Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 PELAJAR 6

Baka Ni Milih Pemerindang ti Badas

Baka Ni Milih Pemerindang ti Badas

‘Kereja semua utai nya ke mulia Petara.’1 KORINT 10:31.

1, 2. Nama deka digaga nuan maya milih pemerindang?

PIKIRKA nuan deka makai sigi buah apel, tang udah nya nuan meda iya bisi jai. Nama deka digaga nuan? Nuan ulih: (1) makai buah nya nyengkaum iya ke jai, (2) muai buah nya nyengkaum iya ke manah, tauka (3) muai begian ke jai, lalu makai begian ke manah. Ni bagi dipilih nuan?

2 Pemerindang mega baka buah nya. Bisi maya nuan deka merindang diri, tang nuan beratika mayuh pemerindang kemaya hari tu ngayanka ulah ti jai. Nya alai, nama deka digaga nuan? Sekeda nerima semua pemerindang enda ngira iya manah tauka jai. Bisi mega nyeliahka semua pemerindang ngambika ulah enggau runding sida enda dilimpangka. Iya ke bukai bejimat nyeliahka pemerindang ti jai, lalu merindang diri enggau pemerindang ti manah. Ni bagi dipilih nuan ngambika meruan dalam pengerindu Petara?

3. Nama deka dikerandauka kitai diatu?

3 Mayuh ari kitai milih iya ketiga. Kitai endang begunaka pemerindang, tang milih iya ke manah. Nya alai, kitai patut nentuka ni bagi pemerindang ke manah enggau iya ke jai. Keterubah, aram kitai berandauka  baka ni pemerindang ti dipilih kitai bisi kaul enggau Jehovah.

‘KEREJA SEMUA UTAI NYA KE MULIA PETARA’

4. Baka ni kitai ke udah nyerah diri ngagai Petara bisi kaul enggau chara kitai milih pemerindang?

4 Seiku Saksi ke udah tuai, iya ke udah dibaptisa ba taun 1946 madahka: “Aku nentuka diri bisi datai ba tiap iti ceramah baptisa, lalu mendingka enggau manah, baka ke aku empu deka dibaptisa.” Nama kebuah? Iya nerangka, “Seruran ingatka diri udah nyerahka diri empu ngagai Petara, ulih nulung aku meruan tetap ati ke Iya.” Nuan tentu setuju enggau utai ku iya. Ingatka semaya diri deka ngena pengidup nuan nyembah Jehovah meransang nuan ngambika ulih betan. (Bacha Pengajar 5:4.) Iya mega nulung nuan beratika peneka Jehovah enggau utai bukai ba pengidup nuan, nyengkaum pemerindang ke sejalai enggau penemu Petara. Rasul Paul nerangka utai tu maya iya nulis ngagai orang Kristian jeman iya suba: ‘Nemuka kita makai tauka ngirup, tauka ngereja sebarang utai, kereja semua utai nya ke mulia Petara.’—1 Korint 10:31.

5. Baka ni Adat Lewi 22:18-20 nulung kitai nemu reti ayat ba Rome 12:1?

 5 Semua utai ke digaga kitai ba pengidup bekaul enggau sembah kitai ngagai Jehovah. Dalam surat iya ngagai orang Rome, Paul ngena leka jaku ti ulih meransang bala sama pengarap. Ku iya: ‘Aku minta kita nyerahka tubuh kita nyadi piring[pemeri] ti idup, ti kudus, ti dikerinduka Petara. Nya meh jalai kita patut nyembah Iya.’ (Rome 12:1) Tubuh kitai nyengkaum runding, ati, enggau pengering. Semua tu dikena kitai nyembah Petara. (Mark 12:30) Paul ngumbai sembah ti pengabis ati nya pemeri. Jaku tu bisi reti. Nitihka Adat Moses, pemeri ti bisi penimpang enda diterima Petara. (Adat Lewi 22:18-20) Baka nya mega, enti sembah kitai enda tuchi, iya mega enda diterima Petara. Nama kebuah?

6, 7. Baka ni orang Kristian ngasuh tubuh iya enda tuchi, lalu nama penyadi iya?

