Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

‘Meruan Dalam Pengerindu Petara’

 PELAJAR 3

Rinduka Sida ti Dikerinduka Petara

Rinduka Sida ti Dikerinduka Petara

“Enti nuan begulai enggau orang ke bepenemu-dalam, nuan deka nyadi orang ke bepenemu-dalam.”JAKU DALAM 13:20.

1-3. (a) Nama dipadah Bup Kudus pasal orang ke enggau kitai begulai? (b) Baka ni kitai milih orang ke enggau begulai ngambika kitai nyadi menyana?

ORANG ulih disempamaka baka kapas. Kapas senang nginsap ai. Baka nya mega, orang senang nitihka ulah, chara berunding enggau pendiau orang ke begulai rapat enggau sida.

2 Bup Kudus pan bisi madah pasal pekara tu: “Enti nuan begulai enggau orang ke bepenemu-dalam, nuan deka nyadi orang ke bepenemu-dalam baka sida. Enti nuan bepangan enggau orang ke beli, nuan deka rusak.” (Jaku Dalam 13:20) Kati nuan setuju kitai senang nitihka ulah orang ke begulai enggau kitai? Ya, laban kitai saum pengasai ati enggau orang ke begulai enggau kitai, nya alai sida ulih ngubah kitai nyadi manah tauka jai.

3 Ngambika meruan dalam pengerindu Petara, kitai patut begulai enggau orang ke ulih ngubah kitai nyadi menyana. Baka ni chara iya? Kitai ulih ngereja nya enggau rinduka sida ti dikerinduka Petara, lalu begulai rapat enggau sida. Pikirka, sapa orang ke bisi pemanah baka pangan Jehovah? Aram kitai meratika  sapa orang ke dikerinduka Petara. Enti kitai nitihka penemu Jehovah, kitai ulih milih orang ke manah enggau begulai.

SIDA TI DIKERINDUKA PETARA

4. Nama kebuah Jehovah bisi hak milih orang ke nyadi pangan Iya, lalu nama kebuah Jehovah ngumbai Abraham “pangan Aku”?

4 Jehovah milih orang ke nyadi pangan Iya. Kati Iya bisi hak milih? Iya Pemerintah ti Pemadu Tinggi ba dunya, lalu nyadi pangan Iya nya peluang ti pemadu manah. Sapa orang ti dipilih Iya nyadika pangan? Jehovah semak ngagai sida ti pechaya sereta manggaika pengarap ba Iya. Chunto, Abraham dikelala ketegal pengarap iya ti nyulut. Nadai pengarap ti pemadu besai agi ari apai ti sanggup nyerahka anak diri nyadika pemeri ngagai Petara. * Tang laban bisi pengarap ti besai, ‘Abraham ngira Petara ulih ngangkatka orang ari mati,’ nya alai iya sanggup “nyerahka anak iya Isak.” (Hebrew 11:17-19) Ketegal Abraham bisi pengarap sereta ngayanka diri ngasi, Jehovah ngumbai iya “pangan Aku.”—Isaiah 41:8; James 2:21-23.

5. Baka ni Jehovah meda sida ke tetap ati ngasika Iya?

5 Jehovah deka kitai tetap ati sereta ngasika Iya. Iya rinduka orang ke tetap ati ngagai Iya lebih agi ari utai bukai. (Bacha 2 Samuel 22:26.) Baka ke udah dipelajar ba Pelajar 1 bup tu, Jehovah gaga ati enti orang ngasika Iya ari ati. Jaku Dalam 3:32 madahka: “Iya  ngaga orang ke lurus nyadika pangan Iya.” Sida ke nitih peneka Jehovah enggau tetap ati deka nerima kangau ari Iya: Sida ulih tama ngagai “Rumah Sembiang” Iya. Dia sida ulih nyembah sereta besampi ngagai Iya.—Masmur 15:1-5.

