Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

‘Meruan Dalam Pengerindu Petara’

 PELAJAR 1

‘Reti Rinduka Petara’

‘Reti Rinduka Petara’

‘Reti rinduka Petara nya kitai ngasika pesan Iya. Lalu pesan Iya ukai utai ti mar dititihka kitai.’ —1 JOHN 5:3.

1, 2. Nama kebuah nuan rinduka Petara Jehovah?

KATI NUAN rinduka Petara? Enti nuan udah nyerahka diri ngagai Petara Jehovah, nuan tentu deka nyaut “Ya.” Kitai endang patut rinduka Jehovah, laban tu chara kitai malas pengerindu ari Iya. Bup Kudus madah: ‘Kitai rindu laban Petara udah dulu rinduka kitai.’—1 John 4:19.

2 Jehovah udah dulu ngayanka pengerindu Iya. Iya meri kitai dunya ti manah endur diau. Iya nyediaka utai ti diguna kitai. (Matthew 5:43-48) Iya nyaga utai ti diguna kitai ba pengarap. Iya meri kitai Bup Kudus. Nambahka nya, Iya ngasuh kitai besampi ngagai Iya sereta besemaya deka ningaka sampi kitai, lalu deka meri roh kudus kena nulung kitai. (Masmur 65:2; Luke 11:13) Kelebih agi, Iya ngirum Anak ti pemadu dikesayau Iya nyadi Penebus ngambika kitai ulih dilepaska ari dosa enggau pemati. Naka meh pemesai pengerindu Jehovah ke kitai!—Bacha John 3:16; Rome 5:8.

3. (a) Nama patut digaga kitai enti deka meruan dalam pengerindu Petara? (b) Nama tanya ti patut diperundingka kitai, lalu dini kitai tau bulih saut iya?

 3 Jehovah deka kitai meruan bulih penguntung ari pengerindu Iya. Tang, tu bepanggai ba kitai empu. Bup Kudus meransang kitai: ‘Meruan dalam pengerindu Petara . . . ti deka mai kitai ngagai pengidup ti meruan belama iya.’ (Jude 21) Leka jaku “meruan” nunjukka kitai patut terus ngereja utai. Kitai patut malas pengerindu Iya ngena chara ti patut. Tang  tanya ti patut diperundingka kitai, ‘Baka ni aku nunjukka pengerindu ngagai Petara?’ Rasul John nyaut: ‘Reti rinduka Petara nya kitai ngasika pesan Iya. Lalu pesan Iya ukai utai ti mar dititihka kitai.’ (1 John 5:3) Kitai patut meratika reti ayat tu laban kitai deka ngayanka diri amat rinduka Petara.

‘RETI RINDUKA PETARA’

4, 5. (a) Nama ‘reti rinduka Petara’? (b) Terangka baka ni nuan belabuh rinduka Jehovah.

4 Nama utai ku rasul John maya iya nulis ‘reti rinduka Petara’? Dia iya madah pasal pengerindu kitai ngagai Petara. Ulih nuan ingat kemaya nuan belabuh rinduka Jehovah?

Nyerahka diri enggau baptisa nya tanda kitai berengkah ngasika Petara

5 Kingatka maya nuan baru belajarka pemendar pasal Jehovah enggau tuju Iya, lalu manggaika pengarap ba Iya. Ari nya nuan ulih nemu, nuan mensia ti bedosa lalu nadai kaul enggau Petara. Taja pia, Jehovah udah ngena Jesus muka jalai ngambika nuan tau bulih pengidup ti sempurna ke udah dilenyauka Adam. (Matthew 20:28; Rome 5:12, 18) Nuan tentu beterima kasih ngagai Jehovah ke udah nebus nuan ngena Anak Iya. Tu ngasuh nuan belabuh rinduka Petara ke udah ngayanka pengerindu ti dalam ngagai nuan.—Bacha 1 John 4:9, 10.

6. (a) Baka ni pengerindu ti bendar diayanka? (b) Pengerindu ngagai Petara nulung nuan ngereja nama?

