Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

‘Meruan Dalam Pengerindu Petara’

 PELAJAR 5

Baka Ni Nyeraraka Diri Ari Dunya

Baka Ni Nyeraraka Diri Ari Dunya

“Kita ukai enggi dunya.”JOHN 15:19.

1. Nama dipadahka Jesus lebuh malam ke penudi iya nyadi mensia ba dunya tu?

LEBUH malam ke penudi Jesus nyadi mensia ba dunya tu, iya madahka pengirau diri pasal utai ke deka nyadi ngagai murid iya jemah ila. Iya mega besampi pasal pekara nya ngagai Apai iya: ‘Aku ukai minta Nuan ngambi sida ari dunya, tang minta Nuan nyaga sida ari iya ti jai. Sida ukai enggi dunya, baka aku ke ukai enggi dunya.’ (John 17:15, 16) Dalam sampi tu, Jesus ngayanka penalam pengerindu ngagai murid iya, lalu nunjukka jaku ke dipadah iya sebedau nya beguna bendar: “Kita ukai enggi dunya.” (John 15:19) Nyadi, Jesus enggau terang nunjukka bala murid iya patut nyeraraka diri ari dunya!

2. Nitihka Jesus, “dunya” nunjukka nama?

2 Nitihka Jesus, “dunya” nunjukka semua mensia ke nadai kaul enggau Petara. Sida diperintah Sitan, berundingka diri empu aja sereta sumbung. (John 14:30; Epesus 2:2; 1 John 5:19) Endang amat, ‘bepangan enggau dunya, deka nyadi munsuh Petara.’ (James 4:4) Baka ni kitai ulih nyeraraka diri ari dunya, lalu meruan dalam pengerindu Petara? Kitai ulih ngereja tu enti: (1) mengkang taluk ngagai Perintah Petara ke dipegai Jesus sereta enda enggau politik ba dunya tu, (2) ngelaban roh dunya, (3) ngintu diri sereta begari enggau chara ti patut,  (4) puas ati enggau pemisi diri, lalu (5) ngerasukka semua senyata Petara. Aram kitai berandauka lima pekara tu.

MENGKANG TALUK SERETA ENDA ENGGAU BEPOLITIK

3. (a) Nama runding Jesus pasal politik? (b) Nama kebuah kitai ngumbai bala murid Jesus ke diiri ngena roh kudus nya pengari? (Nyengkaum nota ba baruh lambar.)

3 Jesus enda enggau bepolitik, tang iya madahka pasal Perintah Petara ti di serega, ke deka endur iya nyadi Raja. (Daniel 7:13, 14; Luke 4:43; 17:20, 21) Nya alai, lebuh Jesus ba mua Pontius Pilate ke nyadi Gabenor Rome, Jesus ulih madah: “Perintah aku ukai ari dunya tu.” (John 18:36) Bala murid Jesus nitihka teladan iya, talukka iya enggau Perintah iya, lalu madahka orang pasal Perintah nya. (Matthew 24:14) Rasul Paul nulis: ‘Nya alai, kami nyadika pengari Kristus, laban Petara bejaku ngena kami. Kami bebendar ngarika Kristus ngumbuk kita, mai kita bebaik enggau Petara.’ *2 Korint 5:20.

4. Baka ni orang Kristian ti bendar ngayanka penaluk ngagai Perintah Petara? (Peda kutak “ Orang Kristian Keterubah Enda Enggau Bepolitik”.)

4 Laban pengari ngarika menua bukai, sida enda masuk champur tauka nyukung parti politik ba menua ti endur sida nyadi pengari. Sida nyukung perintah ke diarika sida. Pia mega enggau bala murid Jesus ke udah dipilih nyadi “peranak serega.” (Pilipi 3:20) Kitai beterima kasih ke sida ketegal ransing ngerembaika injil  pasal Perintah Petara. Sida nulung bejuta iku “bedus ti bukai” ke enggi Jesus, ngambika ‘bebaik enggau Petara.’ (John 10:16; Matthew 25:31-40) “Bedus ti bukai” tu mega nyadi pengari Jesus, lalu nyukung sida ke diiri  ngena roh kudus. Kedua-dua raban tu begempung nyukung Perintah Petara, lalu enda nyukung politik ba dunya tu.—Bacha Isaiah 2:2-4.