6. Baka ni kitai ngayanka pengerindu ngagai Jesus, lalu baka ni asai ati Jehovah ngagai orang ke rinduka Anak Iya?

6 Jehovah rinduka sida ti rinduka Jesus. Ku Jesus: ‘Orang ke rinduka aku deka ngasika pesan aku, lalu Apai aku deka rinduka iya, lalu kami duai Apai deka datai ngagai iya, lalu diau enggau iya.’ (John 14:23) Baka ni kitai ngayanka pengerindu ngagai Jesus? Enggau ngasika semua pesan Jesus, nyengkaum ngerembaika berita manah sereta nyadika orang murid iya. (Matthew 28:19, 20; John 14:15, 21) Kitai mega nunjukka diri rinduka Jesus enti kitai ‘nitihka singkang iya,’ iya nya neladan jaku sereta pengawa Jesus enggau naka ulih kitai. (1 Peter 2:21) Jehovah gaga ati meda sida ke rinduka Jesus bebendar nitihka teladan Anak Iya.

7. Nama kebuah nya manah enti kitai begulai rapat enggau pangan Jehovah?

7 Pengarap, tetap ati, ngasi sereta rinduka Jesus enggau chara pengidup iya, nya sekeda ari pemanah ti dikedeka Jehovah ba pangan Iya. Genap iku kitai patut nanya diri empu: ‘Kati pemanah enggau chara pengidup Jesus bisi ba orang ke begulai rapat enggau aku? Kati aku begulai rapat enggau pangan Jehovah?’ Endang sigi manah enti begulai rapat enggau pangan Jehovah. Orang ke terus neladan Petara sereta ngerembaika berita manah pasal Perintah Iya enggau ransing ati, ulih nguntungka kitai.  Sida ulih ngubah kitai ngambika keran deka ngerinduka ati Petara.—Peda kutak “ Sapa Begulai Rapat Enggau Nuan?

BELAJAR ARI TELADAN BA BUP KUDUS

8. Nama utai ti ngerinduka ati nuan pasal kaul entara (a) Naomi enggau Rut? (b) tiga iku nembiak Hebrew? (c) Paul enggau Timoti?

8 Bup Kudus ngembuan mayuh teladan pasal orang ke bulih penguntung ketegal begulai enggau orang ke menyana. Nuan ulih macha pasal kaul entara Naomi enggau menantu iya Rut, entara tiga iku nembiak Hebrew ke bisi kaul ti rapat ba Babilon, sereta kaul entara Paul enggau Timoti. (Rut 1:16; Daniel 3:17, 18; 1 Korint 4:17; Pilipi 2:20-22) Aram kitai meda siti chunto ti nyulut: kaul entara David enggau Jonatan.

9, 10. Nama kebuah David enggau Jonatan bisi kaul ti manah?

9 Bup Kudus madah pengudah David munuh Goliat, “Jonatan balat amat tetarit ati ngagai David, lalu belabuh rinduka iya baka ke rinduka diri empu.” (1 Samuel 18:1) Tu ngepunka kaul entara seduai iya, taja pan umur seduai iya jauh bida. Seduai iya tetap begulai manah nyentuk ke Jonatan mati maya beperang. * (2 Samuel 1:26) Nama kebuah seduai iya bisi kaul ti rapat enggau pangan diri?

10 David enggau Jonatan bisi kaul ti manah laban seduai iya bela rinduka Petara, lalu deka meruan  tetap ati ngagai Iya. Seduai iya sama ngayanka pemanah ti ngerinduka ati pangan diri. Jonatan tetarit ati meda pemerani enggau pengeransing David ngenanka nama Jehovah. David bebasaka Jonatan laban iya nyukung atur Jehovah, lalu iya berundingka David lebih ari iya empu. Chunto, peratika nama penyadi maya David balat tusah ngerarika diri ari Raja Saul ke jai, ngagai menua puang. Raja Saul nya apai Jonatan. Jonatan nunjukka diri tetap ati maya iya ‘betemu enggau David . . . iya meransang David lebuh David madahka ngagai iya pasal Petara.’ (1 Samuel 23:16) Pikirka baka ni asai ati David maya Jonatan datai meri sukung enggau peransang ngagai iya! *