6 Tang, rinduka Jehovah nya semina pun aja. Pengerindu ti bendar ukai semina asai ati tauka nyebut, “Aku rinduka Jehovah.” Baka pengarap, pengerindu ti bendar diayanka ari pengawa. (James 2:17) Reti iya, pengerindu ti diayanka ari pengawa ngagaka  ati orang ti dikesayau. Pia mega, enti nuan udah balat rinduka Jehovah, nuan deka nitihka chara pengidup ti ngelantangka ati Jehovah. Kati nuan Saksi ti udah dibaptisa? Enti udah, pengerindu enggau penaluk ngagai Jehovah nulung nuan mutuska utai ti pemadu beguna ba pengidup. Nuan nyerahka diri ngagai Jehovah deka ngereja peneka Iya, lalu dibaptisa. (Bacha Rome 14:7, 8.) Baka ni nuan ulih ngamatka semaya nuan ngagai Jehovah? Peratika nama dipadah rasul John.

“KITAI NGASIKA PESAN IYA”

7. Nama sekeda ari pesan Petara, lalu ngasika pesan nya nyengkaum nama?

7 John nerangka reti rinduka Petara: “Kitai ngasika pesan Iya.” Nama pesan Petara? Jehovah meri kitai sekeda pesan enggau terang ba Bup Kudus. Chunto, Petara enda ngasuh orang mabuk, ngereja ulah ti kamah, nyembah engkeramba, ngenchuri enggau bula. (1 Korint 5:11; 6:18; 10:14; Epesus 4:28; Kolosi 3:9) Ngasika pesan Petara reti iya kitai idup sejalai nitihka ajar Iya ti udah dipadah enggau terang ba Bup Kudus.

8, 9. Baka ni kitai ulih nemu utai ti ngerinduka ati Jehovah, taja pan enda dipadahka enggau terang ba Bup Kudus? Beri chunto.

8 Nama patut digaga kitai ngambika ngerinduka ati Jehovah? Kitai ukai semina ngasika ukum Petara, tang patut nemu chara Iya berunding. Jehovah enda nyediaka semua ukum ti patut dikena ba pengidup kitai. Bisi maya iya, Bup Kudus enda madah enggau terang pasal sekeda pekara. Nya alai, kitai patut ngaga pemutus kediri empu. Bup Kudus enggau terang  madahka chara Jehovah berunding. Lebuh belajarka Bup Kudus, kitai belajar pasal utai ti dikerindu enggau utai ti dipegedi Jehovah. (Bacha Masmur 97:10; Jaku Dalam 6:16-19) Kitai deka nemu ulah enggau pengawa ti ngerinduka ati Iya. Mayuh agi kitai belajar pasal pemanah enggau chara Jehovah ngereja pengawa, deka agi kitai nitihka chara Iya berunding. Nya alai, taja pan ukum ba Bup Kudus pasal sekeda pekara enda dipadah enggau terang, kitai ulih nemu “semua peneka Tuhan.”—Epesus 5:17.

9 Chunto, Bup Kudus nadai madahka kitai pasal cherita wayang tauka program TV ti ngayanka penyai tauka ulah kamah ti enda tau dipeda. Kati kitai amat begunaka ukum ti madahka enggau terang kitai enda tau meda cherita nya? Kitai nemu runding Petara pasal semua utai nya. Bup Kudus madah: “Iya [Jehovah] begedika orang ke mangah.” (Masmur 11:5) Iya mega madah: ‘Petara deka ngakim orang ke ngereja ulah ti kamah, enggau orang ke butang.’ (Hebrew 13:4) Enggau beratika ayat tu, kitai nemu utai ti dikedeka Jehovah. Nya alai, kitai anang teperindang meda cherita ba wayang, internet, TV enggau utai bukai ke ngayanka pengawa ti dipegedi Petara. Kitai ngerinduka ati Jehovah enti kitai enda meda pemerindang ti ngayanka ulah ti jai. *

10, 11. Nama kebuah kitai milih ngasika Jehovah, lalu baka ni kitai nunjukka diri ngasi?

