Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Saut Ngagai 10 Tanya Ari Bala Nembiak

 TANYA 9

Patut Aku Pechayaka Teori Evolusi?

Patut Aku Pechayaka Teori Evolusi?

KEBUAH IYA BEGUNA

Enti teori evolusi nya amat, pengidup nadai tuju ti meruan. Enti semua utai amat ditempa, kitai tau bulih saut ti ngemuaska ati ngagai tanya pasal pengidup sereta jemah ila.

NAMA DEKA DIGAGA NUAN?

Uji gambarka: Alex charut runding. Iya pechaya Petara endang amat bisi, sereta nempa semua utai. Tang seharitu, cikgu biologi iya enggau bebendar madahka teori evolusi nya betul. Teori tu bepelasarka pansik ari segi sains ke ulih dipechaya. Alex enggai dikumbai beli. Ku iya madah ngagai diri empu: ‘Tang enti bala saintis ulih nunjukka teori evolusi nya betul, sapa aku ke deka nyakal sida?’

Enti sema nuan nya Alex, kati nuan deka nerima teori evolusi ketegal bup teks ngumbai teori nya betul?

BERUNDING DULU!

Dua raban orang ke belaban penemu jampat madahka utai ti dipechaya sida. Tang, sida enda nemu kebuah sida pechayaka utai nya.

  • Sekeda orang pechaya semua utai ditempa laban sida udah diajar pasal utai nya ba gerija.

  • Sekeda orang pechayaka teori evolusi laban sida udah diajar pasal utai nya ba sekula.

 ENAM ITI TANYA KE PATUT DIPERATIKA

Bup Kudus madahka: ‘Semua rumah endang digaga orang, tang Petara ngaga semua utai.’ (Hebrew 3:4) Kati tu tau dipechaya?

Enti nuan ngumbai utai idup ke bisi ba dunya tu nadai Penempa, tu sama baka ngumbai rumah tu nadai orang ngaga

SEKEDA NGUMBAI: Semua utai ba dunya raya tu bisi ketegal siti letup ti besai.

1. Sapa tauka nama ke ngasuh letup ti besai nya nyadi?

2. Ni bagi ke ulih dipechaya—semua utai datai kediri empu tauka semua utai bisi Penempa?

SEKEDA NGUMBAI: Mensia datai ari jelu.

3. Enti mensia datai ari jelu, ngambika chunto, ari mayas—nama kebuah penau berunding entara mensia enggau mayas bisi bida ti besai?

4. Nama kebuah utai idup ti pemadu “mit” pan balat kompleks?

SEKEDA NGUMBAI: Teori evolusi endang betul.

5. Kati orang ke ngumbai baka tu udah mansik bukti nya kediri empu?

6. Ni pemayuh orang pechayaka teori evolusi ketegal sida udah ninga semua orang ke pandai pechayaka teori nya?

“Enti nuan bejalai ba kampung, lalu tetemuka sebuah rumah ti manah, kati nuan deka berunding: ‘Manah amat! Sekeda pun kayu tentu udah tumbang, lalu ngaga rumah tu.’ Tentu enda! Tu enda ulih dipechaya. Nya alai, nama kebuah kitai patut pechaya semua utai ba dunya raya semina tau bisi kediri empu aja?”—Julia.

“Uji gambarka, seiku orang madah ngagai nuan bisi letup ti besai nyadi ba sebuah kilang nyelak, lalu ink ensimbur ngagai dinding sereta siling, lalu ngaga sebuah bup kamus ti besai. Kati nuan pechayaka tu?”—Gwen.

 NAMA KEBUAH PECHAYAKA PETARA

Bup Kudus meransang nuan ngena “penalam runding.” (Jaku Dalam 3:21) Reti nya utai ti dipechaya nuan ba Petara ukai ketegal

  • ASAI ATI (Aku ngasaika bisi kuasa ke tinggi agi)

  • ORANG KE ENGGAU BEGULAI (Aku diau ba endur orang ke kering ba pengarap)

  • UTAI TI DIAJAR (Apai indai ngajar aku pechayaka Petara endang amat bisi. Aku enda ulih milih)

Tang, nuan patut bisi kebuah ti manah arapka utai ti dipechaya nuan.

“Lebuh aku mendingka utai ti dipadah cikgu pasal chara tubuh kitai bekereja, aku pechaya Petara endang amat bisi. Tiap iti perengka tubuh bisi guna iya empu, nyentuk ngagai perengka tubuh ti pemadu mit. Lalu lebuh semua perengka tubuh tu bekereja, kitai enda ulih ngasaika iya. Tubuh mensia endang ngalitka ati!”—Teresa.

“Lebuh aku meda bengunan ke tinggi, kapal raun, tauka kerita, aku nanya diri empu, ‘Sapa ngaga utai tu?’ Ngambika chunto, orang ke ngaga kerita tentu pintar laban mayuh perengka mit dalam kerita patut bekereja ngambika semua utai dalam kerita nya ulih idup. Lalu enti kerita bisi orang ngaga, pia mega enggau mensia.”—Richard.

“Bendar agi aku belajar pasal sains, kurang agi aku pechayaka toeri evolusi. . . . Ba aku, pechayaka teori evolusi begunaka mayuh agi “pengarap” ari pechayaka Penempa.”—Anthony.

PERUNDINGKA

Taja pan bepuluh taun udah ngaga pansik, bala saintis agi bedau bulih pemutus ti dikedekaka semua sida. Enti bala saintis ke pakar dalam teori evolusi enda setuju enggau teori nya, kati salah enti nuan nyakal teori evolusi nya?