5. Nama kebuah orang Kristian kemaya hari tu bebida ari orang Israel menya, lalu nama patut digaga sida?

5 Orang Kristian ti bendar enda nyukung politik ba dunya tu ukai ketegal sida taluk ke Jesus aja. Orang Israel menya diau ba siti menua aja, tang kemaya hari tu, orang Kristian diau ba serata dunya tu. (Matthew 28:19; 1 Peter 2:9) Nya alai, enti kitai nyukung parti politik, pengawa nginjil pasal Perintah Petara enggau penyerakup kitai deka rusak. (1 Korint 1:10) Pia mega, maya perang kitai engka belaban enggau bala sama pengarap iya ke patut dikerinduka kitai. (John 13:34, 35; 1 John 3:10-12) Nya alai, Jesus bisi kebuah ti manah ngasuh bala murid iya enda enggau beperang. Lalu, iya mega ngasuh sida rinduka munsuh sida.—Matthew 5:44; 26:52; peda kutak “ Kati Aku Tetap Enda Enggau Bepolitik?

6. Nama runding nuan pasal Raja Besai pengudah nuan nyerahka diri ngagai Petara?

6 Orang Kristian ti bendar nyerahka diri ngagai Petara, ukai ngagai mensia, gerempung mensia tauka bansa. Ku 1 Korint 6:19, 20: “Kita ukai enggi kita empu. Laban kita udah dibeli ngena rega ti besai.” Nya alai, taja pan “Raja Besai [pemerintah mensia]” patut nerima basa, chukai, sereta tunduk ti dikemendarka Petara, tang bala murid Jesus meri utai enggi Petara, ngagai Petara. (Mark 12:17; Rome 13:1-7) Tu nyengkaum sembah, pengerindu ti pengabis ati sereta penaluk ari sida. Sida mega sanggup nyerahka nyawa diri ketegal Petara.—Luke 4:8; 10:27; bacha Kereja Rasul 5:29; Rome 14:8.

 NGELABAN “ROH DUNYA”

7, 8. Nama reti “roh dunya,” lalu baka ni roh tu “bekereja” ba orang ke enda ngasika Petara?

7 Siti agi chara orang Kristian nyeraraka diri ari dunya iya nya ngelaban roh ti jai. Paul nulis, ‘Kitai udah nerima, ukai roh dunya, tang roh ti datai ari Petara.’ (1 Korint 2:12) Ngagai orang di Epesus, iya nyebut: ‘Kita agi diau nurutka . . . chara dunya, nitihka pemerintah ti merintah kuasa ti di langit, iya nya roh ti benung bekereja ba orang ke enda ngasika Petara.’—Epesus 2:2, 3.

8 “Roh” dunya nya kuasa ti enda ulih dipeda, ngasuh orang enda ngasika Petara sereta nitih “utai ti dikinginka tubuh, utai ti dikinginka mata.” (1 Timoti 6:9, 10; 1 John 2:16) “Kuasa” roh tu bisi ba tubuh ti enda sempurna. Iya enda ngetu nyerang kitai, lalu iya mega baka angin ke bisi ba dini-dini endur. Iya mega “bekereja” belubah-lubah ngasuh orang ngereja ulah ti enda manah baka berundingka diri empu aja, sumbung, amu, deka idup bibas sereta udu ngelaban. * Reti iya, roh dunya belubah-lubah ngasuh ulah Sitan tumbuh ba ati mensia.—John 8:44; Kereja Rasul 13:10; 1 John 3:8, 10.

