Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 83

Jesus Meri Beribu Iku Orang Makai

Jesus Meri Beribu Iku Orang Makai

Sebedau pengerami Paska ba taun 32 M., bala rasul pulai ari bejalai meritaka injil. Sida lelak, nya alai Jesus mai sida nepan perau ngagai Betsaida, ngambika ulih belelak. Tang lebuh sida semak enggau tebing, Jesus meda beribu iku orang nitihka sida kia. Taja pan Jesus deka kediri enggau bala rasul iya, iya agi nerima orang mayuh enggau manah. Iya ngeraika orang ti sakit lalu berengkah ngajar sida. Sepemanjai hari, Jesus ngajar sida pasal Perintah Petara. Lebuh hari nyau lemai, bala rasul iya mansang ngagai Jesus lalu madahka iya: ‘Orang mayuh tu engka lapar. Asuh sida pulai ngambika ulih meli pemakai.’

Ku Jesus nyaut: ‘Sida enda ibuh pulai. Beri sida pemakai ditu.’ Bala rasul nanya: ‘Kati nuan deka kami meli ruti ke sida?’ Philip, seiku ari bala rasul madah: ‘Taja pan kitai bisi mayuh duit, kitai enda ulih meli ruti ke semua orang mayuh tu.’

Jesus nanya: ‘Berapa penyampau pemakai ke bisi ba kitai?’ Saut Andrew: ‘Kitai bisi lima iti tuku ruti, enggau dua iku ikan mit. Tu enda chukup.’ Jesus madah: ‘Beri aku ruti enggau ikan nya.’ Iya ngasuh orang mayuh duduk ba rumput, penyampau 50 enggau 100 iku dalam siti-siti raban. Jesus ngambi tuku ruti nya enggau ikan, engkadah ke langit lalu besampi. Udah nya, iya nyua pemakai nya ngagai bala rasul, lalu sida nyadung pemakai nya ngagai orang mayuh. 5,000 iku lelaki sereta indu enggau anak mit, makai nyentukka sida kenyang magang. Udah nya, bala rasul ngumpul semua teda pemakai,  ngambika enda tebasau. Sida ngumpul dua belas bakul penuh teda. Enda ka tu kereja ajih ti ngalitka ati?

Orang mayuh amat alit ati nyentukka sida deka ngasuh Jesus nyadi raja sida. Tang Jesus nemu nya ukai maya Jehovah deka ngasuh iya nyadi raja. Nya alai, iya ngasuh orang mayuh mupuk lalu ngasuh bala rasul iya mansang ngagai seberai Danau Galili. Sida nepan perau lalu Jesus niki ngagai bukit kediri iya aja. Nama kebuah? Laban iya deka ngena awak besampi ngagai Apai iya. Enda ngira pemayuh pengawa iya, Jesus seruran nyediaka awak kena besampi.

“Anang bekereja ngulihka pemakai ti nemu buruk, tang bekereja ngulihka pemakai ti tan, ti meri pengidup ti meruan belama iya. Pemakai nya deka diberi Anak Mensia ngagai kita.”—John 6:27