11. Nama ulih dipelajarka nuan ari kaul entara Jonatan enggau David?

11 Nama ulih dipelajarka kitai ari chunto Jonatan enggau David? Utai ti pemadu beguna, iya nya bisi kaul ti manah enggau Petara. Enti kitai semak enggau sida ke nyembah Jehovah, tetap ati ngagai Iya, sereta bisi ulah ti manah, dia kitai ulih bekunsi penemu, asai ati, sereta utai ti udah nyadi ba pengidup ke ulih meransang kitai. (Bacha Rome 1:11, 12.) Kitai ulih tetemuka sida ti meruan tetap ati ngagai Petara entara bala ke sama pengarap. Kati semua orang ke datai gempuru ba Palan Gempuru nya manah enggau begulai magang? Enda.

 MILIH ORANG ENGGAU BEGULAI RAPAT

12, 13. (a) Nama kebuah kitai patut milih orang ke enggau begulai, indah ba entara orang ti sama pengarap? (b) Nama penusah ba orang Kristian keterubah ke ngasuh Paul meri jaku tangkan?

12 Indah ba entara orang ti sama pengarap, kitai patut milih sapa orang ti tau enggau begulai ngambika  pengarap kitai dikemansang. Patut tu ngasuh kitai tekenyit? Enda. Sekeda ari menyadi Kristian engka ngambi timpuh ti lama kena mansang ba pengarap, baka sekeda buah ngambi timpuh ti lama endur mansau. Nya alai, ba tiap iti endur gempuru, kitai meda sida enda sama pemansang ba pengarap. (Hebrew 5:12–6:3) Endang amat, kitai patut sabar enggau rinduka sida ti baru tauka lemi ba pengarap, laban kitai deka sida mansang dalam pengarap.—Rome 14:1; 15:1.

13 Kekadang, kitai patut nyaga kaul kitai enggau orang ti sama pengarap. Sekeda ari sida engka bisi ulah ti enda manah. Sekeda engka ringat tauka udu  sebana. Orang Kristian kurun keterubah pan napi penusah ti sama. Taja pan mayuh ari sida iya tetap ati, tang bisi mega ari sida ngembuan ulah ti enda manah. Ketegal sekeda orang Kristian ba Korint enda bepegai teguh ba ajar Kristian, rasul Paul nangkan sida: ‘Anang nejuka orang nipu kita: “Orang ke jai ngerusak moral ti menyana.”’ (1 Korint 15:12, 33) Paul ngingatka Timoti, indah ba entara orang Kristian pan bisi sida ke ngembuan ulah ti enda manah. Timoti enda diasuh begulai rapat enggau orang ke baka nya.—Bacha 2 Timoti 2:20-22.

14. Baka ni kitai ulih nitihka ajar ari jaku tangkan ke diberi Paul pasal orang ke enggau begulai?

14 Baka ni kitai ulih nitihka ajar ari jaku tangkan ke diberi Paul? Enggau nyeliahka diri ari begulai enggau orang ke ngasuh kitai lemi ba pengarap, enda ngira sida iya Saksi-Saksi Jehovah tauka ukai. (2 Tesalonika 3:6, 7, 14) Kitai patut nyaga kaul kitai enggau Jehovah. Kingatka, baka kapas ke nginsap ai, pia mega kitai senang nitihka ulah enggau chara pengidup orang ke begulai rapat enggau kitai. Chunto, enti kitai nyepuhka kapas ke dalam ai kamah, kitai enda ulih ngarapka kapas nya nginsap ai ti beresi. Pia mega, enti kitai begulai rapat enggau orang ke ulih ngasuh kitai lemi ba pengarap, kitai enda bulih penguntung.—1 Korint 5:6.