6 Paul ngelalau orang Kristian ba Rome: “Anang . . . nyerahka tubuh kita ngagai dosa.” (Rome 6:12-14) Ba Rome 3:13-18, Paul nerangka pengawa ti ngasuh tubuh bedosa. Pasal mensia ti bedosa, ku Bup Kudus: “Nyawa sida penuh laban jaku sumpah.” Orang Kristian ngasuh tubuh iya enda tuchi enti iya ngena tubuh iya ngereja pengawa ti bedosa. Chunto, enti orang Kristian kemaya hari tu sengaja meda utai ti enda manah, baka pornografi tauka cherita ti ngayanka pengawa balat ngemedis orang bukai, iya “nyerahka [mata iya] ngagai dosa,” lalu ngasuh tubuh enda tuchi. Sembah iya ke enda agi tuchi enda diterima Petara. (Ulang Adat 15:21; 1 Peter 1:14-16; 2 Peter 3:11) Naka meh pengerugi enti milih pemerindang ti jai!

 7 Pemerindang ti dipilih orang Kristian ulih meri penguntung tauka pengerugi ngagai sida. Nya alai, kitai deka milih pemerindang ti ngemansangka, ukai ngamahka sembah kitai ngagai Petara. Aram kitai berandauka baka ni kitai ulih nentuka sekalika pemerindang nya manah tauka jai.

“BEGEDIKA PENYAI”

8, 9. (a) Padahka dua bengkah pemerindang. (b) Nama pemerindang ti patut diseliahka kitai, lalu nama kebuah?

8 Pemerindang bisi dua bengkah: (1) pemerindang ti patut diseliahka orang Kristian, enggau (2) pemerindang ti engka ulih diterima orang Kristian. Keterubah, aram kitai berandauka pemerindang ti patut diseliahka orang Kristian.

9 Baka ke dipadah ba Pelajar 1, sekeda pemerindang ngayanka pengawa ti ditagang Bup Kudus. Chunto, laman Web, cherita wayang, program TV sereta lagu ti nyebut pasal beleman, bemanang enggau angkunka reta, ngayanka pornografi tauka ulah ti kamah enggau jai. Ketegal pemerindang tu ngerusak ulah, lalu enda sejalai enggau Bup Kudus, orang Kristian patut nyeliahka iya. (Kereja Rasul 15:28, 29; 1 Korint 6:9, 10; Pemandang 21:8) Enggau nulak pemerindang ti jai, nuan nunjukka diri ngagai Jehovah nuan endang “begedika penyai,” lalu seruran ‘ngelengkaka penyai.’ Enggau tu, nuan bisi “pengarap ti bendar.”—Rome 12:9; Masmur 34:14; 1 Timoti 1:5.

10. Nama runding pasal pemerindang ti ulih ngenusah, lalu nama kebuah?

10 Sekeda engka ngumbai pemerindang ti ngayanka ulah ti jai enda ngawa. Ku sida, ‘Aku semina meda  cherita ba wayang tauka ba TV, tang aku enda nunda ulah jai ba cherita nya.’ Runding ti baka nya nipu sereta ulih ngenusah. (Bacha Jeremiah 17:9.) Kati kitai amat “begedika penyai” enti kitai rindu meda cherita ti ditagang Jehovah? Enti kitai suah meda penyai, ati kitai enda ulih ngelala bida entara utai ti betul enggau salah. (Masmur 119:70; 1 Timoti 4:1, 2) Tu ulih ngubah ulah kitai tauka runding kitai pasal pengawa salah ke digaga orang bukai.

11. Baka ni jaku ba Galatia 6:7 nya betul pasal pemerindang?

11 Tu endang bisi nyadi. Sekeda orang Kristian ngereja penyai, laban sida udu meda cherita ti ditagang Bup Kudus. Sida bulih pemedis, lalu nemu diri “ngetau utai ti ditanam.” (Galatia 6:7) Tang, pemedis tu ulih diseliahka. Enti nuan ngisi runding enggau utai ti manah, nuan deka bulih penguntung.—Peda kutak “ Nama Pemerindang ti Patut Dipilih Aku?

NGAGA PEMUTUS NITIHKA AJAR BUP KUDUS

12. Baka ni Galatia 6:5 nulung kitai milih pemerindang, lalu nama iring ti dikemisi kitai kena ngaga pemutus?

12 Aram kitai berandauka sebengkah agi pemerindang, iya nya pemerindang ti ngayanka pengawa ti enda ditagang tauka dikemendarka Bup Kudus enggau terang. Lebuh milih pemerindang ke baka tu, orang Kristian patut mutuska diri empu pemerindang ti badas. (Bacha Galatia 6:5.) Taja pia, kitai bisi iring maya ngaga pemutus tu. Bup Kudus ngembuan ajar tauka batang ajar ke ulih nulung kitai nemu chara Jehovah berunding. Enggau beratika ajar tu, kitai nemu  “semua peneka Tuhan” nyengkaum pemerindang ti dipilih kitai.—Epesus 5:17.

