Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 81

Ajar ba atas Bukit

Ajar ba atas Bukit

Pengudah iya milih 12 iku rasul, Jesus nurun ari bukit ngagai endur orang mayuh begempuru. Sida datai ari menua Galili, Judea, Tire, Sidon, Siria sereta ari seberai Sungai Jordan. Sida mai orang ke merinsa ketegal penyakit lalu bisi mega sekeda orang ke diperinsa antu. Jesus ngeraika semua sida. Udah nya, iya duduk ba tisi bukit lalu berengkah bejaku. Iya nerangka nama patut digaga kitai enti deka nyadi pangan Petara. Kitai patut nemu kitai begunaka Jehovah sereta belajar rinduka Iya. Tang kitai enda ulih rinduka Petara enti kitai enda rinduka orang bukai. Kitai patut manah sereta enda bechiping enggau orang bukai, nyengkaum munsuh kitai.

Jesus madah: ‘Enda chukup semina rinduka bala pangan nuan. Nuan mega patut rinduka munsuh nuan sereta ngampunka orang ari ati nuan. Enti bisi orang enda nyamai ati enggau nuan, betemu enggau iya tekala nya lalu minta ampun. Nuan patut begulai manah  enggau orang bukai laban nuan mega deka sida manah enggau nuan.’

Jesus mega meri jaku lalau ti manah ngagai orang mayuh pasal reta tengkira. Ku iya: ‘Manah agi nyadi pangan Jehovah ari ke bisi mayuh duit. Penchuri ulih ngenchuri duit nuan, tang nadai orang ulih ngenchuri kaul nuan enggau Jehovah. Anang irauka utai ke deka diempa, diirup tauka dikena. Peda kita burung. Petara seruran nentuka sida bisi chukup pemakai. Pengirau enda ngasuh umur kita panjai agi. Ingat, Jehovah nemu utai ke diguna kita.’

Orang mayuh nadai kala ninga orang bukai ngajar baka Jesus. Tuai pengarap sida enda kala ngajar sida utai baka tu. Nama kebuah Jesus ulih ngajar ngemanah nya? Laban utai ti diajar iya datai ari Jehovah.

“Ambi lalu san tangkun aku, lalu belajar ari aku, laban aku nelap sereta baruh ati, lalu kita deka bulih pengering baru.” —Matthew 11:29, NW