Nuan ulih ngiga orang ke manah enggau begulai ba entara orang ke sama pengarap

15. Nama patut digaga nuan ngambika ulih begulai enggau orang ke tetap ati ngagai Petara?

15 Kitai gaga ati laban agi ulih ngiga orang ti manah enggau begulai ba entara orang ti sama pengarap. (Masmur 133:1) Baka ni nuan ulih ngiga orang ke meruan tetap ati ngagai Petara? Enti nuan terus  neladan Jehovah enggau nitihka chara pengidup ti dikedeka Iya, orang ke bisi pemanah ti sama mega deka semak enggau nuan. Lalu nuan mega patut nguji ngiga chara ngambika ulih begulai enggau sida. (Peda kutak “ Baka ni Kitai Bulih Kaul ti Manah.”) Giga sida ti ngayanka pemanah ti deka diayanka nuan. Titihka ajar Bup Kudus ti ngasuh kitai rinduka pangan diri enda ngira bansa, menua tauka chara pengidup. (2 Korint 6:13; bacha 1 Peter 2:17.) Anang semina begulai enggau orang ke serebak enggau nuan aja. Kingatka, Jonatan jauh tuai ari David. Sida ke tuai tu mayuh penemu sereta ulih bekunsi utai ti udah nyadi ba pengidup. Tu meri penguntung ngagai nuan enti begulai enggau sida.

LEBUH PENANGGUL NUNTUNG

16, 17. Enti orang ke sama pengarap ngemediska ati kitai, nama kebuah kitai enda patut nyurutka diri ari gerempung Jehovah?

16 Penanggul ulih nyadi ketegal orang ke sama pengarap enggau nuan bisi mayuh macham ulah enggau chara pengidup. Orang ke sama pengarap engka nyebut tauka ngereja utai ti ngemediska ati kitai. (Jaku Dalam 12:18) Kekadang penanggul nyadi ketegal ulah ti enda sama, salah sangka tauka enda sepenemu. Patut kitai enda nyamai ati ketegal penanggul tu, lalu ngenyauhka diri ari bala ti sama pengarap? Enda, enti kitai amat rinduka Jehovah enggau sida ti dikerinduka Iya.

17 Jehovah patut nerima pengerindu enggau sembah ti pengabis ati ari kitai, laban Iya ngaga semua  utai. (Pemandang 4:11) Nambahka nya, gerempung ti dikena Iya begunaka sukung ari kitai. (Hebrew 13:17) Nya alai, enti orang ke sama pengarap ngemediska ati tauka ngasuh kitai enda nyamai ati, patut kitai nyurutka diri ari gerempung Jehovah kena nunjukka diri enda puas ati? Enda, laban ukai Jehovah ti ngemediska ati kitai. Kitai enda patut ninggalka Jehovah enggau nembiak Iya enti kitai rinduka Iya!—Bacha Masmur 119:165.

18. (a) Nama patut digaga kitai ngambika nyaga pemaik enggau bala sama pengarap? (b) Nama berekat enti kitai ngampunka orang ti ngemediska ati kitai?

18 Pengerindu ngagai bala sama pengarap meransang kitai ngambika ulih begulai manah enggau  pangan diri. Jehovah enda ngarapka kitai sempurna, lalu baka nya mega enggau kitai. Pengerindu nulung kitai enda ibuhka penyalah ti mit, laban kitai nemu semua kitai enda sempurna, lalu bisi ngereja penyalah. (Jaku Dalam 17:9; 1 Peter 4:8) Pengerindu nulung kitai terus “ngampun pangan diri.” (Kolosi 3:13) Kekadang enda senang nitihka ajar tu. Kitai engka mengkang pedis ati enti kitai nejuka pikir ti enda manah. Kitai ngumbai nya chara kitai deka bejera orang ti ngemediska ati kitai. Tang ke amat, enti kitai mengkang ringat, tu ulih ngenusahka kitai. Ngampunka orang ti ngemediska ati kitai ulih mai mayuh berekat. (Luke 17:3, 4) Tu meri pengelantang ba ati enggau runding kitai, nyaga pemaik enggau bala sama pengarap, lalu kelebih agi nyaga kaul kitai enggau Jehovah.—Matthew 6:14, 15; Rome 14:19.

