Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 64

Daniel ba Lubang Singa

Daniel ba Lubang Singa

Seiku agi raja menua Babilon nya Darius orang Media. Darius meda Daniel orang ke berupai landik agi. Iya milih Daniel nyadi tuai orang ke bepangkat tinggi. Bala orang ke bepangkat tinggi tu chemburuka Daniel lalu deka munuh iya. Sida nemu Daniel besampi ngagai Jehovah tiga kali ninting hari. Nya alai, sida madah ngagai Darius: ‘Tuan Raja, gaga meh siti atur ngambika semua orang besampi semina ngagai nuan seiku aja. Barang sapa ke ngelanggar atur tu patut dibuai ngagai lubang singa.’ Darius setuju enggau penemu nya, lalu nyain atur nya.

Lebuh Daniel nemu pasal atur baru nya, iya pulai ke rumah enggau jampat. Ba mua jenila ke tebuka, iya besugang lalu besampi ngagai Jehovah. Bala orang ke chemburu nya nangkap iya ke benung besampi. Sida mansang ngagai Darius lalu ku sida: ‘Daniel enda ngasika nuan. Iya besampi ngagai Petara iya tiga kali ninting hari.’ Darius sayauka Daniel lalu enggai iya mati. Sepemanjai hari, iya ngiga jalai kena nyelamatka Daniel. Tang indah raja enda ulih ngubah atur ti udah disain. Nya alai, raja ngasuh orang iya muai Daniel ngagai lubang singa.

 Malam nya, Darius enda ulih tinduk ketegal iya amat irauka Daniel. Pagi hari siti, iya belanda ngagai lubang singa lalu ngangauka Daniel: ‘Kati bisi Petara nuan nyelamatka nuan?’

Darius ninga siti nyawa. Nya nyawa Daniel! Iya nyaut Darius: ‘Melikat Jehovah udah nutup mulut singa. Sida enda ngemediska aku.’ Darius amat gaga ati! Iya ngasuh orang narit Daniel pansut ari lubang singa. Daniel nadai nama-nama. Udah nya, raja meri perintah: ‘Buai semua sida ke bedawaka Daniel ngagai lubang singa.’ Lebuh sida dibuai ke dalam lubang nya, bala singa nyambar sida.

Darius meri atur ngagai rayat iya: ‘Semua orang enda tau enda nangi sereta bebasaka Petara ke disembah Daniel. Iya udah nyelamatka Daniel ari jelu singa.’

Kati nuan besampi ngagai Jehovah ninting hari baka Daniel?

‘Jehovah nemu nyelamatka orang ke nangika Iya, ari penguji ti nuntung sida.’—2 Peter 2:9

Belajar Lebih Agi

ANAK BELAJAR BUP KUDUS

Daniel Besampi!

Tulung anak nuan nemu kebuah besampi ngagai Petara ninting hari beguna bendar.