas berengkah ngiga jalai nyerahka Jesus ngagai orang Parisi.

‘Petara kitai nya Petara ti meri kita pengelepas. Iya nya meh Jehovah, ti Petara kitai, ke ngelepaska kitai ari pemati.’—Masmur 68:20