Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 71

Jehovah Ngelindung Jesus

Jehovah Ngelindung Jesus

Ba tunga timur menua Israel, bisi bansa ke pechaya bintang ulih ngiring sida. Ba siti malam, sekeda lelaki ari Timur meda bintang terang ti mindah ba langit, lalu sida nitihka nya. “Bintang” nya mai sida ngagai Jerusalem. Sida lalu nanya orang: ‘Dini alai anak mit ke deka nyadi raja orang Judah? Kami datai deka meremi ngagai iya.’

Lebuh Herod, raja menua Jerusalem ninga pasal raja ke baru nya, iya amat irau. Iya nanya bala tuai imam: ‘Dini alai raja tu patut ada?’ Saut sida: ‘Bala nabi madahka iya deka ada ba Betlehem.’ Nya alai Herod ngangau orang ke ari Timur nya lalu ngasuh sida: ‘Mupuk meh kita ngagai Betlehem, lalu giga anak mit nya. Lebuh kita udah tetemuka iya, padahka ngagai aku. Aku mega deka meremi ngagai iya.’ Tang iya bula.

“Bintang” nya mindah baru. Orang ke ari timur nitihka bintang nya ngagai Betlehem. “Bintang” nya ngetu ba atas siti rumah lalu sida tama ke dalam. Sida tepedaka Jesus enggau indai iya, Maria. Sida meremi ngagai anak mit nya lalu meri iya emas, menyan enggau mur. Kati Jehovah amat bisi nganjung bala lelaki nya ngiga Jesus? Enda.

Malam nya, Jehovah madah ngagai Josep ngena mimpi: ‘Herod deka munuh Jesus. Bai bini nuan enggau anak mit nya rari ngagai menua Ejip. Diau din nyentukka Aku ngasuh nuan ninggalka menua nya.’ Tekala nya, Josep diri sebilik mupuk ngagai menua Ejip.

Jehovah udah madahka ngagai orang ke ari Timur nya sida enda patut pulai baru ngagai Herod. Lebuh Herod nemu sida enda pulai baru, iya amat pedis ati. Ketegal iya enda ulih tetemuka Jesus, iya meri atur semua anak mit lelaki ke serebak enggau Jesus ba Betlehem dibunuh. Tang, Jesus selamat laban iya ba menua Ejip.

 Nyau kelama, Herod mati. Jehovah madahka Josep: ‘Diatu kita menyanak ulih pulai.’ Josep, Maria enggau Jesus pulai baru ngagai menua Israel, lalu diau ba nengeri Nasaret.

“Baka nya meh jaku ti pansut ari mulut Aku . . . . Iya deka ngereja utai ti diasuh Aku kereja iya.”—Isaiah 55:11