Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

‘Meruan Dalam Pengerindu Petara’

 PELAJAR 9

“Seliahka Ulah ti Kamah”

“Seliahka Ulah ti Kamah”

“Nya alai bunuh semua pengingin dunya ti dalam kita, baka: pengawa bambai, ulah ti kamah, runding ti kamah, pengingin ti jai, enggau pengamu (reti nya nyembah engkeramba).”—KOLOSI 3:5.

1, 2. Baka ni Balaam ngumpan nembiak Jehovah?

SEIKU orang nurun nginti ngagai endur ti dikerindu iya. Iya bisi berundingka bansa ikan ti deka diginti, lalu milih umpan ke deka dikena. Enda lama pengudah nikauka tali ginti ke ai, ginti iya ngentun, lalu iya bulih ikan. Iya tuchum laban udah ngena umpan ti betul.

2 Kira-kira 3,500 taun ti udah, seiku lelaki ke benama Balaam benung berundingka umpan ti deka dikena iya ngelimpangka nembiak Petara. Orang Israel benung bepalan ba Emperan Menua Moap, ba entara Menua ti Disemaya. Balaam ngaku diri nyadi nabi Jehovah, tang ke amat, iya orang ti amu ke diupah nyumpah orang Israel.[1] Tang ketegal Jehovah masuk champur, Balaam nyau merekat orang Israel. Ketegal deka bulih upah, Balaam berunding enti iya ulih ngasuh orang Israel bedosa, iya nemu Petara deka nyumpah nembiak Iya empu. Nya alai, Balaam nyediaka umpan—indu Moap ke biak sereta bajik.—Penyampau 22:1-7; 31:15, 16; Pemandang 2:14.

3. Kati pelan Balaam mujur, lalu nama kebuah?

3 Kati pelan Balaam mujur? Ya. Bepuluh ribu iku lelaki orang Israel kena umpan “beleman enggau indu bansa Moap.” Sida belabuh nyembah petara orang Moap, nyengkaum petara kamah ke dikumbai Baal  di Peor, ke disembah sida enggau pengawa besetubuh. Ketegal tu, 24,000 orang Israel dibunuh ba entara Menua ti Disemaya. Naka meh pemalat penusah tu!—Penyampau 25:1-9.

4. Nama kebuah beribu iku orang Israel ngereja ulah ti kamah?

4 Nama ngasuh penusah tu nyadi? Mayuh ari orang Israel bisi ati ti jai lalu ninggalka Jehovah, ke udah ngelepaska sida iya ari Ejip, meri sida pemakai maya sida ba menua puang sereta ngiring sida ngagai menua ti disemaya enggau selamat. (Hebrew 3:12) Pasal pekara tu, rasul Paul nulis: “Kitai enda tau ngereja pengawa ti kamah, baka sekeda sida, lalu dua puluh tiga ribu iku sida mati dalam sehari.” *1 Korint 10:8.

5, 6. Kemaya hari tu, nama ulih dipelajarka kitai ari penyalah orang Israel ba Emperan Menua Moap?

5 Cherita ba bup Penyampau ngembuan mayuh ajar ti beguna ngagai nembiak Petara kemaya hari tu, ke deka tama ngagai menua ti disemaya ke besai agi. (1 Korint 10:11) Chunto, dunya ti gila seks kemaya hari tu ngambarka orang Moap menya. Tang kemaya hari tu,  iya nyadi ba serata dunya. Kelebih agi, ninting taun beribu iku orang Kristian ngereja ulah ti kamah—utai ti sama dikena ngumpan orang Israel. (2 Korint 2:11) Kelia menya, Sisa Imri enggau berani ngemai indu orang Midian tama ngagai langkau kain iya. Pia mega, orang ke begulai enggau nembiak Petara kemaya hari tu, udah ngelimpangka bala menyadi Kristian enggau ulah ti kamah.—Penyampau 25:6, 14; Jude 4.

6 Kemaya hari tu, kati nuan ngasaika diri ba Emperan Menua Moap? Ulih nuan meda berekat nuan ba dunya baru ti deka datai? Enti ulih, nuan patut enggau naka ulih nitihka pesan: “Seliahka ulah ti kamah.”—1 Korint 6:18.

Emperan Menua Moap

NAMA RETI ULAH TI KAMAH?

7, 8. Nama reti “ulah ti kamah,” lalu nama penyadi ngagai orang ke ngereja iya?

