Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Saut Ngagai 10 Tanya Ari Bala Nembiak

 TANYA 3

Baka Ni Aku Patut Bejaku Enggau Apai Indai?

Baka Ni Aku Patut Bejaku Enggau Apai Indai?

KEBUAH IYA BEGUNA

Enti nuan begulai manah enggau apai indai, pengidup nuan deka lantang agi.

NAMA DEKA DIGAGA NUAN?

Uji gambarka: Maya nya, lemai Hari Tiga. Geoff ke beumur 17 taun, baru udah tembu ngereja pengawa iya ba rumah, lalu iya deka belelak! Iya masang TV, lalu nudukka diri ba kerusi ti dikerinduka iya.

Maya nya, apai iya datai. Iya enda senang ati.

“Geoffrey! Nuan patut nulung madi nuan ngaga kereja sekula iya. Nama kebuah nuan masau jam meda TV? Nuan enda kala ngereja utai ti diasuh!”

“Nya iya,” ku Geoff mutap, lalu ulih didinga apai iya.

Apai iya mansang semak. “Nama ku nuan?”

“Nadai,” ku Geoff nyaut enggau bedemuh.

Diatu apai iya balat pedis ati. “Anang munyi nya bejaku enggau aku!” ku iya.

Enti sema nuan nya Geoff, baka ni nuan ulih nagang utai tu ari nyadi?

BERUNDING DULU!

Bejaku enggau apai indai ulih disamaka baka deriba kerita. Enti jalai bisi kena empang, nuan ulih ngiga jalai bukai.

 NGAMBIKA CHUNTO:

Ku seiku nembiak indu ke benama Leah madahka, “Aku ngasaika diri tusah deka bejaku enggau apai aku. Lebuh aku benung madahka utai ngagai iya, iya nanya aku, ‘Mang, nuan benung bejaku enggau aku?’”

LEAH BISI TIGA ITI CHARA.

  1. Merak apai iya.

    Leah merak, “Apai, dinga dulu utai ku aku!”

  2. Enggai agi bejaku enggau apai iya.

    Leah enggai agi madahka penanggul diri ngagai apai iya.

  3. Ngiga awak ke manah alai bejaku baru.

    Leah betunga mua bejaku enggau apai iya, tauka nulis surat pasal penanggul diri ngagai apai iya.

Ni bagi chara ke deka diasuh nuan kena Leah?

PERATIKA: Apai Leah benung kisuk, nya alai iya enda nemu Leah benung tusah ati. Enti Leah milih Chara A, apai Leah engka enda nemu kebuah iya diperak. Chara tu engka enda ngasuh apai Leah ninga utai ti dipadah Leah, lalu chara tu enda nunjukka basa ngagai apai iya. (Epesus 6:2) Amat, chara tu nadai mai penguntung ke sapa-sapa.

Sama baka nuan enda ngelakka jalai ke diempang nya ngujungka pejalai nuan, nuan ulih ngiga chara bukai ngambika ulih bejaku enggau apai indai

Chara B engka chara ti pemadu senang, tang nya ukai chara ti pemadu manah. Nama kebuah? Enti Leah deka mutarka penanggul, iya patut bejaku enggau apai iya. Lalu ngambika apai iya ulih nulung, apai iya patut nemu penanggul iya. Enda bejaku nadai mai penguntung.

Ngena Chara C, Leah enda ngelakka jalai iya diempang. Tang iya nguji berandauka penanggul iya ba maya bukai. Lalu enti nulis surat ulih ngasuh Leah lantang ati, iya tau nulis surat ngagai apai iya.

Nulis surat mega ulih nulung Leah madahka utai ti deka dipadah iya enggau nyemetak. Lebuh apai Leah macha surat nya, iya ulih nemu utai ti deka dipadah Leah ngagai iya. Tu ulih nulung apai iya nemu penanggul ke ditapi Leah enggau manah agi. Nya alai, Chara 3 mai penguntung ngagai Leah enggau apai iya. Sekalika betunga mua tauka ngena surat, chara tu sejalai enggau ajar Bup Kudus ke ngasuh “ngereja utai ti mai pemaik.”—Rome 14:19.

Nama chara bukai ke ulih dikena Leah?

Uji pikirka siti chara. Udah nya pikirka asil iya.

 ANANG NGENA JAKU TI BEBELIT

Kingatka, utai ti disebut nuan enggau utai ti dirunding apai indai enda selalu sama.

NGAMBIKA CHUNTO:

Apai indai engka nanya kebuah nuan ringat. Nuan madahka, “Aku enggai bejaku pasal tu.”

Tang ba runding apai indai nuan: “Aku enda entu arapka seduai. Aku ka bejaku pasal penanggul aku enggau bala kawan tang ukai enggau seduai.”

Uji gambarka, nuan benung napi penanggul lalu apai tauka indai nuan deka nulung nuan. Tang enti nuan madahka: “Anang irau. Ulih aku mutarka penanggul nya kediri.”

  • Nama engka dirunding apai indai nuan?

  • Baka ni nuan ulih nyaut sida enggau manah?