9. Baka ni roh dunya ulih tama ngagai runding enggau ati kitai?

9 Kati ulih roh dunya tumbuh ba runding enggau ba ati nuan? Ulih, enti nuan enda bejimat. (Bacha Jaku Dalam 4:23.) Tu engka belubah-lubah datai ari kaul nuan enggau orang baka ke manah, tang iya enda rinduka Jehovah. (Jaku Dalam 13:20; 1 Korint 15:33) Nuan mega ulih nerima roh ti jai tu ari litaricha ke enda manah, pornografi tauka laman web orang ke nulak Jehovah, pemerindang ti enda manah enggau main ti bepekit.  Reti iya, roh dunya ulih datai ari sapa-sapa tauka sebarang utai ti ngayanka runding Sitan.

10. Baka ni kitai ulih ngelaban roh dunya ti jai?

10 Baka ni kitai ulih ngelaban roh dunya ti jai tu, lalu meruan dalam pengerindu Petara? Enggau ngena semua utai ti disediaka Jehovah ba pengarap sereta seruran besampi minta bantu ari roh kudus Iya. Jehovah  bekuasa agi ari Sitan tauka dunya Sitan ti jai tu. (James 4:7) Nya alai, kitai patut semak ngagai Jehovah dalam sampi!

NGINTU DIRI SERETA BEGARI ENGGAU CHARA TI PATUT

11. Baka ni roh dunya ngubah chara orang begari?

11 Chara ngintu diri, begari enggau nyaga pemeresi ulih nunjukka sapa orang nya. Nitihka seiku orang ke bejaku ba TV, chara begari ba mayuh menua majak enda manah, diatu nadai bida chara begari entara indu sundal enggau indu ke bukai. Indah nembiak indu ke agi mit “enda mereti begari sereta ngayanka tubuh,” nitihka siti riput ari surat kabar. Bisi mega orang enda kemas begari. Tu ngayanka ulah ti ngelaban, enda mereti enggau enda bebasaka diri.

12, 13. Nama ajar Bup Kudus pasal chara kitai ngintu diri sereta begari?

12 Nembiak Jehovah begari enggau kemas, beresi, manah dipeda, lalu betempat. Kitai “ngena gari ti patut,” enggau “ngereja pengawa ti badas” ke ngam enggau orang indu tauka orang lelaki iya ke ‘nangika Petara.’ Endang amat, tuju kitai ukai deka minta puji, tang ngambika ‘meruan dalam pengerindu Petara.’ (1 Timoti 2:9, 10; Jude 21) Ya, kitai deka bajik tauka sigat ‘ari ati . . . , ti pemadu berega di mua Petara.’—1 Peter 3:3, 4.

13 Kingatka, chara kitai ngintu diri sereta begari ulih ngubah chara orang meda pengarap ti bendar. Leka jaku Gerika “patut” reti iya bebasaka asai ati tauka runding orang bukai. Nya alai, kitai patut berundingka ati orang bukai, ukai peneka diri empu pasal chara ngintu diri sereta begari. Kelebih agi, kitai deka ngenataika basa ngagai Jehovah enggau nembiak Iya,  lalu ngayanka diri nyadi nembiak Petara ngereja ‘semua utai nya ke mulia Petara.’—1 Korint 4:9; 10:31; 2 Korint 6:3, 4; 7:1.

Kati chara aku ngintu diri, begari enggau nyaga pemeresi ngenataika basa ngagai Jehovah?

14. Pasal nyaga pemeresi enggau chara kitai begari, nama tanya ti patut ditanya kitai empu?

14 Chara ngintu diri, begari enggau nyaga pemeresi beguna bendar maya kitai nginjil tauka datai ngagai gempuru Kristian. Tanya diri empu: ‘Kati pemeresi enggau chara aku begari ngasuh orang udu beratika aku? Kati chara aku begari ngasuh orang enda nyamai ati? Kati aku ngira peneka diri empu pasal chara ngintu diri enggau begari, lebih agi ari utai ti ulih ngasuh aku megai pengawa ba endur gempuru?’—Pilipi 4:5; 1 Peter 5:6.

