Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 65

Ester Nyelamatka Bansa Iya

Ester Nyelamatka Bansa Iya

Ester seiku indu Judah ke diau ba Susa, nengeri Persia. Betaun sebedau nya, ruang bilik iya ditabanka Nebukadnesar ari Jerusalem nyadi orang tangkap. Iya diibun petunggal iya Mordikai, orang gaji Raja Serses ari Persia.

Raja Serses deka kuin ti baru. Orang gaji iya mai bala indu ti pemadu bajik ba menua nya, nyengkaum Ester. Ari semua bala indu nya, raja milih Ester nyadi kuin. Mordikai nagang Ester madahka diri orang Judah.

Seiku lelaki ti sumbung ke benama Haman nya tuai bala pemesai. Iya deka tiap iku orang meremi ngagai iya. Mordikai enggai ngereja nya. Nya alai, Haman balat ringat lalu deka munuh iya. Lebuh Haman nemu Mordikai nya orang Judah, iya berunding deka munuh semua orang Judah ba menua nya. Iya madah ngagai raja: ‘Orang bansa Judah nya ngachau. Nuan patut munuh sida.’ Saut Serses: ‘Kereja aja nitihka peneka nuan,’ lalu meri iya kuasa ngaga siti atur. Haman ngaga atur ti ngasuh rayat munuh semua orang Judah kena 13 hari bulan Adar. Jehovah benung meratika pengawa Haman.

Ester enda nemu pasal atur tu. Nya alai, Mordikai nganjung siti salin atur tu lalu madahka iya: ‘Mansang nuan bejaku enggau raja.’ Ku Ester: ‘Barang sapa ke deka betemu enggau raja tang enti ukai dikangauka raja deka dibunuh. Udah 30 hari raja nadai ngangau aku! Tang, aku deka ngereja utai ke dipinta nuan. Enti raja ngedarka tungkat iya, aku deka idup. Tang enti enda, aku deka mati.’

Ester mansang ngagai laman raja. Lebuh raja meda Ester, iya ngedarka tungkat iya. Ester mansang ngagai iya, lalu raja nanya: ‘Nama utai, Kuin Ester?’ Saut iya: ‘Aku deka mai raja enggau Haman ngagai pengerami makai besai.’  Ba pengerami nya, Ester mai seduai iya baru ngagai pengerami makai besai kena ke hari siti. Ba pengerami kedua nya, raja nanya Ester baru: ‘Nama utai ke deka dipinta nuan?’ Saut Ester: ‘Bisi orang deka munuh aku enggau bansa aku. Tulung selamatka kami.’ Raja nyaut: ‘Sapa deka munuh nuan?’ Ku Ester: ‘Orang jai tu, Haman.’ Serses balat ringat lalu ngasuh Haman dibunuh tekala nya.

Tang nadai orang ulih ngubah atur ke udah digaga Haman, nyengkaum raja empu. Nya alai, raja ngasuh Mordikai nyadi tuai bala pemesai lalu meri iya kuasa kena ngaga atur baru. Mordikai ngaga atur ti ngemendarka orang Judah ngetanka diri sida empu lebuh sida diserang munsuh. Kena 13 hari bulan Adar, orang Judah ngalahka munsuh sida. Berengkah ari nya, sida ngintu pengerami ngingatka hari sida ke udah menang ninting taun.

“Kita deka kena pechara di mua gabenor enggau raja ketegal aku, ngambika kita besaksika pasal aku ngagai sida enggau ngagai orang bansa bukai.”—Matthew 10:18