Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 PELAJAR 58

Jerusalem Dirusak

Jerusalem Dirusak

Bansa orang Judah udah mayuh kali ninggalka Jehovah lalu nyembah petara pelesu. Betaun-taun Jehovah nguji nulung sida. Iya nganjung mayuh nabi nangkan sida, tang sida enggai ninga. Sida indah ngemelika bala nabi. Baka ni Jehovah ngetuka pengawa sida ke nyembah patung?

Nebukadnesar, raja menua Babilon benung ngalahka siti nengeri ngagai siti nengeri. Lebuh iya keterubah kali ngalahka Jerusalem, iya nangkap Raja Jehoiakin, bala peturun raja, soldadu ti kering enggau orang ke landik gawa lalu naban sida ngagai Babilon. Iya mega mai reta tengkira ari rumah sembiang Jehovah. Udah nya, Nebukadnesar milih Sedekiah nyadi raja menua Judah.

Keterubah iya, Sedekiah ngasika Nebukadnesar. Tang, nengeri ke semak iya enggau bala nabi pelesu mai Sedekiah ngelaban Babilon. Jeremiah nangkan iya: ‘Enti nuan ngelaban, deka bisi pemati, lapar pungkang enggau penyakit ba Judah.’

Pengudah merintah pengelama lapan taun, Sedekiah mutuska deka ngelaban Babilon. Iya minta tulung ari soldadu Ejip. Nebukadnesar lalu nganjung bala soldadu iya nyerang Jerusalem. Sida ngaga kem ngelingi kuta nya. Ku Jeremiah madah ngagai Sedekiah: ‘Jehovah madah enti nuan nyerahka diri ngagai menua Babilon, nuan enda dibunuh lalu nengeri tu deka selamat. Tang enti nuan enda nyerahka diri, orang Babilon deka nunu nengeri tu lalu nuan deka ditangkap.’ Ku Sedekiah: ‘Aku enggai nyerah diri!’

 Setaun setengah udah nya, soldadu Babilon ngeruntuhka dinding kuta Jerusalem sereta nunu nengeri nya. Sida nunu rumah sembiang, munuh mayuh orang lalu naban beribu iku orang nyadi orang tangkap.

Sedekiah ngerarika diri ari Jerusalem, tang soldadu Babilon begagaika iya. Sida nangkap iya semak Jeriko lalu mai iya ngagai Nebukadnesar. Raja nya ngasuh Sedekiah meda bala anak iya dibunuh ba mua iya empu. Udah nya, Nebukadnesar ngemutaka mata Sedekiah lalu ngurung iya ba rumah jil, endur ke ngujungka iya mati. Tang Jehovah besemaya ngagai orang Judah: ‘Pengudah 70 taun, Aku deka mai kita pulai baru ngagai Jerusalem.’

Nama deka nyadi ngagai bala nembiak ke ditaban ngagai Babilon? Kati sida deka mengkang tetap ati ngagai Jehovah?

‘Petara Jehovah ti Pemadu Bekuasa! Ukum ti diberi Nuan endang bendar sereta lurus!’—Pemandang 16:7