7 Ba Bup Kudus, “ulah ti kamah” (Gerika, por·neiʹa) reti iya ulah seks ti ditagang Bup Kudus. Tu nyengkaum butang, nyundal, besetubuh sebedau kawin (nyengkaum seks ngena mulut enggau “utai” orang ke lelaki tauka indu sereta seks ari burit), enggau megai “utai” orang ke ukai laki tauka bini diri kena ngemuaska ati ti kamah. Tu mega nyengkaum seks entara indu sama indu tauka lelaki sama lelaki sereta beleman enggau jelu. *[2]

8 Bup Kudus enggau terang madah: Orang ke ngereja ulah ti kamah enda ulih terus enggau gerempung Jehovah sereta enda ulih nerima berekat idup belama iya. (1 Korint 6:9; Pemandang 22:15) Pia mega, diatu sida  udah merinsa diri empu ketegal enda ulih dikearap, ngemaluka diri, ngerusak ruang bilik, nyalahka diri, ngandung ngampang, bulih penyakit sereta mati. (Bacha Galatia 6:7, 8.) Nama kebuah ngereja ulah ti tau ngemedis enti iya ulih diseliahka? Tang sayau amat, mayuh orang enda berunding panjai. Sida ngelakka diri diumpan ngereja ulah ti kamah—ke selalu bepun ari pornografi.

PORNOGRAFI—UTAI TI NGUJUNGKA ULAH TI KAMAH

9. Kati pornografi ulih ngenusah? Terangka.

9 Ba mayuh menua, pornografi bisi ba kedai majalah, ba lagu, ba TV enggau kemayuh agi ba Internet. * Kati iya ulih ngenusah? Ulih! Orang ke meda pornografi engka gian ngeluchu, lalu “nurutka pengingin sida ti jai.” Tu ngasuh gila seks, bisi pengingin ti salah, ngerusak ruang bilik, lalu ngujungka sarak. * (Rome 1:24-27; Epesus 4:19) Seiku pemansik ngumbai gila seks nya baka penyakit kanser. “Iya majak besai lalu ngelekai, iya enda ulih lenyau, lalu tusah diubat sereta digeraika,” ku iya.[3]

Ngena Internet ba endur ti ulih dipeda orang bukai

10. Baka ni kitai ulih nitihka ajar ba James 1:14, 15? (Peda mega kutak “ Ngulihka Pengering Kena Ngetanka Ulah ti Tuchi.”)

10 Peratika ayat ba James 1:14, 15: “Kitai diuji pengingin kitai empu, ti ngumpan lalu manjuk kitai; udah nya, lebuh pengingin nya udah ngandung, iya ngadaka dosa, lalu dosa, lebuh iya udah chukup tuai, ngadaka pemati.” Nya alai, enti pengingin ti jai tama ngagai runding nuan, jampat-jampat meh muai iya! Chunto, enti nuan enda sengaja tepedaka pornografi, jampat-jampat  nguing ke bukai tauka madamka komputer, tauka ngalihka cherita TV. Nya alai, enggau naka ulih meh nyeliahka pengingin ti kamah sebedau iya ngujungka nuan ngereja ulah ti kamah!—Bacha Matthew 5:29, 30.

11. Maya ngelaban pengingin ti kamah, baka ni kitai nunjukka diri arapka Jehovah?

11 Petara ngansak kitai: “Nya alai bunuh semua pengingin dunya ti dalam kita, baka: pengawa bambai, ulah ti kamah, runding ti kamah, pengingin ti jai, enggau pengamu (reti nya nyembah engkeramba).” (Kolosi 3:5) Endang amat, tu enda senang. Tang kingatka, kitai bisi Apai ti pengasih enggau nelap ati endur kitai minta tulung. (Masmur 68:19) Nya alai, jampat-jampat ngiga  Iya maya bisi runding ti kamah. Besampi ngambika bulih “kuasa ti besai,” lalu limpangka runding ngagai utai bukai.—2 Korint 4:7; 1 Korint 9:27; peda kutak “ Baka Ni Aku Ulih Muai Ulah ti Jai?”.

