Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Saut Ngagai 10 Tanya Ari Bala Nembiak

 TANYA 1

Sapa Aku?

Sapa Aku?

KEBUAH IYA BEGUNA

Ngelala sapa diri empu sereta nemu utai ti dipechaya diri ulih nulung nuan ngaga pemutus ti manah lebuh nuan ditekan.

NAMA DEKA DIGAGA NUAN?

Uji gambarka: Karen baru kira-kira 10 minit ba parti kawan iya, lebuh iya ninga bunyi nyawa ti dikelala ari belakang iya.

“Nama kebuah nuan ta bediri dia aja?”

Karen malik lalu meda kawan iya, Jessica, ke megai dua igi botol ti baru dibuka. Iya nemu dalam botol nya ai bisa. Jessica mandangka sigi botol ba mua Karen, lalu ku iya, “Nuan ukai agi anak mit, enda salah ngirup mimit, enda pia?”

Karen ka enggai ngirup, tang Jessica nya kawan iya. Karen enggaika kawan iya ngumbai iya enda nyamai enggau begulai. Agi mega, Jessica nya nembiak indu ke manah. Lalu enti iya tau ngirup, tentu nya enda salah. Ku Karen bejaku dalam ati: ‘Nya semina utai ke diirup. Ukai nya makai dadah.’

Enti sema nuan nya Karen, nama deka digaga nuan?

BERUNDING DULU!!

Ngambika ulih ngaga pemutus ti manah ba pekara tu, nuan patut ngelala diri empu. Ngelala diri empu reti iya standard moral enggau utai ti dipechaya nuan. Enggau ngembuan penemu nya, nuan ulih ngatur pengidup diri empu ari ngelakka orang bukai ngatur pengidup nuan.—1 Korint 9:26, 27.

Baka ni nuan ulih ngemansangka diri ba pekara tu? Uji saut empat iti tanya pengudah tu.

 1 NAMA PEMANAH AKU?

Nemu penau sereta pemanah diri deka ngasuh nuan andalka diri

TELADAN BUP KUDUS: Rasul Paul nulis: “Aku nyangka nadai udah kala belajar lanchar bejaku, tang aku bisi penemu.” (2 Korint 11:6) Ketegal ngelala ayat Bup Kudus enggau manah, Paul ulih mengkang tegap lebuh orang bukai nguji iya. Iya enda ngelakka jaku sida ti enda manah ngelemika utai ti dipechaya iya.—2 Korint 10:10; 11:5.

PERESA DIRI EMPU: Tuliska siti pemandai tauka pengelandik ke dikembuan nuan di baruh tu.

Diatu terangka kualiti ti nyulut ke dikemisi nuan. (Ngambika chunto, kati nuan bisi pengibuh? gerah jari? tau dikearapka? nitihka jam?)

2 NAMA PENGELEMI AKU?

Baka tali rantai ti ulih jampat putus enti sambung iya enda rat, standard moral enggau utai ti dipechaya nuan deka nadai guna, enti nuan ngelakka pengelemi diri bekuasa atas pengidup nuan.

TELADAN BUP KUDUS: Paul nemu pengelemi diri. Iya nulis: ‘Laban dalam ati aku, aku endang rinduka adat Petara, tang aku meda dalam tubuh aku, adat bukai beperang ngelaban Adat ti dalam ati aku lalu nanchang aku ngena adat dosa.’—Rome 7:22, 23.

PERESA DIRI EMPU: Nama pengelemi ke patut diputarka nuan?

 3 NAMA JULUK ATI AKU?

Kati nuan deka nepan teksi, lalu ngasuh deriba teksi nya ngelingi siti bengunan nyentuk ke minyak kerita nya abis? Tu pengawa ti nadai guna sereta masau duit!

Utai ti ulih dipelajar? Juluk ati meri iring ba pengidup sereta nulung nuan nyeliahka diri ari pengidup ti nadai tuju. Nuan bisi utai bukai ke patut dikereja, lalu bisi chara deka ngereja iya.

TELADAN BUP KUDUS: Paul nulis: “Aku belanda terus ngagai adan.” (1 Korint 9:26) Paul enda nejuka utai bukai ngachau pengidup iya. Iya netapka juluk ati, lalu idup sejalai enggau juluk ati nya.—Pilipi 3:12-14.

PERESA DIRI EMPU: Tuliska tiga iti juluk ati ke deka dijapai nuan dalam timpuh setaun di baruh tu.

4 NAMA DIPECHAYA AKU?

Enti nuan keran ngetanka standard moral enggau utai ti dipechaya nuan, nuan baka pun kayu ti beurat ke ulih tan lebuh ribut ti besai datai mangka

Enti nadai utai ti dipechaya, nuan deka kakang ati. Baka seiku ukui bali, nuan deka “bebali chura” ngambika ulih sebaka enggau bala ke serambau enggau nuan. Tu nunjukka nuan nadai standard moral enggau utai ti dipechaya.

Tang, lebuh pengawa nuan nitihka utai ti dipechaya nuan, nuan ngetanka standard moral enggau utai ti dipechaya nuan, enda ngira utai ti dikereja orang bukai.

TELADAN BUP KUDUS: Lebuh agi beumur bebelas taun, nabi Daniel “mutuska runding” deka ngasika adat Petara, taja pan iya enda begulai enggau apai indai. (Daniel 1:8) Enggau ngereja tu, iya ngetanka standard moral enggau utai ti dipechaya iya. Daniel idup sejalai enggau utai ti dipechaya iya.

PERESA DIRI EMPU: Nama dipechaya nuan? Ngambika chunto: Kati nuan pechayaka Petara? Enti pechaya, nama kebuah? Nama nunjukka nuan pechaya Iya endang amat bisi?

Kati nuan pechaya standard moral Petara pulai ke pemanah nuan? Enti pechaya, nama kebuah?

Pengujung iya, ni bagi ke deka nuan—nyadi siti daun ke udah rarah ke ditiup angin kin kia tauka baka pun kayu ke tan dipangka kabut ti balat? Teguhka standard moral enggau utai ti dipechaya nuan, lalu nuan deka baka pun kayu nya. Lalu tu deka nulung nuan nyaut tanya, Sapa aku?