10 Nama kebuah kitai deka nitihka pesan Petara? Nama kebuah kitai deka idup sejalai nitihka penemu  Petara ninting hari? Kitai milih chara pengidup nya ukai ketegal kitai deka rari ari kena ukum tauka nyeliahka utai ti tau ngemedis. (Galatia 6:7) Tang, kitai ngasika Jehovah laban nya peluang manah dikena ngayanka pengerindu ngagai Iya. Baka seiku anak ke keran deka ngagaka ati apai iya, kitai mega keran deka ngagaka ati Jehovah. (Jaku Dalam 23:15) Iya Apai kitai, lalu kitai rinduka Iya. Nadai utai ti ulih ngelantangka tauka ngemuaska ati kitai, kelimpah ari ngasuh ‘Jehovah gaga ati.’—Jaku Dalam 12:2.

11 Nya alai, kitai ngasika Petara ukai ketegal dipejal. * Kitai ukai semina ngasi maya senang tauka maya bisi penanggul ti mit aja. Tang, maya bisi penanggul ti besai, kitai pan patut ngasi “enggau pengabis ati.” (Rome 6:17) Kitai ngasaika utai ti ditulis pemasmur ba Bup Kudus ke madah: “Aku gaga ati ke pesan Nuan ti dikerinduka aku.” (Masmur 119:47) Ya, kitai rindu deka ngasika Jehovah. Kitai nemu kitai endang patut ngasika Iya enggau pengabis ati, ukai ketegal dipejal. (Ulang Adat 12:32) Kitai deka Jehovah muji kitai baka Iya muji Noah ke ngasika Iya. Bup Kudus madah: ‘Noah lalu ngereja semua utai nitihka asuh Petara.’—Pemungkal 6:22.

12. Ni maya kitai ngagaka ati Jehovah?

12 Baka ni asai ati Jehovah enti kitai ngasika Iya? Bup Kudus madah kitai ngasuh Iya “lantang ati.” (Jaku Dalam 27:11) Kati kitai ke ngasi amat ngagaka  ati Jehovah? Amat, lalu bisi kebuah ti manah mega! Lebuh Jehovah ngaga kitai, Iya meri kitai peluang bibas milih. Reti iya kitai ulih milih deka ngasika Petara tauka enda. (Ulang Adat 30:15, 16, 19, 20) Enti kitai ngasika Jehovah ketegal kitai balat rinduka Iya, kitai ngagaka ati Iya. (Jaku Dalam 11:20) Kitai mega milih jalai pengidup ti pemadu manah.

“PESAN IYA UKAI UTAI TI MAR DITITIHKA”

13, 14. Nama kebuah pesan Petara “ukai utai ti mar”? Beri chunto.

13 Pasal pesan Jehovah, rasul John nulis: “Pesan Iya ukai utai ti mar dititihka.” Leka jaku Gerika “mar” ba 1 John 5:3 reti iya “berat.” * Peneka Jehovah ulih diterima tauka enda mar dititih. Ukum Iya ulih dititihka mensia ti enda sempurna.

14 Chunto, kaban rapat nuan minta tulung maya iya pindah ke rumah baru. Iya bisi mayuh kutak deka diangkut. Sekeda kutak nya lempung, lalu ulih diangkat kediri. Tang bisi mega kutak ke berat, lalu patut diangkat dua iku orang. Kaban nuan milih kutak ke ulih diangkat nuan. Deka iya ngasuh nuan ngangkat kutak ke enda ulih diangkat nuan kediri? Enda. Iya nemu nya ulih ngemedis nuan. Pia mega, Petara ti bisi pengerindu enda meri pesan ti kelalu mar dititihka nuan. (Ulang Adat 30:11-14) Iya enda ngasuh kitai ngereja utai ti ngenusah. Jehovah  nemu naka ni kitai ulih nitihka pesan Iya laban “Iya nemu utai ti udah dikena ngaga kitai. Iya ingatka kitai tu endang amau.”—Masmur 103:14.