15. Nama kebuah Bup Kudus enda madahka enggau terang chara ngintu diri, begari enggau nyaga pemeresi?

15 Bup Kudus enda madahka enggau terang chara ngintu diri, begari enggau nyaga pemeresi ngagai orang Kristian. Jehovah enda nyekat kitai milih tauka chara kitai berunding. Tang Iya deka kitai nitihka ajar Bup Kudus, iya nya “matihka diri ngelala bida entara utai ti badas enggau utai ti jai.” (Hebrew 5:14) Kelebih agi, Jehovah deka kitai ngayanka pengerindu ngagai Iya enggau  orang bukai. (Bacha Mark 12:30, 31.) Taja pan bisi lalau ke baka tu, kitai agi bisi peluang milih mayuh macham chara ngintu diri enggau begari. Tu ulih dipeda kitai maya nembiak Jehovah ngena mayuh macham chura gari ba endur gempuru sida di serata dunya tu.

PUAS ATI ENGGAU PEMISI DIRI

16. Baka ni roh dunya limpang ari ajar Jesus, lalu nama tanya ti patut ditanya kitai empu?

16 Roh dunya ulih nipu sereta ngasuh bejuta iku orang ngumbai duit enggau reta, utai ti mai pengelantang. Tang Jesus madah: “Pengidup mensia ukai bepanggai ba pemayuh reta tengkira.” (Luke 12:15) Jesus nadai madah kitai enda begunaka duit tauka reta. Tang iya ngajar, pengelantang ba pengidup deka diulih  orang ke “seranta dalam roh” sereta puas ati enggau pemisi diri. Reti iya, sida ngenuluka kaul enggau Petara ba pengidup sida. (Matthew 5:3; 6:22, 23) Tanya diri empu: ‘Kati aku amat pechayaka ajar Jesus tu, tauka aku ditesatka “apai pemula”? (John 8:44) Nama diayanka ari jaku, tuju ati, utai ti dikemeratka, enggau chara pengidup aku?’—Luke 6:45; 21:34-36; 2 John 6.

17. Padahka sekeda penguntung ke diulih sida ke meruan puas ati enggau pemisi diri.

17 Bup Kudus madahka kitai, “kereja utai ti diasuh.” (James 1:22) Peratika sekeda penguntung ke diulih sida ke meruan puas ati enggau pemisi diri. Sida bulih pengelantang ti bendar maya ngereja peneka Petara. (Matthew 11:29, 30) Sida nyeliahka pengingin ati ti ulih ngemedis. (Bacha 1 Timoti 6:9, 10.) Puas ati enggau utai ti dikemisi nulung sida bisi mayuh agi awak enggau diri sebilik sereta bala menyadi Kristian. Sida ulih tinduk jenak. (Pengajar 5:12) Sida ngasaika pengaga ati ketegal ulih meri enggau naka ulih sida. (Kereja Rasul 20:35) Lalu, sida “penuh laban pengadang” sereta bisi pengelantang ba ati enggau runding. (Rome 15:13; Matthew 6:31, 32) Berekat tu amat berega!

RASUKKA ‘SEMUA SENYATA PETARA’

18. Baka ni Bup Kudus nerangka pasal munsuh kitai, chara iya nyerang kitai enggau chara kitai ngelaban iya?

18 Sida ke meruan dalam pengerindu Petara mega dijaga ari Sitan, ke enggai meda orang Kristian bulih pengelantang enggau pengidup belama iya. (1 Peter 5:8) Paul madah: “Kitai ukai beperang ngelaban isi enggau darah, tang ngelaban bala pemerintah, ngelaban perintah, ngelaban kuasa dunya ti petang tu, enggau ngelaban kuasa roh ti jai di langit.” (Epesus 6:12) Leka jaku  “ngelaban” nunjukka kitai belaban ukai ari jauh, tang semak. Pia mega, leka jaku “pemerintah,” “perintah,” enggau “kuasa dunya” nunjukka roh ti jai udah ngatur pelan nyerang kitai.

