Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 77

Indu ke ba Telaga

Indu ke ba Telaga

Pengudah pengerami Paska, Jesus enggau bala murid iya bejalai pulai ngagai Galili nengah Samaria. Semak nengeri Saikar, Jesus ngetu ba endur ti dikumbai telaga Jakop. Lebuh iya belelak dia, bala murid iya mansang ke pasar meli pemakai.

Seiku indu datai ngagai telaga deka nyauk ai. Jesus madahka iya: ‘Beri aku ngirup.’ Ku indu nya: ‘Nama kebuah nuan bejaku enggau aku? Aku orang Samaria. Orang Judah enda bejaku enggau orang Samaria.’ Jesus nyaut: ‘Enti nuan ngelala sapa aku, nuan tentu deka minta ai ari aku lalu aku deka meri nuan ai ti meri pengidup.’ ‘Nama reti ku nuan?’ tanya indu nya. ‘Nuan nadai beledi.’ Jesus nyaut: ‘Barang sapa ke ngirup ai ti deka diberi aku enda agi aus.’ Ku indu nya: ‘Tuan, beri aku ai nya.’

Jesus madah ngagai iya: ‘Bai laki nuan ngagai telaga kitu.’ Ku indu nya: ‘Aku nadai laki.’ Saut Jesus: ‘Nuan madah utai ti bendar. Nuan udah belaki lima kali, lalu lelaki ke enggau nuan begulai diatu, ukai laki nuan.’ Saut indu nya: ‘Diatu baru aku nemu nuan tu nabi. Orang bansa aku pechaya kami ulih nyembah Petara ba bukit tu, tang orang Judah madahka kami semina ulih nyembah ba Jerusalem. Aku pechaya lebuh Messiah datai, iya deka ngajar kami chara nyembah Petara.’ Jesus lalu madahka utai ti nadai kala dipadah iya ngagai orang bukai: ‘Aku tu meh Messiah.’

 Indu nya beguai pulai ngagai nengeri iya lalu madah ngagai orang Samaria: ‘Aku engka udah tetemuka Messiah. Iya nemu semua utai pasal aku. Aram meda iya!’ Sida nitihka indu nya mansang ngagai telaga lalu ninga ajar Jesus.

Orang Samaria mai Jesus diau ba nengeri sida. Iya ngajar ba nengeri nya pengelama dua hari, lalu mayuh orang arap ngagai iya. Sida madah ngagai indu Samaria nya: ‘Pengudah kami ninga ajar iya, kami nemu iya amat Juruselamat dunya.’

“‘Datai kitu!’ Lalu awakka semua orang ke aus, datai. Awakka barang sapa deka, ngambi ai pengidup nyadika pemeri.”—Pemandang 22:17