NI MAYA MUTUSKA KAUL

19. Ni maya kitai badu begulai enggau orang ke kala sama pengarap?

19 Bisi maya kitai enda diasuh begulai enggau orang ke kala sama pengarap enggau kitai. Tu nyadi enti sida agi ngulang penyalah ti ngelanggar ukum Petara, tauka agi nitihka ajar pengarap pelesu, sereta madahka diri enggai agi nyadi Saksi-Saksi Jehovah. Bup Kudus ngasuh kitai badu “begulai” enggau sida. * (Bacha 1 Korint 5:11-13; 2 John 9-11) Tu engka tusah enti orang nya diri sebilik, tauka kala begulai rapat enggau kitai. Tang, kitai patut ngayanka diri  tetap ati ngagai Jehovah enggau ukum Iya lebih agi ari semua utai. Kingatka, tetap ati enggau ngasika Jehovah patut dikemeratka kitai.

20, 21. (a) Nama kebuah muai orang ke enda nesal ati ari gerempung Jehovah nunjukka pengerindu Iya? (b) Nama kebuah kitai patut pandai milih orang ke enggau begulai?

20 Jehovah udah ngatur bala tuai gempuru muai orang ke enda nesal ati ke penyalah diri. Tu nunjukka Jehovah rinduka kitai, lalu meri kitai peluang ngayanka pengerindu ngagai Iya. Nama kebuah? Siti kebuah muai orang ke enda nesal ati laban kitai ngayanka pengerindu ngagai nama Jehovah ti kudus sereta bebasaka ukum Iya. (1 Peter 1:15, 16) Tu nyaga pengelikun gerempung Jehovah. Sida ke tetap ati ulih dijaga ari orang ke tau ngasuh pengarap sida lemi, ngambika sida terus nyembah Petara ba gerempung Iya, laban nya endur ti selamat ba dunya ti jai tu. (1 Korint 5:7; Hebrew 12:15, 16) Lebuh Jehovah ngajar orang ke enda nesal ati ngena chara nya, Iya nunjukka diri rinduka orang nya. Jehovah nemu chara nya ulih nulung sida nemu penyalah diri, lalu nitihka chara ti patut ngambika ulih pulai baru ngagai Iya.—Hebrew 12:11.

21 Endang amat, orang ke enggau begulai rapat ulih ngubah kitai. Nya alai, kitai patut pandai milih orang ke enggau begulai. Enti kitai milih pangan Jehovah enggau begulai sereta rinduka orang ti dikerinduka Iya, kitai deka dikelingi orang ke pemadu manah enggau begulai. Sida ulih nulung kitai mengkang ngerinduka ati Jehovah.

^ per. 4 Enggau ngasuh Abraham ngereja tu, Jehovah ngambarka Iya empu deka nyerahka anak tunggal Iya nyadika genselan. (John 3:16) Tang, Jehovah nagang Abraham nyerahka Isak nyadi pemeri, lalu nganti iya ngena bedus.—Pemungkal 22:1, 2, 9-13.

^ per. 9 David “agi biak” maya iya munuh Goliat, lalu iya beumur kira-kira 30 taun maya Jonatan mati. (1 Samuel 17:33; 31:2; 2 Samuel 5:4) Jonatan beumur kira-kira 60 taun maya iya mati. Reti nya, Jonatan 30 taun tuai ari David.

^ per. 10 Ba 1 Samuel 23:17, Jonatan madah empat iti pekara kena meransang David: (1) Iya enda ngasuh David takut. (2) Iya madah Saul enda ulih ngemediska David. (3) Iya ngingatka David deka nyadi raja baka ke udah disemaya Petara. (4) Iya besemaya deka nyadi lumur dua pengudah David.

^ per. 19 Kena nemu mayuh agi baka ni chara kitai nyaga kaul enggau orang ke dibuai ari gerempung tauka enggai agi nyadi Saksi-Saksi Jehovah, peda Penerang “Chara Nyaga Kaul Enggau Orang ke Dibuai Ari Gerempung.”