12. Nama reti “runding,” lalu nama kebuah kitai patut nyaga iya?

12 Raja Solomon nulis: “Bejimat lebuh nuan berunding, laban gaya pengidup nuan ditempa runding nuan.” (Jaku Dalam 4:23) “Runding” nunjukka “ati” kitai ke bendar ba mata Petara. Pia mega Petara meda “ati” kitai—ukai runding orang bukai—kena nentuka kitai bulih pengidup belama iya tauka enda. Amat, pekara tu nentuka pengidup kitai. Nya alai, Jop ke tetap ati udah besumpah enda merening ngagai indu enggau ati ti kamah. (Jop 31:1) Naka meh pemanah teladan Jop ke kitai! Pia mega, pemasmur besampi: “Anang ngasuh mata aku merening ngagai utai ti [nadai guna].”—Masmur 119:37.

DINAH MILIH UTAI TI SALAH

13. Sapa Dinah, lalu nama kebuah iya salah pilih orang ke enggau begulai?

13 Baka ke udah dipelajar ba Pelajar 3, orang ke begulai enggau kitai ulih ngasuh kitai nyadi manah tauka jai. (Jaku Dalam 13:20; bacha 1 Korint 15:33.) Peratika chunto Dinah, anak dara Jakop. Taja pan Dinah dibesaika enggau manah, tang iya salah pilih orang ke enggau begulai, iya nya indu bansa Kanaan. Baka orang Moap, orang Kanaan mega tebilang enggau ulah ti kamah. (Adat Lewi 18:6-25) Ba mata lelaki bansa Kanaan, nyengkaum Sekem—“orang ke pemadu dibasa” dalam ruang bilik iya—Dinah nya nadai bida enggau indu bansa Kanaan ke rindu ngereja ulah ti kamah.—Pemungkal 34:18, 19.

14. Baka ni Dinah ke salah pilih orang enggau begulai ngenataika penusah?

 14 Dinah engka enda tepikir deka ngereja ulah ti kamah maya iya meda Sekem. Tang, Sekem sama enggau orang Kanaan ke bukai maya bisi pengingin ngereja ulah ti kamah. Dinah nadai daya agi, laban Sekem udah nabanka iya lalu “masung iya”. Taja pan Sekem udah nya “bisi amat ati” ke Dinah, tang nya enda ulih ngubah utai ti udah digaga iya ba Dinah. (Bacha Pemungkal 34:1-4.) Lalu, ukai semina Dinah aja ke bulih penusah ketegal pengawa iya. Ketegal Dinah salah pilih orang ke enggau begulai, bisi penusah bukai nyadi lalu ngemaluka sida sebilik.—Pemungkal 34:7, 25-31; Galatia 6:7, 8.

15, 16. Baka ni kitai tau bulih penemu ari Petara? (Peda mega kutak “ Ayat Bup Kudus ke Patut Diperatika.”)

15 Ari penusah tu, Dinah engka nemu jera. Sida ke rindu sereta ngasika Jehovah enda ibuh nyepi penusah baka Dinah. Ketegal sida ningaka Petara, sida “begulai  enggau orang ke bepenemu-dalam.” (Jaku Dalam 13:20a) Nya alai, sida nemu “utai ti patut dikereja,” lalu nyeliahka penusah enggau pemedis.—Jaku Dalam 2:6-9; Masmur 1:1-3.

16 Penemu ari Petara ulih ditemu sida ke ngiga iya. Penemu tu diulih enggau seruran besampi sereta belajarka Jaku Petara, nyengkaum utai ti disediaka ulun ke tetap  ati sereta bepenemu-dalam. (Matthew 24:45; James 1:5) Kitai mega patut baruh ati ngambika ulih nerima ajar Bup Kudus. (2 Raja 22:18, 19) Chunto, orang Kristian engka ulih nerima ajar ti madahka ati iya ulih ngakal enggau tau ngemedis. (Jeremiah 17:9) Tang, enti iya ngereja utai ti salah, kati iya baruh ati nerima tulung enggau jaku ajar ke diberi ari orang ke rinduka iya?

17. Terangka siti pekara ti ulih nyadi ba diri sebilik, lalu baka ni apai ulih nerangka ngagai anak dara iya.

17 Pikirka pekara tu. Seiku apai enda ngasuh anak dara iya pansut enggau seiku lelaki Kristian, enti nadai orang enggau seduai iya. Indu nya nyaut: “Kati apai enda pechayaka aku? Kami enda ngereja utai ti salah!” Iya engka rinduka Jehovah, lalu bisi tuju ati ti manah, tang kati iya nitihka penemu ari Petara? Kati iya ‘nyeliahka ulah ti kamah’? Tauka “nitihka penemu diri”? (Jaku Dalam 28:26) Nuan engka bisi ajar Bup Kudus ti bukai ke ulih nulung apai enggau anak dara iya berundingka pekara tu.—Peda Jaku Dalam 22:3; Matthew 6:13; 26:41.

