Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 66

Esra Ngajar Adat Petara

Esra Ngajar Adat Petara

Nyau kira-kira 70 taun pengudah mayuh ari orang Israel pulai ngagai Jerusalem, tang bisi mega agi diau ba sekeda menua ke dipegai Perintah Persia. Seiku ari sida nya imam ke benama Esra ti ngajar pasal Adat Jehovah. Esra nemu pasal orang ba Jerusalem ke enda nitihka Adat, lalu iya deka kin nulung sida. Raja menua Persia, Artaserses, madahka iya: ‘Petara udah meri nuan penemu-dalam ngambika nuan ulih ngajar Adat Iya. Mupuk meh lalu bai barang sapa ke deka enggau nuan mansang ngagai Jerusalem.’ Esra betemu enggau semua ke deka pulai baru ngagai Jerusalem. Sida besampi ngagai Jehovah ngambika nyaga pejalai sida, udah nya sida lalu mupuk.

Pengudah empat bulan, sida datai ba Jerusalem. Bala pemesai dia madah ngagai Esra: ‘Orang Israel enda nangika Jehovah lalu jadi enggau indu ke nyembah petara pelesu.’ Nama digaga Esra? Ba mua orang mayuh, Esra besugang lalu besampi: ‘Jehovah, Nuan udah ngereja mayuh utai ke kami, tang kami udah bedosa ngagai Nuan.’ Rayat nesal ati, tang sida agi begunaka bantu kena ngereja utai ti betul. Esra milih bala tuai enggau hakim kena mansik pekara tu. Ba timpuh tiga bulan ti deka datai, orang ke enda nyembah Jehovah dianjung pulai.

Dua belas taun udah lalu. Ba timpuh tu, dinding kuta ngelingi Jerusalem didirika baru. Esra ngempuruka semua orang ba endur orang mayuh ngambika ulih macha Adat Petara ngagai sida. Lebuh Esra muka bup Adat nya, orang mayuh bediri. Iya muji Jehovah, lalu sida ngangkatka jari tanda sida setuju. Esra macha sereta nerangka pasal Adat nya, lalu sida mending enggau manah. Sida ngaku diri udah limpang ari Jehovah lalu nyabak. Ba hari siti, Esra macha mayuh agi ari bup Adat ngagai sida. Sida nemu enda lama agi sida patut ngintu Pengerami Belangkau. Tekala nya, sida berengkah besedia ngintu pengerami nya.

Sekumbang tujuh hari pengerami nya, semua orang berasai lantang ati lalu meri terima kasih ngagai  Jehovah ketegal asil ngetau ti manah. Berengkah ari jeman Josua nadai kala bisi Pengerami Belangkau ti baka nya. Pengudah pengerami nya, orang mayuh begempuru lalu besampi: ‘Jehovah, Nuan ngelepaska kami ari nyadi ulun, meri kami pemakai ba menua puang, lalu meri nengeri ti manah ngagai kami. Tang, kami seruran enda ngasika Nuan. Nuan nganjung bala nabi nangkan kami, tang kami enda mendingka sida. Taja pia, Nuan tetap sabar. Nuan udah ngamatka semaya Nuan enggau Abraham. Diatu kami besemaya deka nangika Nuan.’ Sida nulis semaya sida lalu bala pemesai, orang Lewi enggau bala imam nanggam semaya nya.

‘Beberekat agi orang ke ninga lalu ngasika jaku Petara!’—Luke 11:28

Belajar Lebih Agi

VIDEO JAKU PEMUKA KE BUP KUDUS

Jaku Pemuka ke Esra

Jehovah ngamatka semaya Iya ngelepaska nembiak Iya ari menua Babilon, lalu ngaduka baru sembah ti bendar ba Jerusalem.