Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 PELAJAR 68

Elisabet Bisi Anak

Elisabet Bisi Anak

Lebih 400 taun pengudah dinding kuta Jerusalem didirika baru, seiku imam ke benama Sekariah enggau bini iya, Elisabet diau semak kuta nya. Seduai iya udah jadi betaun-taun tang bedau bisi anak. Bisi sekali, lebuh Sekariah benung nunu menyan ba Endur ti Kudus, melikat Gabriel ayan. Sekariah amat takut, tang ku Gabriel: ‘Anang takut. Aku mai berita manah ari Jehovah ke nuan. Bini nuan Elisabet deka ngadaka seiku anak lelaki, lalu nama iya John. Jehovah udah milih John ngaga siti pengawa ti spesial.’ Sekariah nanya: ‘Baka ni ku aku ulih pechayaka nuan? Aku enggau bini aku nyau tuai.’ Ku Gabriel: ‘Aku udah diasuh Petara mai berita manah tu ngagai nuan. Tang, laban nuan enda arapka jaku aku, nuan deka bisu, enda ulih bejaku nyentuk ngagai hari anak mit nya udah ada.’

Sekariah ba Endur ti Kudus lama agi ari ke ngelama tu. Lebuh iya pansut, orang mayuh ke ba luar nganti deka nemu utai ke nyadi. Sekariah enda ulih bejaku. Iya semina ulih ngaga tanda ngena jari iya. Nya baru sida nemu, Sekariah bisi nerima pesan ari Petara.

Nyau kelama, Elisabet betubuh-bisi lalu ngadaka seiku anak lelaki, nitihka utai ke dipadah melikat nya. Bala pangan enggau kaban belayan Elisabet datai meda anak mit nya. Sida sama bela gaga ati enggau iya. Ku Elisabet: ‘Nama iya John.’ Ku sida: ‘Tang nadai seiku ari kita sebilik ngembuan nama John. Beri meh nama iya Sekariah, ngangkatka nama apai iya.’ Tang Sekariah nulis jaku tu: ‘Nama iya John.’ Tekala nya, Sekariah ulih bejaku baru! Berita pasal anak mit tu ngerembai ngagai semua menua Judea, lalu orang berunding: ‘Nama penyadi nembiak tu ila?’’

Udah nya, Sekariah penuh laban roh kudus. Iya madah: ‘Pujika Jehovah. Iya besemaya ngagai Abraham deka nganjung seiku Juruselamat, iya nya Messiah, kena nyelamatka kitai. John deka nyadi nabi, lalu iya deka nyediaka jalai ke Messiah.’

 Bisi utai bukai ti manah mega nyadi ngagai kaban belayan Elisabet, Maria. Aram kitai meda tu ba pelajar ke nangkanka tu.

‘Ba mensia, utai tu enda ulih, tang ba Petara semua utai ulih magang.’—Matthew 19:26