JOSEP NYELIAHKA ULAH TI KAMAH

18, 19. Nama penguji ti dilaban Josep, lalu baka ni iya mutarka penguji nya?

18 Josep, menyadi tiri Dinah, rinduka Petara sereta nyeliahka ulah ti kamah. (Pemungkal 30:20-24) Lebuh agi mit, Josep udah meda penusah ti nyadi ketegal menyadi iya Dinah, milih utai ti salah. Penusah tu enggau pengeran Josep ke deka meruan dalam pengerindu Petara, nyaga Josep maya iya ba Ejip. Bini Potipar “tiap hari” ngumbuk Josep tinduk enggau iya. Endang amat, Josep enda ulih badu kereja sereta ninggalka tuan iya Potipar pia aja! Iya patut napi pekara tu enggau pintar sereta berani. Iya suah madahka diri enggai ngagai bini Potipar, lalu nyeliahka diri ari iya.—Bacha Pemungkal 39:7-12.

 19 Peratika: Enti Josep selalu berundingka pasal indu nya tauka seks, ulih iya ngetanka penaluk ngagai Petara? Tentu enda. Ari berundingka utai ti enda manah, Josep ngemeranka kaul iya enggau Jehovah. Tu ulih dipeda ari jaku iya ngagai bini Potipar. “Laki nuan,” ku Josep, ‘nadai nagang aku ngena semua utai dalam rumah tu, kelimpah ari nuan empu. Nya alai, baka ni ku aku tau ngereja utai ti kamah tu, lalu bedosa ngelaban Petara?’—Pemungkal 39:8, 9.

20. Baka ni Jehovah mutarka penusah Josep?

20 Pikirka pengaga ati Jehovah meda Josep ke agi biak ulih ngetanka penaluk iya tiap hari, taja pan iya jauh ari diri sebilik. (Jaku Dalam 27:11) Udah nya, Jehovah mutarka penusah Josep. Iya ukai semina ngelepaska Josep ari rumah jil, tang mega ngaga iya nyadi gabenor enggau ngatur pemakai ba Ejip! (Pemungkal 41:39-49) Endang amat utai ti dipadah ba Masmur 97:10: ‘Jehovah rinduka orang ke begedika penyai. Iya nyaga seput bala nembiak Iya. Iya ngelepaska sida ari kuasa orang ke jai’!

21. Baka ni seiku Saksi lelaki ke agi biak ba menua Afrika ngetanka penaluk iya?

21 Pia mega, kemaya hari tu mayuh nembiak Petara nunjukka sida “begedika utai ti jai, rinduka utai ti ngena.”  (Amos 5:15) Seiku Saksi lelaki ke agi biak ba menua Afrika madah seiku indu ke sekelas enggau iya besemaya deka beleman enggau iya, enti iya nulung indu nya maya peresa matematik. “Aku jampat-jampat nulak peminta iya,” ku iya. “Enggau ngetanka penaluk, aku ulih tetap nyaga rega diri ke berega agi ari emas enggau pirak.”[4] Amat, dosa engka meri pemerindang ti enda lama, tang iya mai mayuh pemedis. (Hebrew 11:25) Pia mega, pemerindang nya nadai guna enti dibandingka enggau pengidup belama iya ketegal ngasika Jehovah.—Jaku Dalam 10:22.

NERIMA TULUNG ARI PETARA TI PENGASIH

22, 23. (a) Enti kitai ngereja penyalah ti besai, nama kebuah kitai ulih diampunka? (b) Baka ni orang ke ngereja penyalah ulih ditulung?

22 Ketegal enda sempurna, semua kitai bebendar ngelaban pengingin tubuh enggau ngereja utai ti betul ba mata Petara. (Rome 7:21-25) Jehovah pan nemu, “kitai tu endang amau.” (Masmur 103:14) Kekadang, kitai ngereja penyalah ti besai. Ulih kitai diampunka? Ulih! Endang amat, orang ke ngereja penyalah engka bulih penusah. Taja pia, Petara seruran “ngampun” orang ke nesal ati enggau orang ke “ngaku” dosa sida.—Masmur 86:5; James 5:16; bacha Jaku Dalam 28:13.

