“Intu ati kita beresi.”1 PETER 3:16.

1, 2. Nama kebuah orang begunaka lampu pichit maya bejalai malam hari, lalu baka ni lampu pichit disempamaka baka ati?

PIKIRKA seiku orang benung bejalai maya malam hari. Nama patut dibai iya ngambika enda labuh, lalu nentuka nadai utai nyadi ba iya? Iya patut ngemai lampu pichit dikena betenggauka jalai.

2 Enti nuan nadai lampu pichit, nuan enda ulih meda jalai. Nuan engka labuh tauka utai ti enda manah engka nyadi ba nuan. Lampu pichit ulih nyelamatka nuan. Iya disempamaka baka ati kitai ke diberi Jehovah. (James 1:17) Ati ulih ngiring kitai. Enti diguna enggau manah, ati ulih nulung kitai bulih pengidup ti menyana. Aram kitai beratika baka ni ati ulih diguna. Kitai deka berandauka: (1) Baka ni penemu ba ati ulih dilatih, (2) nama kebuah kitai patut berundingka ati orang bukai, lalu (3) baka ni ngetanka ati ti beresi ngenataika berekat.

NAMA RETI ATI, LALU BAKA NI ATI ULIH DIGUNA

3. Nama reti “ati,” lalu nama kebuah mensia enda baka utai idup ti bukai?

3 Dalam Bup Kudus, “ati” reti iya “penemu ba diri empu.” Enda baka utai idup bukai ba dunya tu, Petara ngaga kitai ngambika ulih ngelala diri empu. Kitai ulih meresa diri empu sereta ngelala utai ti betul enggau salah.  Ati baka hakim, iya ulih nulung kitai meresa pengawa, ulah enggau utai ti dipilih kitai. Iya nulung kitai ngaga pemutus. Enti kitai ngaga pemutus ti manah, kitai bulih pengelantang. Tang enti kitai ngaga pemutus ti salah, kitai deka bulih penusah.

4, 5. (a) Baka ni kitai nemu Adam seduai Hawa bisi penemu ba ati diri empu, lalu nama penyadi ketegal seduai iya ngelanggar ukum Petara? (b) Beri chunto nunjukka ati ti beresi ulih nulung nembiak Petara.

4 Kenyau ari pun mensia udah digaga ngembuan penemu ba ati diri empu. Adam seduai Hawa nunjukka diri bisi penemu ba ati diri empu. Seduai iya nemu malu pengudah bedosa. (Pemungkal 3:7, 8) Tang sayau amat, pengudah ngelanggar ukum Petara, ati seduai iya enda ulih nulung baka ke udah. Enggau tu, seduai iya sengaja ngelaban Petara Jehovah enggau ukum Iya. Laban sempurna, seduai iya nemu utai ti udah digaga diri. Nya alai, seduai iya enda ulih pulai baru ngagai Petara.

5 Enda baka Adam seduai Hawa, mayuh mensia ke enda sempurna nejuka diri diiring ati ti beresi. Chunto, Jop madah: “Aku enggai sekali-kali badu ngumbai diri ngena. Aku endang nemu diri nadai udah ngereja utai ti salah.” (Jop 27:6) Jop endang bisi ati ti beresi. Iya nejuka ati iya ngiring iya ngereja pengawa enggau ngaga pemutus. Nya alai, ati iya enda ngukum, ngemalu sereta nyalahka iya. Peratika bida entara Jop enggau David. Lebuh David enda bebasaka Saul, raja ke dipilih Jehovah, “David belabuh enda nyamai ati.” (1 Samuel 24:5) Tu mai penguntung ngagai David. Iya ngajar David ngambika enda ngulang penyalah nya agi.

6. Nama nunjukka semua orang bisi penemu ba ati?

6 Kati semina nembiak Jehovah ke bisi penemu ba ati? Peratika jaku rasul Paul: “Orang bansa bukai nadai  ngembuan Adat; tang tiap kali sida ngereja utai ti diletak Adat, nya nyadika adat sida, taja pen sida nadai ngembuan Adat. Pendiau sida nunjukka utai ti disebut Adat bisi ditulis dalam ati sida. Lalu ati sida ti beresi mega madahka nya; lalu sida charut runding, kadang-kadang ngumbai diri udah ngereja penyalah, lalu kadang-kadang ngumbai diri nadai udah ngereja penyalah.” (Rome 2:14, 15) Indah orang ke enda nemu ukum Jehovah kekadang diiring penemu ba ati sida nitihka ukum Jehovah.