13. Nama ulih nulung kitai nyeliahka sebarang pemerindang ti enda dikerinduka Jehovah?

13 Tang kitai nemu, ukai semua orang Kristian bisi runding ti sama pasal utai ti manah enggau jai. (Pilipi 1:9) Pia mega, orang Kristian engka enda sebaka utai ti dikerindu ba pemerindang. Nya alai, kitai enda  ulih ngumbai semua orang Kristian ngaga pemutus ti sama. Taja pia, enti kitai nejuka ajar Bup Kudus nyaga runding enggau ati, kitai deka nyeliahka sebarang pemerindang ti enda dikerinduka Jehovah.—Masmur 119:11, 129; 1 Peter 2:16.

14. (a) Nama patut diperundingka nuan lebuh milih pemerindang? (b) Baka ni kitai mengkang ngemeratka sembah ngagai Petara ba pengidup?

14 Lebuh milih pemerindang, nuan mega patut ngira jam nuan. Taja pan pemerindang nya ulih diterima, penyampau jam ke dikena nuan nunjukka nama utai ti dikemeratka nuan. Endang amat, sembah ngagai Petara utai ti pemadu beguna ba orang Kristian. (Bacha Matthew 6:33.) Nama ulih digaga nuan ngambika sembah ngagai Petara mengkang dikemeratka ba pengidup nuan? Rasul Paul madah: “Idup enggau bejimat, ukai baka orang ke beli, tang baka orang ke bepenemu-dalam. Kena semua peluang kita enggau badas.” (Epesus 5:15, 16) Netapka penyampau jam ba pemerindang nulung nuan mayuh agi awak kena “milih utai ti pemadu badas,” iya nya pengawa ti ulih ngemansangka pengarap nuan.—Pilipi 1:10.

15. Nama kebuah kitai patut berundingka naka ni pemerindang nya ulih diterima?

15 Kitai mega patut berundingka naka ni pemerindang nya ulih diterima. Nama reti iya? Peratika chunto buah apel tadi. Kitai ukai semina muai senentang ke jai aja, tang mega nentuka naka ni ke patut dibuai. Nya alai, kitai patut nentuka naka ni pemerindang nya ulih diterima. Orang Kristian ukai semina nyeliahka pemerindang ti ditagang Bup Kudus, tang mega nyeliahka pemerindang ti enda entu jai tauka  nyengkaum pengawa ke ulih ngerusak kaul kitai enggau Jehovah. (Jaku Dalam 4:25-27) Nitihka ajar Bup Kudus ulih nulung nuan ngereja nya.

UTAI “TI TUCHI”

Nitihka ajar Bup Kudus maya milih pemerindang nyaga kitai ngambika enda lemi ba pengarap

16. (a) Baka ni kitai nunjukka diri ngembuan runding Jehovah ba pengidup? (b) Nama kebuah nitihka ajar Bup Kudus patut nyadi jalai pengidup nuan?

16 Lebuh milih pemerindang, orang Kristian patut berundingka penemu Jehovah. Bup Kudus madahka pengasai ati Jehovah enggau ukum Iya. Chunto, Raja Solomon madahka sekeda utai ti dipegedika Jehovah, baka “dilah ti bula, jari ti munuh orang ke nadai penyalah, ati ti berundingka akal ti jai, kaki ti beguai bejalaika ngereja penyai.” (Jaku Dalam 6:16-19) Baka ni runding Jehovah bekaul enggau nuan? Ku pemasmur: ‘Jehovah rinduka orang ke begedika penyai.’ (Masmur 97:10) Pemerindang ke dipilih nuan patut nunjukka nuan begedika utai ti dipegedi Jehovah. (Galatia 5:19-21) Kingatka mega, utai ti digaga nuan maya kediri nunjukka sapa nuan ke bendar. (Masmur 11:4; 16:8) Nya alai, enti nuan ngayanka pengasai ati Jehovah ba pengidup, nuan deka seruran  milih pemerindang nitihka ajar Bup Kudus. Tu meh jalai pengidup ti patut dikembuan nuan.—2 Korint 3:18.

