Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Saut Ngagai 10 Tanya Ari Bala Nembiak

 TANYA 7

Baka Ni Aku Ulih Nyeliahka Diri Ari Dibai Besetubuh?

Baka Ni Aku Ulih Nyeliahka Diri Ari Dibai Besetubuh?

KEBUAH IYA BEGUNA

Pemutus nuan pasal seks bekaul enggau pengidup nuan dudi hari.

NAMA DEKA DIGAGA NUAN?

Uji gambarka: Heather udah dua bulan bedating enggau Mike. Tang iya ngasaika diri baka ke udah lama ngelala Mike. Seduai iya suah ngirumka SMS ngagai pangan diri, berandau bejam-jam ba telefon, sereta nemu utai ti dirundingka pangan diri! Tang diatu, Mike dekaka seduai iya rapat agi enggau pangan diri.

Ngelama tu, Mike enggau Heather semina bepegai jari sereta besium kuyu. Heather enggai ngereja lebih agi ari nya. Tang iya mega enggai ditinggalka Mike. Semina Mike aja ke ngasuh iya ngasaika diri bajik sereta berega. Ku iya bejaku dalam ati, “Agi mega kami duai sayauka pangan diri . . .’

Enti nuan ngasaika diri udah chukup umur bedating, lalu napi utai ti sama baka Heather, nama deka digaga nuan?

BERUNDING DULU!

Pengawa besetubuh nya pemeri ari Petara ngagai orang ke udah kawin aja. Orang ngena pemeri nya enggau chara ti salah enti besetubuh sebedau kawin. Tu sama baka ngelap utai ngena gari manah ke diberi orang ngagai nuan

Enti nuan ngelanggar ukum fizik, baka engkechit ari pun kayu, lalu nguji terebai baka burung, nuan tentu deka balat tusah. Pia mega, nuan deka balat tusah enti nuan ngelanggar ukum moral: “Badu agi bambai.”—1 Tesalonika 4:3.

Nama penyadi enti enda ngasika pesan nya? Bup Kudus madahka: “Orang ke ngereja ulah ti kamah, bedosa ngelaban tubuh diri empu.” (1 Korint 6:18) Kati nya amat?

 Pansik nunjukka, mayuh nembiak ke besetubuh sebedau kawin napi siti tauka lebih ari utai ti di baruh tu.

  • NESAL ATI. Mayuh nembiak ke besetubuh sebedau kawin madahka sida nesal ati ke pengawa nya.

  • ASAI ATI TI ENDA ARAP. Pengudah besetubuh, seduai iya engka berunding, ‘Sapa agi ke kala besetubuh enggau iya?’.

  • KECHEWA. Dalam ati, mayuh nembiak indu deka agi ke orang ti ulih nyaga sida, ukai ngambi ulih ba sida. Lalu mayuh nembiak lelaki ngasaika diri enda entu tetarit ati ngagai nembiak indu ke alah diumbuk sida.

  • Kingatka. Enti nuan besetubuh sebedau kawin, nuan enda bebasaka diri enggau ngelengkaka utai ti berega. (Rome 1:24) Tubuh nuan kelalu berega enti diserah pia aja!

Tunjukka nuan bisi pengering kena nyeliahka pengawa “bambai.” (1 Tesalonika 4:3) Pengudah nuan kawin dudi hari ila, nya baru nuan ulih besetubuh. Lalu nuan deka berasai lantang ati. Maya nya nuan enda agi berasai irau, nesal ati tauka kechewa enti dibandingka enggau orang ke besetubuh sebedau kawin.—Jaku Dalam 7:22, 23; 1 Korint 7:3.

 NAMA RUNDING NUAN?

  • Kati orang ke amat sayauka nuan deka ngemediska tubuh sereta asai ati nuan?

  • Kati orang ke amat ibuhka nuan deka ngasuh nuan ngereja utai ti ulih ngerusak kaul nuan enggau Petara?—Hebrew 13:4.