7. Nama kebuah penemu ba ati kekadang ulih salah?

7 Taja pia, penemu ba ati kekadang ulih salah. Nama kebuah? Kingatka chunto lampu pichit. Enti iya deka abis bateri, iya enda ulih nenggau jalai enggau terang. Baka nya mega enggau penemu ba ati kitai. Enti kitai enda belajarka Bup Kudus, kitai engka enda ulih ngelala bida entara utai ti betul enggau salah. Pia mega, enti kitai bisi pengingin ati ti salah, penemu ba ati ulih mai kitai ngagai jalai ti salah. Ngambika penemu ba ati ulih diguna, kitai begunaka iring roh kudus Jehovah. Paul nulis: ‘Ati aku ti beresi diiring roh kudus lebuh aku besaksi.’ (Rome 9:1) Baka ni kitai ulih nentuka ati kitai sejalai enggau roh kudus Jehovah? Kitai patut matih iya.

BAKA NI PENEMU BA ATI ULIH DILATIH

8. (a) Baka ni pengingin ati ulih ngachau penemu ba ati, lalu nama patut dikemeratka kitai maya ngaga pemutus? (b) Nama kebuah bisi ati ti beresi aja enda chukup? (Peda nota ba baruh lambar.)

8 Baka ni nuan ulih ngaga pemutus nitihka penemu ba ati? Sekeda orang nitihka peneka ati maya ngaga pemutus. Sida engka ngumbai, “Tu enda ngachau aku.” Pengingin ati ulih ngachau penemu ba ati. Ku Bup Kudus: “Sapa nemu ati mensia? Nadai utai ti nemu agi ngakal  ari ati mensia. Iya kelalu balat sakit lalu enda ulih digeraika.” (Jeremiah 17:9) Enti pia, utai ti dikingin ati enda patut dikemeratka maya ngaga pemutus. Tang, kitai patut ngemeratka utai ti ngerinduka ati Petara Jehovah. *

9. Nama reti nangika Petara, lalu baka ni tu bekaul enggau penemu ba ati kitai?

9 Enti pemutus digaga nitihka penemu ba ati ke udah dilatih, nya nunjukka kitai nangika Petara, ukai nitihka pengingin ati diri empu. Chunto, Nehemiah bisi kuasa minta penyampau chukai ti patut dibayar orang ba Jerusalem. Tang, iya enda ngereja nya. Nama kebuah? Iya enggai ngenusahka nembiak Jehovah enggau ngasuh Iya enda lantang ati. Ku Nehemiah: ‘Aku enda baka nya, laban aku nangika Petara.’ (Nehemiah 5:15) Kitai patut nangika Apai ti di serega. Tu meransang kitai ngiga iring ari Bup Kudus maya ngaga pemutus.

10, 11. Nama ajar Bup Kudus pasal ai bisa ti patut diperatika, lalu baka ni kitai ulih nitihka iring Petara pasal pekara tu?

10 Chunto, peratika pasal ngirup ai bisa. Kitai ulih nanya diri empu, Ulih aku ngirup ai bisa maya begelumu? Kesatu, kitai patut berundingka nama ajar Bup Kudus pasal pekara tu. Bup Kudus madah Petara nadai nagang enti kitai ngirup ai bisa enggau pengumbas iya. Tang, Bup Kudus muji Jehovah ketegal meri wain kena ngelantangka ati mensia. (Masmur 104:14, 15) Taja pia, Bup Kudus nagang orang ke ngirup ai bisa kelalu mayuh  sereta kelalu ragak maya ngirup. (Luke 21:34; Rome 13:13) Nambahka nya, Bup Kudus madah mabuk nya penyalah ti besai, sama baka ngereja ulah ti kamah. *1 Korint 6:9, 10.

11 Orang Kristian nitihka ajar Bup Kudus kena matih penemu ba ati iya. Enggau tu, iya ulih ngelala bida entara utai ti betul enggau salah. Nya alai, maya ngaga pemutus sekalika deka ngirup ai bisa tauka enda, kitai patut nanya diri empu: ‘Nama kebuah pengawa begelumu nya diatur? Kati iya ragak sereta enda ulih ditagang? Baka ni aku empu deh? Kati aku begunaka ai bisa kena rari ari penusah? Kati aku tetagangka diri deka ngirup?’ Lebuh beratika ajar Bup Kudus enggau berundingka tanya tu, kitai patut besampi minta iring ari Jehovah. (Bacha Masmur 139:23, 24.) Enggau tu, kitai minta Jehovah ngiring kitai ngena roh kudus Iya. Kitai mega matih ati kitai ngambika sejalai enggau ajar Bup Kudus. Tang, bisi agi utai ti patut diperundingka kitai maya ngaga pemutus.