23 Nambahka nya, Petara udah nyediaka “pemeri” ngagai gerempung Kristian—bala tuai gempuru ke bepenemu sereta keran deka nulung. (Epesus 4:8, 12; James 5:14, 15) Tuju sida ngambika nulung orang ke ngereja penyalah bulih kaul ti manah enggau Petara, lalu “bepenemu-dalam” ngambika iya enda ngulang penyalah ti sama.—Jaku Dalam 15:32.

 “BEPENEMU-DALAM”

24, 25. (a) Baka ni orang bujang ke dipadah ba Jaku Dalam 7:6-23 nunjukka diri “beli”? (b) Baka ni kitai ulih “bepenemu-dalam”?

24 Bup Kudus madah pasal sida ke “beli” enggau sida ke “bepenemu-dalam.” (Jaku Dalam 7:7) Ketegal lemi ba pengarap enggau kurang peneleba ngereja peneka Petara, orang ke “beli” enda entu nemu berunding sereta enda nemu ngaga pemutus enggau manah. Baka seiku orang bujang ke dipadah ba Jaku Dalam 7:6-23, iya engka ngelakka diri ngereja penyalah ti besai. Tang, sida ke “bepenemu-dalam” seruran nitihka ati ti beresi, besampi sereta belajarka Bup Kudus. Taja pan enda sempurna, sida enggau naka ulih nentuka runding, pengingin, pengasai ati sereta tuju pengidup sejalai enggau peneka Petara. Enggau tu, iya “kasihka diri empu,” lalu bulih berekat.—Jaku Dalam 19:8.[5]

25 Tanya diri empu: ‘Kati aku amat pechaya ukum Petara nya betul? Kati aku amat pechaya nitihka ukum Petara ulih mai pengelantang?’ (Masmur 19:7-10; Isaiah 48:17, 18) Enti nuan bisi kakang ati, putarka iya enggau jampat. Berunding enggau dalam pasal penusah ketegal enda ngasika ukum Petara. Nambahka nya, ‘asaika pemadas Jehovah’ enggau idup sejalai nitihka ajar Bup Kudus sereta ngisi runding nuan enggau utai ti manah—utai ti bendar, ti lurus, ti tuchi, ti badas sereta ti pemadu menyana. (Masmur 34:8; Pilipi 4:8, 9) Nuan ulih pechaya, bendar agi nuan ngereja nya, dalam agi pengerindu nuan ngagai Petara. Nuan mega rinduka utai ti dikerinduka Iya, lalu begedika utai ti dipegedika Iya. Josep enda sempurna. Tang, iya ulih ‘nyeliahka ulah ti kamah’ laban iya nejuka Jehovah ngiring iya betaun-taun, lalu meri iya pengeran deka ngelantangka ati Jehovah. Arapka nuan mega baka nya.—Isaiah 64:8.

26. Nama deka dikerandauka ba Pelajar 10?

 26 Petara ngaga “utai” orang ke lelaki enggau indu, ukai dikena main-main, tang ngambika kitai ulih beranak betelesak sereta ngambika laki bini ulih rapat agi enggau pangan diri. (Jaku Dalam 5:18) Penemu Petara pasal melaki-bini deka dikerandauka ba Pelajar 10 enggau Pelajar 11.

^ per. 4 Pemayuh ke dipadah ba bup Penyampau nyengkaum 1,000 iku “orang Israel ti udah nguluka orang” ke diukum bala pemesai, lalu nyengkaum sida ke diukum Jehovah.—Penyampau 25:4, 5.

^ per. 7 Kena nemu reti ulah ti kamah enggau ulah ti ngemalu, peda “Questions From Readers” ba The Watchtower kena 15 Julai, 2006, ke dikeluarka Saksi-Saksi Jehovah.

^ per. 9 “Pornografi,” reti iya gambar, utai ti ditulis tauka bunyi ti tau meransang ulah ti kamah. Pornografi ngayanka gambar orang ngereja ulah ti kamah entara dua iku orang tauka lebih.

^ per. 9 Ngeluchu deka dikerandau ba Penerang “Ngeluchu—Ulah Kamah ti Ulih Dibuai.”