Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 PELAJAR 2

Petara Ngaga Lelaki enggau Indu ti Keterubah

Petara Ngaga Lelaki enggau Indu ti Keterubah

Jehovah ngaga siti kebun ba endur ke dikumbai Eden. Kebun nya penuh enggau bungai, pun kayu, enggau jelu. Udah nya, Petara ngaga lelaki keterubah, Adam, ari amau tanah lalu ngesuhka seput ke dalam lubang idung iya. Nemu nuan nama nyadi? Iya nyadi mensia ti idup! Jehovah meri Adam pengawa nyaga kebun nya, lalu Petara ngasuh iya meri nama ngagai semua jelu.

Jehovah meri Adam perintah ti berat. Iya madah ngagai Adam: ‘Nuan tau makai buah ari semua pun kayu ba kebun tu kelimpah ari siti pun kayu aja. Enti nuan makai buah ari pun kayu nya, nuan deka mati.’

Udah nya Jehovah bejaku: ‘Aku deka ngaga seiku penulung ke Adam.’ Iya ngasuh Adam tinduk jenak. Petara lalu ngambi siti tulang kerigai Adam kena ngaga seiku bini ke Adam. Nama iya Hawa. Adam seduai Hawa nyadi ruang bilik ti keterubah. Baka ni asai ati Adam pasal bini iya? Iya amat gaga ati nyentukka iya madah: ‘Peda utai digaga  Jehovah ari tulang kerigai aku! Nya baru iya, bisi seiku ke sebaka enggau aku.’

Jehovah ngasuh Adam enggau Hawa beranak lalu ngemenuhka dunya. Iya deka seduai iya lantang ati gawa begulai ngaga bumi tu nyadi paradais, tauka taman ti manah, baka kebun Eden. Tang utai enda nyadi baka ke dikedekaka Jehovah. Nama kebuah? Kitai deka nemu mayuh agi ba pelajar nangkanka tu.

‘Petara ti ngaga mensia lelaki enggau indu kenyau ari pun kelia.’—Matthew 19:4