15. Nama kebuah kitai pechaya pesan Jehovah meri penguntung ngagai kitai?

15 Pesan Jehovah enda mar dititih. Pesan Iya nguntungka kitai. (Bacha Isaiah 48:17.) Nya alai, Moses ulih madah ngagai orang Israel kelia menya: ‘Jehovah Petara kitai lalu ngasuh kitai ngasika semua adat nya, lalu nangika Iya. Enti kitai ngereja nya, Iya deka seruran ngemataka bansa kitai, lalu ngasuh bansa kitai seruran kaya-raja.’ (Ulang Adat 6:24) Kitai mega pechaya Jehovah meri kitai ukum ngambika kitai meruan bulih penguntung. Baka ni nya? Jehovah nya Petara ti bisi pemintar enggau penemu. (Rome 11:33) Nya alai, Iya nemu utai ti pemadu manah ke kitai. Jehovah mega endang pengerindu. (1 John 4:8) Sebarang utai ti disebut enggau digaga Iya bisi kaul enggau pengerindu. Nya alai, semua pesan ti diberi Jehovah ngagai nembiak Iya bepun ari pengerindu.

16. Nama kebuah kitai deka ngasika Petara, taja pan kitai enda sempurna sereta idup ba dunya ti jai?

16 Tang, tu ukai reti iya ngasika Petara nya utai ti senang digaga. Kitai patut ngelaban utai ti jai ba dunya tu laban “semua dunya di baruh kuasa Sitan.” (1 John 5:19) Kitai mega patut belaban enggau tubuh ti enda sempurna ke selalu deka ngelanggar ukum Petara. (Rome 7:21-25) Tang, pengerindu kitai ngagai Petara ulih ngasuh kitai menang. Jehovah merekat orang ke rindu sereta ngasika Iya. Iya meri roh kudus “ngagai orang ke ngasika Iya.” (Kereja Rasul  5:32) Roh kudus ngasilka pemanah ti ulih nulung kitai ngasika Petara.—Galatia 5:22, 23.

17, 18. (a) Nama deka diperatika kitai ba bup tu, lalu nama patut dikingatka kitai? (b) Nama deka dipelajarka ba Pelajar 2?

17 Ba bup tu, kitai deka meratika ajar Jehovah pasal utai ti patut dikereja kitai, lalu baka ni asai ati Iya pasal pemutus ke digaga kitai ba pengidup ninting hari. Enggau tu, kitai patut beratika sekeda pekara ti beguna. Kesatu, Jehovah enda kala mejal kitai ngasika ukum enggau ajar Iya; Iya deka kitai ngasika Iya ari ati. Kedua, Jehovah deka kitai idup nitihka chara ti ulih mai berekat diatu, lalu nuju pengidup belama iya. Ketiga, enti kitai ngasika Jehovah enggau pengabis ati, kitai nunjukka diri amat rinduka Iya.

18 Kena nulung kitai nemu utai ti betul enggau utai ti salah, Jehovah meri kitai asai ati ti beresi. Tang, asai ati ti beresi patut dilatih ngambika ulih ngiring kitai enggau manah. Ba Pelajar 2 kitai deka belajarka pekara tu.

^ per. 11 Indah bala antu ke jai semadi deka ngasika Jesus. Lebuh Jesus ngasuh bala antu ke jai pansut ari sekeda orang ke dirasuk sida, bala antu nadai chara bukai tang ngaku kuasa Jesus lalu ngasika iya.—Mark 1:27; 5:7-13.

^ per. 13 Leka jaku Gerika ti sama dikena nyalin “berat” ba 1 John 5:3 mega dikena ba Matthew 23:4 kena ngambarka utai ti “berat,” iya nya atur sereta adat ti digaga sida pengajar Adat enggau orang Parisi ke orang mayuh.