Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

‘Meruan Dalam Pengerindu Petara’

 PELAJAR 10

Pengawa Melaki-bini—Pemeri Ari Petara

Pengawa Melaki-bini—Pemeri Ari Petara

“Tali begembar tiga, mar diputuska.”—PENGAJAR 4:12.

1, 2. (a) Pasal orang ke baru kawin, nama selalu dipikir kitai, lalu nama kebuah? (b) Nama tanya ti deka dikerandauka kitai ba pelajar tu?

KATI NUAN rindu datai pengerami melah pinang? Mayuh orang rindu laban pengerami nya ngagaka ati. Nuan meda orang ke melah pinang ngias diri enggau naka pemanah. Seduai iya mega amat gaga ati! Maya nya, seduai iya tuchum, lalu baka ke ulih meruan jadi melaki-bini.

2 Taja pia, kemaya hari tu kitai meda mayuh ruang bilik enda meruan. Kitai ngarapka orang ke baru kawin ulih meruan, tang kekadang kitai engka bepikir: ‘Kati ruang bilik nya ulih lantang? Ulih iya meruan?’ Saut ngagai tanya tu bepanggai ba sekalika laki tauka bini arapka sereta nitihka ajar Petara pasal melaki-bini. (Bacha Jaku Dalam 3:5, 6.) Sida patut ngereja nya ngambika meruan dalam pengerindu Petara. Aram kitai meda saut Bup Kudus ngagai empat iti tanya tu: Nama kebuah deka kawin? Enti deka kawin, sapa patut dipilih nuan nyadika kaling? Baka ni nuan nyediaka diri sebedau kawin? Lalu, nama ulih nulung laki bini meruan lantang?

NAMA KEBUAH DEKA KAWIN?

3. Nama kebuah kitai enda patut kawin ketegal hal ti mit?

3 Sekeda pechaya kawin ngenataika pengelantang. Enti enda kawin, sida ngumbai diri enda mujur tauka  nadai pengelantang. Tu enda amat! Jesus, lelaki ke bujang, ngumbai enda belaki bebini nya berekat, lalu meransang orang ngetanka berekat tu enti sida ulih. (Matthew 19:10-12) Rasul Paul mega berandau pasal penguntung orang ke enda kawin. (1 Korint 7:32-35) Jesus tauka Paul nadai madahka enda tau kawin; tang ke amat, “nagang orang belaki bebini” nya “ajar antu.” (1 Timoti 4:1-3) Kelimpah ari nya, orang ke enda belaki bebini ulih ngereja peneka Jehovah enggau mayuh agi. Nya alai, anang deka kawin ketegal hal ti mit. Chunto, deka kawin ketegal diansak bala kaban ke serambau.

4. Nama kebuah ruang bilik ti meruan manah endur ngemesaika anak?

4 Kati bisi kebuah deka kawin? Bisi. Kawin mega pemeri ari Petara. (Bacha Pemungkal 2:18.) Nya alai, kawin ulih meri penguntung enggau berekat. Chunto, ruang bilik ti meruan nguntungka diri bilik. Anak begunaka ruang bilik ti meruan ari apai indai ngambika ulih ngemesaika sida, rinduka sida, ngajar sereta ngiring sida. (Masmur 127:3; Epesus 6:1-4) Tang, kitai ukai kawin ketegal deka bisi anak aja.

5, 6. (a) Nitihka Pengajar 4:9-12, nama sekeda berekat ari kaul ti rapat entara melaki-bini? (b) Baka ni ruang bilik disempamaka baka tali begembar tiga?

5 Peratika ayat ba tajuk pelajar tu: “Dua iku manah agi ari siku, laban enti seduai iya begulai, seduai iya bulih agi gawa. Enti sema siku ari seduai iya teterap, siku ga bisi ngangkatka iya. Tang enti orang diau kediri-diri, lalu iya teterap, nya amat tusah, laban orang nadai nulung iya. Lebuh chelap, dua iku tau bekimbit tinduk, lalu ngangatka isi pangan diri, tang baka ni ku kitai ulih ngangatka diri enti kitai tinduk kediri-diri? Dua iku ulih ngelaban orang ke nyerang, tang enti iya ngelaban  kediri-diri, iya alah. Tali begembar tiga, mar diputuska.”—Pengajar 4:9-12.

