Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Saut Ngagai 10 Tanya Ari Bala Nembiak

 TANYA 5

Baka Ni Enti Aku Dikachau ba Sekula?

Baka Ni Enti Aku Dikachau ba Sekula?

KEBUAH IYA BEGUNA

Chara nuan nerima iya ulih ngemanahka tauka ngenusahka gaya utai.

NAMA DEKA DIGAGA NUAN?

Uji gambarka: Thomas enggai ke sekula seharitu, pagila tauka belama iya. Laban tiga bulan ti udah, orang ke sama sekula enggau iya betusuika cherita ngapa pasal iya, sereta meri iya mayuh macham nama kangau. Kekadang orang sengaja ngelabuhka bup ari jari iya, lalu ngumbai nya enda sengaja, tauka seiku ari mayuh orang ke bisi ba belakang iya ngejuka iya, lalu lebuh Thomas nguing ke belakang, iya enda nemu bagi orang ke ngejuka iya. Kemari, Thomas balat agi dikachau laban iya diemba nengah online . . .

Enti sema nuan nya Thomas, nama deka digaga nuan?

BERUNDING DULU!

Anang lemi semengat! Nuan ulih ngalahka orang ke ngachau. Baka ni?

  •   ANANG KIRUH. Bup Kudus madahka: “Orang ke beli ngayanka pengeringat diri di mua orang mayuh, tang orang ke mereti, nemu liat ati lalu nagang diri ringat.” (Jaku Dalam 29:11) Enti nuan enda bedulika orang nya, iya pan enggai agi ngachau nuan.

  • ANANG MALAS. Bup Kudus madahka: “Anang malas penyai ngena penyai.” (Rome 12:17) Malas penyai semina nambahka penusah diri.

  • ANANG NGIGA PENUSAH. Bup Kudus madahka: “Orang ke nemu berunding deka meda penusah datai, lalu belalai.” (Jaku Dalam 22:3) Enggau naka ulih nyeliahka orang ke deka ngachau sereta nyeliahka utai ti ulih ngasuh orang ngachau kitai.

  • NGUJI NGENA CHARA KE ENDA DISADANG. Bup Kudus madahka: “Saut ti nelap ngasuh orang badu agi ringat.” (Jaku Dalam 15:1) Nuan ulih ngena jaku gagai. Ngambika chunto, enti orang ke ngachau madahka nuan gemu, nuan ulih nyaut, “Enda ngawa, ila aku muai dua tiga kilo!”

  • MUPUK AJA. Nora ke beumur 19 taun madahka: “Enda nyaut nunjukka nuan nemu berunding sereta kering agi ari orang ke ngachau nuan. Nya nunjukka nuan ulih nagang diri—utai ke nadai ba orang ke ngachau nuan.”—2 Timoti 2:24

  • ENGGAU NAKA ULIH PECHAYAKA DIRI EMPU. Orang ke ngachau nemu bagi orang ke bisi runding ti enda manah pasal diri empu, sereta orang ke enda malas lebuh dikachau. Tang, enti nuan pechayaka diri empu, orang nya deka badu ngachau nuan.

  • MADAH NGAGAI ORANG BUKAI. Seiku orang ke kala nyadi cikgu madahka: “Orang ke kena kachau patut madahka diri bisi dikachau. Nya utai ti patut dikereja, laban nya ulih nagang orang bukai ari dikachau.”

Pechayaka diri empu ulih meri nuan pengering, lalu utai tu nadai ba orang ke ngachau