Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 67

Dinding Kuta Jerusalem

Dinding Kuta Jerusalem

Aram kitai beratika baru utai ke nyadi beberapa taun ti udah. Nehemiah ke bekereja enggau Raja Artaserses, seiku orang Israel ke diau ba Susa nengeri Persia. Menyadi lelaki Nehemiah datai ari menua Judah mai berita buruk: ‘Orang ke pulai baru ngagai Jerusalem enda selamat. Dinding kuta enggau pintu nengeri Jerusalem ke dirusak orang Babilon bedau digaga baru.’ Nehemiah balat tusah ati. Iya deka ngagai Jerusalem nulung sida. Nya alai, iya besampi ngambika raja ngemendarka iya mupuk ngagai Jerusalem.

Bisi sekali, raja meda Nehemiah tusah ati. Iya nanya: ‘Aku nadai kala meda nuan baka tu. Nama udah nyadi?’ Ku Nehemiah: ‘Baka ni aku enda tusah ati enti nengeri aku, Jerusalem, nyau nyadi tembawai?’ Ku raja nanya: ‘Nama utai ti dikedekaka nuan?’ Tekala nya, Nehemiah besampi dalam ati. Udah nya, iya nyaut: ‘Awakka aku mansang ngagai Jerusalem, ngambika aku ulih nirika dinding kuta nya baru.’ Raja Artaserses ngemendarka Nehemiah mupuk, lalu raja nentuka Nehemiah selamat ba pejalai iya ti jauh. Iya milih Nehemiah nyadi gabenor menua Judah lalu meri iya kayu ramu kena ngaga pintu nengeri.

Lebuh Nehemiah datai ba Jerusalem, iya meresa dinding kuta. Udah nya, iya ngempuruka bala imam enggau pemerintah lalu madahka sida: ‘Peda kita pemalat penusah kitai tu. Aram kitai ngaga dinding kuta tu.’ Semua orang setuju, lalu sida berengkah nirika dinding kuta nya.

Tang sekeda munsuh orang Israel ngeleseka sida enggau bejaku: ‘Indah munsang deh ulih ngeruntuhka dinding kuta ke digaga kita!’ Bala pekereja enda ibuhka jaku nya lalu terus nirika dinding kuta nya. Dinding kuta nya majak tinggi sereta teguh.

Bala munsuh bepekat deka nyerang Jerusalem enggau ngenyit. Lebuh orang Judah ninga pasal tu, sida balat takut. Tang, ku Nehemiah: ‘Anang takut. Jehovah bisi enggau kitai.’ Iya ngasuh orang jejaga ngelindung pekereja, lalu munsuh enda ulih nyerang.

 Dinding kuta sereta pintu nengeri tembu semina 52 hari aja. Nehemiah mai semua orang Lewi ngagai Jerusalem lebuh dinding kuta enggau pintu nengeri diserahka. Iya ngatur sida ngagai dua raban orang ke belagu. Ba atas dinding kuta sida beserara bejalai ngelingi kuta. Sida nebah terumpit, simbal enggau belikan lalu belagu ngagai Jehovah. Esra bejalai enggau siti raban lalu Nehemiah enggau raban siti da agi, bejalai nyentukka sida betemu ba rumah sembiang. Semua orang—lelaki, indu enggau bala anak mit—meri pemeri ngagai Jehovah lalu berami. Munyi nyawa sida ke gaga ati ulih didinga ari jauh.

“Nadai senyata ti digaga ulih ngemediska nuan.”—Isaiah 54:17