6 Kelebih agi, ayat tu madah pasal kaul ti berega. [1]Endang amat, nyadi melaki-bini nya kaul ti pemadu rapat. Baka ke dipadah ba ayat tadi, kaul nya ngenataika tulung, pengelantang sereta pengelikun. Ruang bilik ti teguh ukai bepanggai ba laki bini aja. Tali begembar dua engka senang putus. Tang, tali begembar tiga tusah deka putus. Enti laki bini beberatka Jehovah, ruang bilik seduai iya baka tali begembar tiga. Ruang bilik ti meruan endang bepanggai ba Jehovah.

7, 8. (a) Nama jaku lalau ti dipadah Paul ngagai orang Kristian ke bedau kawin, tang bisi pengingin seks ti balat? (b) Nama dipadah Bup Kudus pasal orang ke jadi melaki-bini?

7 Pengawa besetubuh semina dikemendarka entara melaki-bini aja. Reti iya, pengawa tu meri pengelantang ke seduai iya. (Jaku Dalam 5:18) Taja pan orang biak ke bedau belaki bebini udah ngelui pengingin seks ti balat, iya agi napi pengingin tu. Enti enda ditagang, pengingin tu ulih ngujungka ulah ti kamah. Paul nulis jaku lalau tu ngagai orang ke bedau kawin: “Enti sida enda tetagangka pengingin diri, sida patut jadi enggau pangan diri, laban manah agi sida jadi melaki-bini, ari ke merinsa natka diri tetengukka pangan diri.”—1 Korint 7:9; James 1:15.

8 Enda ngira nama tuju orang deka kawin, sida patut bisi runding ti betul. Paul madah, orang ke jadi melaki-bini “deka dituntung penusah dunya.” (1 Korint 7:28) Orang ke udah kawin napi penusah ke enda diasaika orang ke bedau kawin.Tang, enti nuan milih deka kawin, baka ni nuan ulih ngurangka penusah, tang nambahka pengelantang? Siti chara nya milih kaling enggau manah.

 SAPA PATUT DIPILIH NUAN NYADIKA KALING?

9, 10. (a) Baka ni Paul ngambarka penusah enti kawin enggau orang ke enda sama pengarap? (b) Nama penyadi enti kawin enggau orang ke enda sama pengarap?

9 Paul nulis lalau tu: “Anang besulu enggau orang ke enda arap.” (2 Korint 6:14) Jaku sempama Paul tu pasal seiku orang ke betanam. Enti dua iku jelu ti jauh bida pemesai tauka pengering ditangkun begulai, kedua-dua jelu nya deka sama merinsa. Pia mega, enti dua iku orang ke enda sama pengarap jadi melaki-bini, seduai iya udu betelisih enggau belaya. Enti seiku rinduka Jehovah, tang seiku enda entu tauka enda rinduka Jehovah, utai ti dikemeranka seduai iya ba pengidup enda sebaka, lalu tu ulih ngujungka seduai iya sama merinsa. Nya alai, Paul ngelalau orang Kristian semina kawin enggau ‘nembiak Tuan.’—1 Korint 7:39.

10 Kekadang, orang Kristian ke bedau kawin ngumbai jadi enggau orang ke enda sama pengarap nya manah agi ari ke sunyi. Nya alai, sekeda ari sida enda nitihka lalau Bup Kudus, lalu kawin enggau orang ke enda nyembah Jehovah. Kesuah agi, pengujung iya ngenusahka ati. Udah nya, sida nemu diri udah kawin enggau orang ke enda ulih endur sida bekunsi utai ti pemadu beguna ba pengidup. Sida mega ngasaika diri sunyi agi ari ke bedau kawin. Tang manah amat, mayuh orang Kristian ke bedau kawin arap sereta ngasika lalau ari Petara. (Bacha Masmur 32:8.) Taja pan sida bisi ati deka kawin, sida mengkang enda belaki bebini datai ke sida tetemuka kaling ti sama nyembah Petara Jehovah.