19. Terangka senyata ari Petara.

19 Taja pan kitai bisi pengelemi enggau pengurang, kitai ulih menang. Baka ni? Enggau ngerasukka ‘semua senyata Petara.’ (Epesus 6:13) Pasal senyata tu, Epesus 6:14-18 madahka: ‘Nya alai bediri kita, lalu tanchangka pemendar nyadika belulang ba punggung kita, enggau pengelurus nyadika terabai dada kita, enggau ati ti seruran sedia deka nusui Berita Manah pasal pemaik, nyadika kasut kita. Nambahka nya, ambi pengarap nyadika terabai kena kita madamka semua laja ti beapi-api ti ditimbakka Sitan. Lalu ambi pengelepas nyadika selapuk kebal kita, enggau jaku Petara nyadika pedang roh. Besampi dalam roh tiap kali kita besampi, ngena semua macham sampi enggau peminta.’

20. Nama kebuah perang kitai enda sebaka enggau perang soldadu amat?

20 Laban senyata tu disediaka Petara, kitai deka dijaga enti seruran ngena iya. Enda baka soldadu ke amat, ke engka bisi ngetu beperang, orang Kristian enda ngetu beperang nyentuk ke Petara ngemunaska dunya Sitan enggau muai bala antu ke dalam Lubang ti pemadu dalam. (Pemandang 12:17; 20:1-3) Nya alai, anang alah maya nuan ngelaban pengelemi diri tauka pengingin ti salah, laban semua kitai patut “mandam” diri empu ngambika mengkang tetap ati ngagai Jehovah. (1 Korint 9:27) Endang amat, kitai patut irau ati enti enda belaban!

21. Baka ni kitai ulih menang ba perang rohani?

21 Kelimpah ari nya, kitai enda ulih menang enti bepanggai  ba diri empu aja. Nya alai, Paul ngasuh kitai “seruran” besampi ngagai Jehovah. Kitai mega patut mendingka Jehovah enggau belajarka Bup Kudus sereta selalu begulai enggau bala “soldadu” Iya, laban kitai enda kediri aja ba perang rohani! (Pilimon 2; Hebrew 10:24, 25) Orang ke tetap ati ba pekara tu ukai aja deka menang, tang mega deka kering ba pengarap maya sida dilaban.

BESEDIA NGETANKA PENGARAP NUAN

22, 23. (a) Nama kebuah kitai patut selalu besedia ngetanka pengarap kitai, lalu nama tanya ti patut ditanya kitai? (b) Nama deka dipelajarka kitai ba Pelajar 6?

22 “Laban kita ukai enggi dunya,” ku Jesus, “nya alai dunya begedika kita.” (John 15:19) Nyadi, kitai patut selalu besedia ngetanka pengarap kitai. (Bacha 1 Peter 3:15.) Tanya diri empu: ‘Kati aku nemu nama kebuah Saksi-Saksi Jehovah kekadang enda sepenemu enggau orang mayuh? Lebuh aku ditekan ba penemu, kati aku amat pechayaka nama utai ti dipadah Bup Kudus enggau Orang ti Megai nya betul? (Matthew 24:45; John 17:17) Lalu, maya ngereja utai ti betul ba mata Jehovah, kati aku ukai semina besedia deka bebida, tang mega gaga ati ketegal bebida?’—Masmur 34:2; Matthew 10:32, 33.

23 Kesuah agi, pengeran kitai ke deka nyeraraka diri ari dunya deka diuji ngena chara ti enda dipeda. Chunto, baka ke udah dipadah, Sitan nguji nembiak Jehovah ngena pemerindang ba dunya tu. Baka ni kitai ulih milih pemerindang ti manah ke ulih ngasuh kitai lantang ati sereta bisi ati ti beresi? Pekara tu deka dipelajarka kitai ba Pelajar 6.

^ per. 3 Kenyau ari Pentikos 33 M., Jesus nyadi Raja atas murid iya ke diiri ngena roh kudus ba dunya tu. (Kolosi 1:13) Ba taun 1914, Jesus nerima kuasa merintah atas “perintah dunya.” Nya alai, diatu orang Kristian ke diiri ngena roh kudus nyadi pengari Perintah Petara.—Pemandang 11:15.

^ per. 8 Peda Reasoning From the Scriptures, lambar 389-393, dikeluarka Saksi-Saksi Jehovah.