Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 TANYA 8

Nama Patut Ditemu Aku Pasal Diserang Ngena Chara Seksual?

Nama Patut Ditemu Aku Pasal Diserang Ngena Chara Seksual?

KEBUAH IYA BEGUNA

Tiap taun bejuta iku orang dipasung tauka diserang ngena chara seksual. Kesuah agi, orang ke biak nyadi tagit.

NAMA DEKA DIGAGA NUAN?

Orang ke nyerang Annette ngempaska iya ke tanah sebedau iya nemu utai ke nyadi. Ku Annette madahka: “Aku enggau naka ulih nguji ngelaban iya. Aku nguji nyerauh, tang enda tepansutka nyawa. Aku ngeju, numpu, mukut sereta ngeramak. Lalu lebuh aku ngasaika kulit aku diachuk ngena pisau, aku nadai daya agi.”

Enti tu nyadi ba nuan, nama deka digaga nuan?

BERUNDING DULU!

Nuan engka bejimat lebuh bejalai maya malam hari. Tang utai ke enda manah agi ulih nyadi. Bup Kudus madahka: “Orang ke laju belanda di dunya tu enda selalu menang belumba, . . . orang ke nemu ngereja utai enda selalu niki pangkat, laban utai ti jai endang tau nyadi ba genap iku orang.”—Pengajar 9:11.

Baka Annette, sekeda orang ke biak diserang orang ke enda dikelala sida. Sida ke bukai diserang orang ke dikelala tauka orang ke sebilik enggau sida. Natalie, ke baru beumur sepuluh taun, diserang seiku nembiak ke beumur bebelas taun ke diau semak rumah iya, ngena chara seksual. Ku Natalie madahka: “Ketegal balat takut sereta malu, aku enda madah ngagai orang bukai.”

 UKAI SALAH NUAN

Annette agi nyalahka diri ketegal utai ke udah nyadi. Ku iya madahka: “Aku enda bebadu berundingka utai ke nyadi malam nya. Aku ngasaika diri patut bebendar agi ngelaban orang nya. Pengudah diachuk ngena pisau, aku balat takut. Aku enda ulih ngereja nama-nama utai agi, tang aku ngasaika diri patut terus ngelaban iya.”

Natalie mega napi asai ati ti salah. Ku iya madahka: “Aku enda patut jampat pechayaka orang. Apai indai udah nangkan aku enggau madi aku bemain begulai lebuh ba luar, tang aku enda mending. Nya alai aku ngasaika diri udah meri peluang ngagai orang ke diau semak rumah aku, ngemediska aku. Utai ke nyadi nya ngachau kami sebilik, lalu aku ngasaika diri betanggungjawap laban balat ngenusahka sida. Tu ke ngasuh aku balat merinsa.”

Enti nuan ngembuan asai ati ti sama enggau Annette tauka Natalie, kingatka, orang dipasung ukai ketegal iya ka. Sekeda orang enda ngumbai nya pekara ti besai. Bisi mega nyalahka mansa pasung. Tang nadai orang patut nyadi mansa pengawa ti amat jai tu. Enti nuan nyadi mansa, nya ukai salah nuan!

Tang nuan engka tusah deka pechaya, nya ukai salah nuan. Sekeda orang enggai madahka utai nya. Ketegal tu sida berasai besalah sereta enda lantang ati. Tang sapa ke untung enti nuan enda engkeretik, nuan tauka orang ke nyerang? Nya alai, nuan patut madahka utai nya. Tu manah ke nuan.

MADAH NGAGAI ORANG BUKAI

Bup Kudus madahka, lebuh Jop benung dituntung penusah, ku iya madahka: “Pendingka pemalat putap aku.” (Jop 10:1) Nuan ulih neladan Jop. Enti nuan madahka penanggul diri ngagai orang ke ulih dipechaya, tu ulih ngasuh nuan lantang sereta enda kelalu irau.

Asai ati nuan engka tusah deka ditapi nuan kediri. Padahka meh asai ati nuan nya ngagai orang bukai.

Annette ngasaika utai tu amat. Ku iya: “Aku bejaku enggau seiku kawan rapat, lalu iya ngansak aku bejaku enggau tuai gempuru ba gempuru aku. Aku berasai lantang ulih ngereja nya. Sida berandau enggau aku beberapa kali, lalu madahka nya ukai salah aku. Aku endang enda salah.”

Natalie madah ngagai apai indai iya pasal utai ke nyadi. Ku iya: “Seduai iya nulung sereta meransang aku. Lalu tu enda ngasuh aku kelalu tusah ati sereta pedis ati.”

Natalie mega bulih pengelantang ari sampi. Ku iya: “Bejaku enggau Petara nulung aku, kelebih agi lebuh maya aku enda berani madahka asai ati diri ngagai orang bukai. Lebuh besampi, aku ulih nyebut sebarang utai ti dikedekaka aku. Tu meri pengelantang enggau pemaik ba ati aku.”

Bup Kudus madahka, bisi “maya nyuman.” (Pengajar 3:3) Intu tubuh enggau asai ati diri empu. Belelak enggau chukup. Lalu kelebih agi, bepanggai ba Petara Jehovah ti pun semua pengelantang.—2 Korint 1:3, 4.

 KATI NUAN UDAH CHUKUP UMUR BEDATING

Enti nuan nya nembiak indu, lalu diansak ngereja ulah ti kamah, nuan patut nyebut enggau berani, “Anang ngereja nya!” tauka, “Anang megai aku!” Anang takut ditinggalka boyfriend nuan. Enti iya deka beserara enggau nuan ketegal pekara nya, iya enda patut nyadi boyfriend nuan! Nuan patut ngiga lelaki ke menyana, ke bebasaka tubuh sereta prinsip nuan.

KUIZ PASAL DIKACHAU NGENA CHARA SEKSUAL

“Ba sekula sekondari, bala nembiak lelaki ka amat narit tali baju dalam aku, lalu nyebut utai ke enda senunuh. Sida madahka, aku deka berasai lantang enti aku besetubuh enggau sida.”—Coretta.

Kati nuan ngumbai bala nembiak lelaki nya

  1. Nundi iya?

  2. Nguntik iya?

  3. Ngachau iya ngena chara seksual?

“Dalam bas, seiku nembiak lelaki berengkah nyebut utai ti kamah, lalu murus aku. Aku nempik, lalu ngiarka jari sereta muru iya. Iya merening aku baka ke aku tu orang gila.”—Candice.

Ba runding nuan, nama dikereja nembiak lelaki nya ba Candice?

  1. Nundi iya?

  2. Nguntik iya?

  3. Ngachau iya ngena chara seksual?

“Taun nyin kemari, seiku nembiak lelaki majak madahka diri deka ke aku. Lalu iya deka bedating enggau aku, taja pan aku seruran madahka diri enggai. Kekadang iya murus lengan aku. Aku madah anang, tang iya enggai mending. Udah nya, lebuh aku nanchang tali kasut aku, iya nempap burit aku.”—Bethany.

Ba runding nuan, nembiak lelaki tu:

  1. Nundi iya?

  2. Nguntik iya?

  3. Ngachau iya ngena chara seksual?

Saut ti betul ngagai semua tiga iti tanya nya C.

Nama ke ngasuh pengawa ngachau ngena chara seksual bebida ari nguntik tauka nundi?

Pengawa ngachau ngena chara seksual semina dikereja siti piak aja. Pengawa tu majak nyadi taja pan mansa udah ngasuh orang nya badu ngereja pengawa nya.

Pengawa ngachau ngena chara seksual ukai utai ti mit. Iya ulih ngujungka jenayah seksual.