11. Nama ulih nulung nuan milih kaling enggau manah? (Peda mega kutak “ Orang ke Baka Ni Patut Nyadi Kaling Aku?.”)

11 Endang amat, ukai semua nembiak Jehovah ulih  nyadi ke kaling. Enti nuan bisi ati deka kawin, giga meh orang ke ngembuan ulah, juluk ati ba pengarap sereta rinduka Petara, baka nuan empu. Ulun ke tetap ati sereta bepenemu-dalam udah nyediaka mayuh litaricha pasal pekara tu. Nuan patut besampi ngambika ulih beratika lalau ari Bup Kudus, lalu nitihka lalau nya ngaga pemutus ti berat tu. *Bacha Masmur 119:105.

12. Nama adat pasal ngiga kaling ke bisi diatur ba mayuh menua, lalu nama chunto ba Bup Kudus ke ulih nyadika teladan?

12 Ba mayuh menua, selalu iya apai indai milih kaling ke anak sida. Mayuh orang setuju enggau atur tu laban apai indai bepenemu agi sereta bisi peneleba ngaga pemutus pasal pekara tu. Pengawa sabung jadi ke diatur apai indai selalu mujur, baka orang jeman Bup Kudus kelia. Chunto, Abraham nganjung ulun iya ngiga bini ke Isak. Tu nyadika teladan ngagai apai indai kemaya hari tu. Abraham enda meda duit enggau pangkat. Tang, iya ngiga orang ke nyembah Jehovah nyadika bini Isak. *Pemungkal 24:3, 67.

BAKA NI NUAN ULIH NYEDIAKA RUANG BILIK TI MUJUR?

13-15. (a) Baka ni jaku lalau ba Jaku Dalam 24:27 ulih nulung lelaki ke agi biak ke deka bebini? (b) Baka ni indu ke agi biak nyediaka diri sebedau belaki?

13 Enti nuan berunding amat deka kawin, nuan patut nanya diri empu, ‘Kati aku udah sedia?’ Saut iya  ukai semina bepanggai ba pengerindu, seks, deka bisi kaling tauka deka bisi anak. Tang, orang ke deka kawin patut berundingka juluk ati pangan diri.

14 Lelaki ke agi biak ke deka bebini patut berundingka lalau tu: “Sediaka pengawa nuan di luar, sediaka umai nuan; udah nya baru nuan nirika rumah.” (Jaku Dalam 24:27) Nama reti ayat tu? Kelia menya, enti lelaki deka kawin, iya patut nanya diri empu, ‘Kati aku sedia deka nyaga enggau melanja anak bini?’ Iya patut gawa dulu, ngintu umai, tauka utai ti ditanam iya. Pia mega kemaya hari tu. Lelaki ke deka kawin patut besedia megai tanggungjawap. Iya patut bagas gawa. Bup Kudus madah, lelaki ke enggai melanja anak bini, enda nyaga pengasai ati sereta utai ti diguna diri sebilik ba pengarap, jai agi ari orang ke enda arap!—Bacha 1 Timoti 5:8.

15 Indu ke deka belaki mega patut sanggup nerima sekeda tanggungjawap ti berat. Bup Kudus madahka sekeda pengelandik enggau pemanah ke patut dikemisi bini, kena nulung laki iya enggau ngintu sida sebilik. (Jaku Dalam 31:10-31) Lelaki enggau indu ke beguai-guai deka kawin, tang enda besedia megai tanggungjawap, nya semina berundingka diri empu aja, enda berundingka kaling iya. Tang iya ke pemadu beguna, orang ke deka kawin patut nitihka ajar Bup Kudus.

