Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 63

Tulis ke ba Dinding

Tulis ke ba Dinding

Nyau kelama udah nya, Belsasar nyadi raja menua Babilon. Ba siti malam, iya ngelaluka seribu iku orang ke bepangkat tinggi ngagai pengerami makai besai. Iya ngasuh orang gaji iya mai changkir emas ti udah ditabanka Nebukadnesar ari rumah sembiang Jehovah. Belsasar enggau bala temuai iya ngirup ngena changkir nya lalu muji petara sida. Tekala nya, siti jari mensia ayan lalu berengkah nulis leka jaku ti nyelai ba dinding endur sida berami.

Belsasar balat takut. Iya ngangauka tukang majik lalu besemaya enggau sida: ‘Barang sapa ke ulih madahka reti tulis tu ngagai aku, deka nyadi orang ke lumur tiga bekuasa ba Babilon.’ Sida nguji, tang nadai seiku ari sida nemu madahka reti tulis nya. Kuin tama lalu madah: ‘Bisi seiku lelaki ke benama Daniel seruran nerangka reti mimpi ngagai Nebukadnesar. Awakka iya madahka reti semua utai tu ngagai nuan.’

Daniel lalu dibai ngagai raja. Belsasar madah ngagai iya: ‘Enti nuan nemu macha sereta madahka reti tulis tu, aku deka meri nuan rantai emas, lalu nuan nyadi orang ke lumur tiga bekuasa di menua tu.’ Saut Daniel: ‘Simpan aja pemeri nuan nya. Aku deka madahka nuan reti tulis tu. Apai nuan, Nebukadnesar nya sumbung, lalu Jehovah ngemaruhka iya. Nuan nemu semua utai ke udah nyadi ngagai iya, tang nuan enda bebasaka Jehovah lalu ngirup ngena changkir emas ari rumah sembiang Iya. Nya alai, Petara nulis leka jaku tu: Mene, Mene, Tekel, enggau Parsin. Reti leka jaku tu, bansa Media enggau Persia deka ngalahka Babilon lalu nuan enda ulih nyadi raja agi.’

Babilon baka ke enda ulih dialahka. Menua Babilon dilindung dinding ti besai sereta sungai ti dalam. Tang malam nya, soldadu Media enggau Persia nyerang kuta nya. Raja Sairus ke ari Persia, ngelimpangka pejalai ai  sungai ngambika soldadu iya ulih bejalai nengah sungai nya ngagai pintu kuta. Lebuh sida datai dia, pintu kuta udah tebuka! Bala soldadu terus tama, ngalahka kuta nya, lalu munuh raja. Udah nya, Sairus nyadi pemerintah Babilon.

Dalam timpuh setaun, Sairus madah: ‘Jehovah udah ngasuh aku nirika baru rumah sembiang Iya ba Jerusalem. Barang sapa ke deka nulung ba pengawa tu ulih mupuk pulai.’ Baka ke udah disemayaka Jehovah, mayuh orang Judah pulai pengudah 70 taun Jerusalem dirusakka. Sairus mulaika baru changkir emas enggau pirak sereta perengka ti udah ditabanka Raja Nebukadnesar ari rumah sembiang. Ulih nuan meda baka ni Jehovah ngena Sairus nulung nembiak Iya?

“Udah alah! Babilon ti besai udah alah! Iya udah nyadika endur alai antu diau.”—Pemandang 18:2