NAMA KEBUAH KITAI PATUT BERUNDINGKA ATI ORANG BUKAI?

Ati ti dilatih ngena Bup Kudus ulih nulung nuan nentuka sekalika ulih ngirup ai bisa tauka enda

12, 13. Nama kebuah penemu ba ati orang Kristian enda sebaka, lalu baka ni kitai mutarka pekara tu?

12 Nuan engka enda nyangka penemu ba ati orang Kristian enda sebaka. Sekeda ngumbai siti-siti pengawa nya enda salah; sekeda agi ngumbai iya salah. Chunto, bisi orang ngumbai enda salah ngirup ai bisa maya begelumu enggau pangan diri. Tang, bisi sekeda orang enda nyamai ati enggau pengawa nya. Nama kebuah ati  sida tau enda sebaka, lalu baka ni tu bekaul enggau pemutus ti deka digaga kitai?

13 Mayuh kebuah ati orang enda sebaka enggau pangan diri. Chara pengidup sida enda sebaka. Bisi mega nemu pengelemi diri laban kala tusah muai pengawa ti ditagang Bup Kudus. (1 Raja 8:38, 39) Chunto, orang ke kala gian ngirup enda nyamai ati enti meda ai bisa. Enti iya datai ke rumah nuan, ati iya engka nagang iya ngirup ai bisa. Patut nuan enda nyamai ati? Patut nuan ngansak iya ngirup? Enda. Sekalika nuan nemu kebuah iya enggai ngirup tauka enda, pengerindu nuan ngagai iya deka ngasuh nuan berundingka ati iya.

14, 15. Nama utai ti ngasuh ati orang Kristian maya kurun keterubah enda sebaka, lalu nama dipadah Paul?

14 Rasul Paul beratika penemu ba ati orang Kristian maya kurun keterubah selalu enda sebaka enggau pangan diri. Bisi sekali, sekeda orang Kristian enda nyamai ati pasal pemakai ti udah diberi ngagai engkeramba ke dijual ba kedai. (1 Korint 10:25) Tang, tu enda ngachau ati Paul. Paul nemu engkeramba ukai utai idup, lalu semua pemakai datai ari Jehovah sereta enggi Iya. Paul mega nemu, orang bukai enda sepenemu enggau iya pasal utai tu. Sekeda engka nyembah engkeramba sebedau nyadi orang Kristian. Nya alai, sebarang utai ti bisi kaul enggau nyembah engkeramba ulih ngasuh sida enda nyamai ati. Baka ni Paul mutarka pekara tu?

15 Paul madah: ‘Kitai ke kering patut sabar enggau orang ke lemi, lalu ukai deka ngelantangka diri empu aja. Laban Kristus ukai datai ngelantangka diri.’ (Rome 15:1, 3) Nitihka Paul ditu, kitai patut berundingka ati bala menyadi Kristian, baka Jesus empu. Pasal pekara tu, Paul madah iya tau enda makai dagin enti nya  ngasuh bala menyadi Kristian enda nyamai ati.—Bacha 1 Korint 8:13; 10:23, 24, 31-33.

16. Nama kebuah kitai enda tau ngakim ati orang bukai?

16 Pia mega, anang ngansak orang nitihka penemu ba ati kitai. Awakka sida ngereja utai nitihka penemu ba ati sida empu. (Bacha Rome 14:10.) Kitai ngena ati ngakim diri empu, ukai ngakim orang bukai. Kingatka jaku Jesus: “Anang ngakim, ngambika kita enda diakim.” (Matthew 7:1) Semua kitai patut nyeliahka diri ari ngakim pemutus ti udah digaga orang bukai nitihka ati sida empu. Tang, kitai patut ngiga chara nambahka pengerindu enggau penyerakup, ngeringka pangan diri, ukai ngelabuhka pangan diri.—Rome 14:19.

BAKA NI ATI TI BERESI NGENATAIKA BEREKAT

Ati ti beresi ulih ngiring kitai dalam pengidup, sereta mai pengelantang ba ati enggau runding

17. Nama penyadi enggau ati mayuh orang kemaya hari tu?

17 Rasul Paul nulis: “Bepegai . . . ba ati ti beresi.” (1 Timoti 1:19) Bisi ati ti beresi ba mata Jehovah nya berekat. Kemaya hari tu mayuh orang nadai ati ti beresi. Paul ngumbai sida bisi “ati ti asai ke disar ngena besi ti angat.” (1 Timoti 4:2) Besi ti angat ngasuh kulit betu, lalu ninggalka bekau betu sereta enda ulih ngasai. Mayuh ati orang enda ulih ngasai tauka nagang sida ari ngereja utai ti salah. Ati sida enda nemu malu tauka ngasaika diri salah, taja pan ngereja penyalah.