16, 17. Nama jaku lalau ari Bup Kudus ti patut diperundingka orang ke deka kawin?

16 Nyediaka diri deka kawin nyengkaum berundingka tanggungjawap ke diberi Petara ngagai laki bini. Laki patut nemu nama reti nyadi tuai ba ruang bilik. Tu ukai reti iya ulih ngintu ruang bilik enggau peneka ati. Tang, iya patut neladan chara Jesus nyadi tuai. (Epesus  5:23) Pia mega, bini patut nemu tanggungjawap iya. Kati iya deka “nunduk ngagai laki”? (Epesus 5:22) Iya udah dibaruh kuasa Jehovah enggau Jesus. (1 Korint 11:3) Nya alai, iya patut tunduk ngagai laki iya. Ulih iya nyukung sereta tunduk ngagai laki iya ke enda sempurna? Enti enda ulih, manah agi iya enda ibuh kawin.

17 Nambahka nya, laki bini patut besedia maya kaling sida begunaka sida. (Bacha Pilipi 2:4.) Paul nulis: “Genap iku kita patut rinduka bini diri, baka kita ke rinduka diri empu, lalu bini patut masa laki.” Enggau tulung ari roh kudus, Paul nemu bini patut bebasaka laki. Lalu laki patut rinduka bini.—Epesus 5:21-33.

Orang ke bepangan patut mai orang bukai keluar enggau seduai iya

18. Nama kebuah patut nemu nagang diri maya bepangan?

18 Nya alai, maya bepangan ukai maya kena merindang diri. Nya maya kena ngelala pangan diri enggau dalam agi, sekalika orang nya ulih tauka enda nyadika kaling. Nya mega maya belajar nagang diri! Selalu iya, maya nya seduai iya bisi pengingin deka ngereja pengawa ke semina tau dikereja orang ke udah kawin. Tang, orang ke amat rinduka pangan diri, deka nyeliahka sebarang pengawa ti ulih ngerusakka kaul orang ke dikesayau enggau Petara. (1 Tesalonika 4:6) Nya alai maya nuan bepangan, nuan patut nemu nagang diri; nuan deka bulih penguntung ari lalau tu, sekalika nuan kawin tauka enda.

BAKA NI RUANG BILIK NUAN ULIH MERUAN BELAMA IYA?

19, 20. Nama kebuah penemu orang Kristian pasal kawin enda sebaka enggau penemu orang kemaya hari tu? Terangka.

19 Enti laki bini deka ruang bilik sida meruan belama iya, sida patut bisi runding ti betul pasal begulai  enggau pangan diri. Ba novel enggau cherita TV tauka wayang, selalu iya ba pengujung cherita nya madahka orang gaga ati jadi melaki-bini. Iya ke amat, jadi melaki-bini ukai pengujung, tang baru pun iya—tu pun ari utai ti diatur Jehovah ngambika meruan belama iya. (Pemungkal 2:24) Sayau amat, penemu kemaya hari tu ukai baka nya. Nitihka sekeda adat, orang ngumbai jadi melaki-bini nya baka “nanchangka tali.” Sida engka enda nemu sempama nya endang amat ba laki-bini. Nama kebuah? Tali ke ditanchang enggau tegut enda mudah tebuka, tang iya mega ulih dibuka.

20 Mayuh orang kemaya hari tu ngumbai kawin nya ukai utai ti tetap. Sida deka kawin laban sida ngumbai nya ulih ngemuaska utai ti dikedeka sida, tang sida deka sarak maya bisi penanggul. Kingatka sempama ke dikena Bup Kudus pasal kawin—tali. Chunto, tali kapal digaga ngambika tan, enda mudah berambut tauka tusut, maya ngelaban kudi. Pia mega, pengidup melaki-bini patut meruan. Kingatka, Jesus madah: ‘Nadai orang tau nyeraraka utai ti udah ditampilka Petara.’ (Matthew 19:6) Enti nuan deka kawin, nuan patut bisi runding ti sama. Kati tu ngenusahka nuan? Enda.

