Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

‘Meruan Dalam Pengerindu Petara’

 PENERANG

Nabi Bendira, Ngundi, Sereta Pengawa Bekaul Enggau Soldadu

Nabi Bendira, Ngundi, Sereta Pengawa Bekaul Enggau Soldadu

Nabi bendira. Saksi-Saksi Jehovah pechaya ngendukka pala tauka nabi bendira maya lagu menua ditebah, bekaul enggau pengawa nyembah menua tauka pemerintah, ukai nyembah Jehovah. (Isaiah 43:11; 1 Korint 10:14; 1 John 5:21) Chunto, Raja Nebukadnesar ari Babilon menya udah nirika siti engkeramba ke nunjukka pemesai kuasa enggau pengarap iya. Iya ngasuh rayat iya meremi lalu nyembah engkeramba nya maya musik lagu menua ditebah. Taja pia, tiga iku nembiak Hebrew—Sadrak, Mesak, enggau Abednego—enggai meremi lalu nyembah engkeramba nya, taja pan diukum mati.—Daniel, bab 3.

Orang ke landik pasal sejarah, Carlton Hayes nulis, bendira nyadi lambang pengarap kemaya hari tu. Iya madah, “Orang ke lelaki muka topi maya bendira dibai mansa; penulis muji bendira ba karang sida, lalu anak mit belagu muji bendira.” Iya mega madahka pengawa rinduka menua bisi “hari kudus,” baka Hari Besai Menua, “hari bala rasul enggau raban pejuang”, di Amerika Serikat. Ba Brazil, tuai kot soldadu ngumbai: “Bendira patut dipuji enggau disembah . . . baka Menua Diri Empu ke patut  disembah.” The Encyclopedia Americana kala madah, “bendira nya kudus baka tanda regang.”

Apin lama ti udah, ensiklopedia ti sama madahka lagu menua “nya chara nunjukka diri rinduka menua, lalu nyengkaum sampi minta iring ari Petara ngambika nyaga rayat sereta pemerintah sida.” Nya alai, nembiak Jehovah ukai berundingka diri empu aja maya sida ngumbai pengawa nabi bendira enggau belagu lagu menua nya bekaul enggau pengarap. Lebuh nyebut pasal bala anak Saksi-Saksi Jehovah ke enggai nabi bendira tauka besumpah ba sekula di Amerika Serikat, bup The American Character madah: “Kot Besai udah ngaku ba sekeda kes pengawa ke digaga ninting hari nya bekaul enggau pengarap.”

Taja pan nembiak Jehovah enda enggau sekeda pengawa ke enda sejalai enggau ajar Bup Kudus, sida enda nagang orang bukai nyembah bendira menua. Sida mega bebasaka bendira menua nyadi lambang sereta ngaku pemerintah nyadi “perintah ti megai menua” sereta nyadi ‘ulun Petara.’ (Rome 13:1-4) Nya alai, Saksi-Saksi Jehovah nitihka pesan besampi “ke raja enggau ke semua orang ke megai kuasa.” Tuju kitai ‘ngambika kitai diau likun dalam pemaik, nangi sereta bebasaka Petara ngena chara ti patut.’—1 Timoti 2:2.

Ngundi maya bepilih. Orang Kristian ke bendar bebasaka hak orang bukai ngundi. Sida enda ngelaban pengawa bepilih, lalu sida bekerejasama enggau sapa-sapa ke menang ba pengawa bepilih. Tang, sida enda masuk champur enggau sebarang parti politik. (Matthew 22:21; 1 Peter 3:16) Nama patut digaga orang Kristian enti sida diasuh ngundi tauka balat ditekan ngambika enggau ngundi? Kingatka Sadrak, Mesak, enggau Abednego ke udah ngagai emperan Dura. Orang Kristian mega ulih ngagai endur ngundi enti iya deka. Tang, iya enda patut  nyukung sebarang parti. Iya patut beratika enam pekara ditu:

  1. Bala murid Jesus “ukai enggi dunya.”—John 15:19.

  2. Orang Kristian ngarika Jesus enggau Perintah iya.—John 18:36; 2 Korint 5:20.

  3. Gerempung Kristian sepenemu ba pengarap, lalu sida begempung enggau pangan diri ketegal pengerindu ti bendar.—1 Korint 1:10; Kolosi 3:14.

  4. Sida ke ngundi orang ke bepilih betanggungjawap ke pengawa diri.—Peratika ajar Bup Kudus pasal pekara tu ba 1 Samuel 8:5, 10-18 enggau 1 Timoti 5:22.

  5. Jehovah ngumbai orang Israel ke keran milih mensia nyadi pemerintah nunjukka sida nulak Iya.—1 Samuel 8:7.

  6. Orang Kristian bibas madah pasal Perintah Petara ngagai semua orang enda ngira ni bagi parti politik ke disukung orang.—Matthew 24:14; 28:19, 20; Hebrew 10:35.

Pengawa bekaul enggau soldadu. Ba sekeda menua, pemerintah ngasuh orang ke nulak pengawa bekaul enggau soldadu ngereja pengawa baka ngaga jalai alun, sekula, enggau sepital ba timpuh ti ditetapka. Maya tu kitai patut besampi, lalu ngaga pemutus enggau manah. Kitai mega ulih berandau enggau bala menyadi Kristian ke kering ba pengarap, lalu ngaga pemutus nitihka ati ti beresi.—Jaku Dalam 2:1-5; Pilipi 4:5.

Bup Kudus ngasuh kitai “nunduk ngagai orang ke megai perintah enggau ngagai orang ke megai kuasa, . . . lalu sedia deka ngereja pengawa ti badas,” sereta “siru enggau orang.” (Titus 3:1, 2) Enggau tu, kitai patut nanya diri empu: ‘Kati aku nyukung politik tauka bekaul enggau pengarap pelesu enti aku nerima pengawa bekereja ke orang mayuh?’ (Mikah 4:3, 5; 2 Korint 6:16, 17) ‘Kati pengawa nya ngasuh aku tusah tauka nagang aku ari bejalaika tanggungjawap  nyadi orang Kristian?’ (Matthew 28:19, 20; Epesus 6:4; Hebrew 10:24, 25) ‘Kati pengawa bekereja ke orang mayuh nya ulih nulung aku ngemansangka pengarap diri, baka nyadi pengerintis?’—Hebrew 6:11, 12.

Enti ati orang Kristian enda nagang iya bejalaika pengawa bekereja ke orang mayuh ari ke tama jil, bala menyadi Kristian ke bukai patut masa pemutus iya. (Rome 14:10) Tang, enti iya ngasaika diri enda ulih bejalaika pengawa nya, orang bukai mega patut masa pemutus iya nya.—1 Korint 10:29; 2 Korint 1:24.