18, 19. (a) Nama pemanah enti ati kitai ulih ngasaika diri salah? (b) Nama patut digaga enti ati kitai terus nyalahka kitai ketegal kala ngereja penyalah, taja pan udah nesal ati?

18 Iya ke amat, enti kitai ngasaika diri salah, reti iya ati ti beresi madahka kitai udah ngereja penyalah. Ngasaika diri salah ulih meransang kitai nesal ati ke penyalah ti udah digaga. Indah penyalah ti besai pan engka ulih diampun enti kitai enda ngulang penyalah nya.  Chunto, Raja David kala ngereja penyalah ti besai. Tang, iya diampun ketegal amat nesal ati ke penyalah diri. Iya begedika penyalah iya, lalu enggau naka ulih ngasika ukum Jehovah. Tu nulung David nemu Jehovah nya “manah . . . sereta ngampun.” (Masmur 51:1-19; 86:5) Tang baka ni enti kitai agi ngasaika diri salah, taja pan kitai udah nesal ati?

19 Kekadang, ati balat nyalahka diri taja pan kitai udah nesal ati. Tang anang enda ingat, Jehovah besai agi ari ati kitai. Kitai patut pechaya, lalu nerima pengerindu sereta pengampun ari Iya. (Bacha 1 John 3:19, 20.) Kelimpah ari nya, ati ti beresi ngenataika pengelantang ba ati enggau runding. Mayuh orang ke udah ngereja penyalah ti besai ngasaika utai tu, lalu sida  ulih ngetanka ati ti beresi maya nyembah Petara Jehovah.—1 Korint 6:11.

20, 21. (a) Nama kebuah bup tu digaga? (b) Nama peluang ti dikemisi kitai, lalu baka ni kitai patut ngena iya?

20 Bup tu digaga kena nulung nuan bulih pengelantang enggau ngetanka ati ti beresi ba dunya ke dipegai Sitan tu. Endang amat, bup tu enda nerangka semua ukum enggau ajar ari Bup Kudus ke patut dikena nuan maya bisi penusah. Pia mega, anang ngarapka pekara ti bekaul enggau ati ti beresi digaga nyadi ukum ti betulis. Kebuah bup tu digaga kena nulung nuan belajar enggau nitihka ajar Bup Kudus dalam pengidup nuan. Tu deka matih enggau nyediaka ati nuan, ngambika nulung nuan ngelala bida entara utai ti betul enggau salah.  Adat Moses ngasuh orang nitihka adat ti betulis. Tang, “adat Kristus” ngasuh kitai idup nitihka ajar Bup Kudus enggau ati ti beresi. (Galatia 6:2) Enggau tu, Jehovah meri kitai mayuh agi peluang milih. Taja pia, Bup Kudus nagang kitai ngena peluang nya “ngelalaika penyai.” (1 Peter 2:16) Kitai patut ngena peluang nya ngayanka pengerindu ngagai Jehovah.

21 Enggau besampi sereta berundingka chara ti manah nitihka ajar Bup Kudus lalu ngereja iya, nuan deka neruska pengawa manah ke udah digaga nuan maya nuan baru ngelala Jehovah. Nuan “matihka diri ngelala bida entara utai ti badas enggau utai ti jai.” (Hebrew 5:14) Ati ti dilatih ngena Bup Kudus ngenataika berekat ngagai nuan ninting hari. Baka lampu pichit ke ulih nenggau jalai nuan, ati ti beresi ulih nulung nuan ngaga pemutus ti ngerinduka ati Apai ti di serega. Tu nulung nuan meruan dalam pengerindu Petara.

^ per. 8 Bup Kudus madah bisi ati ti beresi aja enda chukup. Chunto, Paul madah: “Aku nadai nemu diri udah ngereja penyalah, tang ukai reti nya aku nadai penyalah. Tuhan ke ngakim aku.” (1 Korint 4:4) Indah Paul ke merinsa orang Kristian menya engka ngereja nya ari ati ti beresi, laban sida ngumbai Petara ngemendarka pengawa sida. Nya alai, ati kitai ukai semina beresi ba mata kitai empu, tang mega beresi ba mata Petara.—Kereja Rasul 23:1; 2 Timoti 1:3.

^ per. 10 Mayuh lutur madah orang ke gian ngirup enda ulih ngirup ai bisa, taja pan pengumbas iya; ba sida, “pengumbas iya” reti nya sida enda tau ngirup ai bisa agi.