Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

‘Meruan Dalam Pengerindu Petara’

 PENERANG

Mutarka Penanggul ba Pengawa Dagang

Mutarka Penanggul ba Pengawa Dagang

Ba 1 Korint 6:1-8, rasul Paul madah pasal menyadi ke sama pengarap ke ngena undang-undang mutarka penanggul. Iya enda lantang ati laban sekeda orang Kristian ba Korint berani “ngagai kot lalu minta diri diatur orang kapir.” (Ayat 1) Paul nerangka kebuah orang Kristian enda patut bedawa pangan diri ba kot, tang sida patut mutar penanggul nitihka atur ti udah diberi ngagai gerempung. Aram kitai berandauka kebuah atur nya diberi sereta beratika sekeda pekara ti enda bepanggai ba atur ari Bup Kudus.

Enti kitai bisi penanggul ba pengawa dagang enggau menyadi Kristian, kitai patut mutarka iya nitihka chara Jehovah, ukai nitihka chara kitai. (Jaku Dalam 14:12) Baka ke dipadah Jesus, penanggul nya patut diputarka enggau jampat sebedau iya nyadi laya besai. (Matthew 5:23-26) Tang sayau amat, sekeda orang Kristian belaya, lalu mai penanggul nya ngagai kot. Paul madah: “Enti kita nyara pangan diri, nya nunjukka kita endang udah alah.” Nama kebuah? Laban nya ulih ngerusakka nama Petara enggau gerempung kitai. Nya alai, kitai patut beratika tanya Paul tu: “Nama kebuah enda nejuka orang ngereja utai ti salah ngagai kita?”—Ayat 7.

Paul mega madahka Petara udah meri atur ti manah ngagai gerempung kena mutarka penanggul. Sida tuai gempuru bisi ngembuan penemu ti bendar ari Bup Kudus, lalu Paul madahka sida ulih “ngatur pekara entara . . . diri  menyadi” enti iya bekaul enggau “utai ti dalam pengidup tu!” (Ayat 3-5) Jesus madahka tu nyengkaum laya ti besai, baka betenah enggau nipu, patut diputarka ngena tiga chara tu: kesatu, orang ke bisi laya patut mutarka penusah entara seduai iya empu dulu; kedua, enti enda mujur, seduai iya patut mai seiku tauka dua iku saksi; lalu ketiga, enti agi enda mujur, seduai iya patut mai pekara nya ngagai sida tuai gempuru.—Matthew 18:15-17.

Sida tuai gempuru endang ukai luyar tauka orang bedagang ke netapka atur kena mutarka penanggul ba pengawa dagang entara menyadi Kristian. Tang, tuai gempuru nulung sida nitihka atur ari Bup Kudus kena mutarka penanggul enggau manah. Ba penanggul ti besai, sida ulih minta bantu ari tuai ti ngabas tauka pampang opis Saksi-Saksi Jehovah. Taja pia, jaku lalau Paul enda nyengkaum semua penanggul. Nya alai, bisi sekeda penanggul ti patut diputarka ngena undang-undang. Nama penanggul nya?

Ba sekeda pekara, mutarka penanggul enggau manah ba kot nitihka undang-undang endang patut. Chunto, mutarka pengawa sarak, hak nyaga anak, meri duit belanja, mayar duit pampas insuran, ngemendarka ungkup pesaka sereta kena madahka diri tengkerap ba kes orang ke berutang. Bisi mega sekeda kes ti ngasuh menyadi Kristian ngena undang-undang ngambika ulih ngelindung diri. *

Enti ngena undang-undang enggau kebuah ti manah, nya enda ngelaban jaku lalau Paul. * Taja pia, orang Kristian patut nguduska nama Jehovah, lalu nyaga pemaik enggau penyerakup ba gerempung. Bala murid Jesus bisi pengerindu, lalu “pengerindu enda berundingka diri empu.”—1 Korint 13:4, 5; John 13:34, 35.

^ per. 2 Taja pan jarang nyadi, orang Kristian engka ngereja penyalah ti besai ngagai pangan diri—baka ngerugul, nyerang, munuh, tauka ngenchuri. Ba kes tu, orang Kristian ulih ngaga riput ngagai orang ke bekuasa.

^ per. 3 Ke penerang mayuh agi, peda The Watchtower 15 Mac 1997, lambar 17-22, enggau 15 Oktober 1991, lambar 25-28.