21. Nama runding ti patut bisi ba laki bini, lalu nama ulih nulung seduai iya ngereja nya?

21 Laki bini patut ngetanka runding ti betul enggau pangan diri. Enti seduai iya beratika pemanah pangan diri, nya ulih mai pengelantang. Kati seduai ulih bisi runding ti manah taja pan sama enda sempurna? Jehovah nemu pengurang kitai, nya alai kitai patut bepanggai ba Iya ngambika bisi runding ti manah. Pemasmur nanya: ‘Enti Nuan, O Jehovah nuliska dosa kami, sapa tan?’ (Masmur 130:3) Pia mega, laki bini patut  bisi runding ti manah sereta ngampunka pangan diri.— Bacha Kolosi 3:13.

22, 23. Baka ni Abraham seduai Sarah nyadi teladan ti manah ngagai laki bini kemaya hari tu?

22 Pengidup melaki-bini ulih ngenataika berekat ti besai enti iya tan ari taun ke taun. Bup Kudus madah pasal pengidup Abraham seduai Sarah maya seduai iya  tuai. Seduai iya mega bisi penusah ba ruang bilik. Pikirka Sarah ke beumur kira-kira 60 taun, ninggalka rumah iya ti manah ba menua Ur ti kaya, lalu diau ba langkau kain sepemanjai pengidup iya. Tang, iya tunduk ngagai laki iya ke nyadi tuai bilik. Iya nyadi kaling enggau penulung ti manah ke Abraham. Iya mega nulung ngemujurka pemutus laki iya enggau basa. Lalu iya enda pepura tunduk ngagai Abraham. Indah “dalam ati diri,” iya ngumbai Abraham tuan iya. * (Pemungkal 18:12; 1 Peter 3:6) Iya bebasaka Abraham ari ati.

23 Endang amat, tu ukai reti iya Abraham seduai Sarah selalu sepenemu. Bisi sekali Sarah madah pasal utai ti “balat ngenusahka ati” Abraham. Tang, ketegal perintah ari Jehovah, Abraham enggau baruh ati ningaka jaku bini iya, lalu tu ngenataika berekat ngagai ruang bilik seduai iya. (Pemungkal 21:9-13) Laki bini kemaya hari tu, ke udah kawin bepuluh taun, ulih belajar mayuh ari Abraham seduai Sarah.

24. Ruang bilik ke baka ni ngenataika mulia ngagai Petara Jehovah, lalu nama kebuah?

24 Ba gerempung Kristian, beribu iku orang udah bulih pengelantang ba ruang bilik—bini bebasaka laki, laki rindu sereta masa bini, lalu sama ngenuluka peneka Jehovah ba pengidup. Enti nuan deka kawin, arapka nuan milih kaling enggau manah, nyediaka diri, lalu enggau naka ulih ngintu ruang bilik enggau meruan, ngambika ulih ngenataika mulia ngagai Petara Jehovah. Enggau tu, nuan enggau kaling nuan meruan dalam pengerindu Petara.

^ per. 11 Peda ba Pelajar 2 bup Rahsia Kebahagiaan Keluarga, ke dikeluarka Saksi-Saksi Jehovah.

^ per. 12 Sekeda ari nembiak Jehovah ke tetap ati kelia menya, baka Abraham enggau Jakop bisi lebih ari seiku bini. Maya nya, Jehovah agi ulih nerima pengawa sida ke bebini mayuh. Jehovah enda ngepunka pengawa tu, tang Iya ngemataka pekara tu. Taja pia, orang Kristian anang enda ingat, Jehovah enda agi ngasuh nembiak Iya bebini lebih ari seiku.—Matthew 19:9; 1 Timoti 3:2.

^ per. 22 Taja pan Pemungkal 18:12 madahka Sarah ngumbai Abraham “laki aku,” dalam leka jaku asal reti iya “tuan aku.”