Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 57

Jehovah Nganjung Jeremiah Madahka Pesan Iya

Jehovah Nganjung Jeremiah Madahka Pesan Iya

Jehovah milih Jeremiah nyadi nabi ke bansa Judah. Iya ngasuh Jeremiah madahka pesan Iya ngagai rayat lalu nangkan sida badu agi ngereja pengawa ti jai. Ku Jeremiah: ‘Tang Jehovah, aku agi nembiak. Aku enda nemu baka ni deka bejaku enggau sida.’ Jehovah madah ngagai iya: ‘Anang takut. Aku deka madah utai ke patut ditusui nuan. Aku deka mantu nuan.’

Jehovah ngasuh Jeremiah ngempuruka bala tuai bansa, mechahka kebuk tanah ba mua sida, lalu madah: ‘Jerusalem deka anchur baka tu.’ Lebuh Jeremiah ngereja utai ke diasuh Jehovah, bala tuai bansa amat ringat. Seiku imam ke benama Pasur malu Jeremiah lalu ngerantai kaki enggau jari Jeremiah ba kanchin kayu. Semalam-malam nya, iya enda ulih engkebut. Pasur ngelepaska iya pagi hari siti. Ku Jeremiah: ‘Aku enda ulih ngenatka tu agi. Aku deka ngetu nginjil.’ Tang kati iya amat putus pengarap? Enda. Lebuh Jeremiah berunding enggau dalam agi, ku iya: ‘Pesan Jehovah mau baka api dalam ati aku. Aku enda tau enda madahka pesan nya.’ Jeremiah terus nangkan rayat nya.

Betaun-taun udah nya, bisi raja baru ba menua Judah. Bala imam enggau nabi pelesu begedika pesan Jeremiah. Sida madah ngagai bala pemesai: ‘Lelaki tu patut mati.’ Jeremiah madah ngagai sida: ‘Enti kita munuh aku, kita deka munuh orang ke nadai penyalah. Aku madahka pesan Jehovah, ukai pesan aku empu.’ Lebuh bala pemesai ninga tu, ku sida: ‘Lelaki tu enda patut dibunuh.’

Jeremiah terus madahka pesan Jehovah, lalu bala pemesai amat  ringat. Sida ngasuh raja ngukum Jeremiah. Raja madah sida ulih ngereja sebarang utai ngagai Jeremiah. Sida nangkap Jeremiah lalu muai iya ba telaga ti dalam sereta luchak ngambika iya mati dia. Jeremiah terunjam ba tanah luchak nya.

Udah nya, seiku pemesai ke benama Ebetmelek bejaku enggau raja: ‘Bala pemesai udah muai Jeremiah ngagai telaga! Enti kitai nejuka iya dia, iya deka mati.’ Raja ngasuh Ebetmelek mai 30 iku lelaki enggau iya lalu narit Jeremiah pansut ari telaga. Enda ke kitai patut baka Jeremiah, ke enda ngasuh sebarang utai nagang iya ari madahka pesan Jehovah?

“Semua orang deka begedika kita ketegal nama aku. Tang orang ke tan datai ke ujung, deka diselamatka.”—Matthew 10:22

Belajar Lebih Agi

AJAR MEH ANAK NUAN

Jeremiah Enda Ngetu Madah Pasal Jehovah

Taja pan orang ngemelika iya tauka nganu iya, nama kebuah Jeremiah enda ngetu madah pasal Jehovah?

VIDEO JAKU PEMUKA KE BUP KUDUS

Jaku Pemuka ke Jeremiah

Jeremiah tetap ati bejalaika pengawa iya nyadi nabi taja pan tusah. Perundingka baka ni teladan iya ulih nulung orang Kristian kemaya hari tu.