17. Sebedau milih pemerindang, nama tanya ke patut ditanya kitai empu?

17 Nama agi patut digaga nuan ngambika sejalai enggau runding Jehovah maya milih pemerindang? Peratika tanya tu, ‘Baka ni tu tau ngachau aku sereta kaul aku enggau Jehovah?’ Chunto, sebedau milih cherita ke deka dipeda, tanya diri empu, ‘Baka ni jalai cherita tu ulih ngachau ati aku?’ Aram kitai beratika ajar Bup Kudus pasal pekara tu.

18, 19. (a) Baka ni ajar ba Pilipi 4:8 nulung kitai nentuka sekalika pemerindang kitai nya badas tauka enda? (b) Nama sekeda ajar Bup Kudus ke ulih nulung nuan milih pemerindang ti badas? (Peda nota ba baruh lambar.)

18 Pilipi 4:8 ngajar: “Perundingka utai ti bendar, ti manah, ti lurus, ti tuchi, ti badas, ti nelap, ti pemadu menyana, ti tau dipuji.” Ditu Paul ukai nyebut pasal pemerindang, tang iya nyebut pasal ati ke patut berundingka utai ti dikerindu Petara. (Masmur 19:14) Tang, ajar Paul nya ulih dikena ba pemerindang. Baka ni?

19 Tanya diri empu, ‘Kati cherita ba wayang tauka TV, video game, lagu tauka pemerindang ti bukai ngasuh aku berundingka utai “ti tuchi”?’ Chunto, pengudah nuan meda cherita ba wayang tauka TV, nama utai ti lekat ba runding nuan? Enti runding nuan manah enggau beresi pengudah meda cherita nya, pemerindang nya badas. Tang, enti cherita ke dipeda nuan nya ngasuh nuan berundingka utai ti enda tuchi tauka kamah, pemerindang nya enda badas,  lalu ngerusak. (Matthew 12:33; Mark 7:20-23) Nama kebuah? Laban mikirka utai ti kamah ulih ngachau pengelantang ba ati ke dilatih ngena Bup Kudus sereta ngerusak kaul nuan enggau Petara. (Epesus 5:5; 1 Timoti 1:5, 19) Ketegal pemerindang nya ulih ngerusak nuan, nya alai seliahka iya. * (Rome 12:2) Titihka teladan pemasmur ke besampi ngagai Jehovah: “Anang ngasuh mata aku merening ngagai utai ti ngasuh aku sumbung.”—Masmur 119:37.

BERUNDINGKA ORANG BUKAI

20, 21. Baka ni 1 Korint 10:23, 24 bekaul enggau milih pemerindang ti badas?

20 Paul madah pasal ajar Bup Kudus ke patut diperatika maya ngaga pemutus. Ku iya: “Semua utai tau dikereja magang, tang ukai semua utai nya ulih ngemansangka pengidup kitai. Anang berundingka diri empu aja, tang berunding ke orang bukai.” (1 Korint 10:23, 24) Baka ni ajar tu bekaul enggau milih pemerindang ti badas? Nuan patut nanya diri empu, ‘Baka ni pemerindang ke dipilih aku bekaul enggau orang bukai?’

21 Ati nuan engka ulih nerima pemerindang ke dikumbai “tau dikereja.” Tang, enti bala menyadi Kristian ke bisi ati ti nagang sida nerima pemerindang nya, nuan tau enda nerima pemerindang nya. Nama kebuah? Laban nuan enggai “bedosa ngelaban” sida tauka “bedosa ngelaban Kristus.” Baka ke dipadah Paul, tu ngasuh bala ke sama pengarap tusah deka tetap  ati ngagai Petara. Nuan patut beratika lalau tu: “Anang ngenusahka ati orang.” (1 Korint 8:12; 10:32) Orang Kristian ti bendar kemaya hari tu nitihka ajar Paul. Sida nyeliahka pemerindang ke enda “ngemansangka” pangan diri, taja pan “tau dikereja.”—Rome 14:1; 15:1.

22. Nama kebuah orang Kristian patut berundingka orang bukai pasal pemerindang?

22 Bisi siti agi kebuah kitai patut berundingka orang bukai. Orang Kristian ke bisi ati ti nagang sida nerima pemerindang enda patut ngansak orang bukai nitihka ati sida. Enti iya ngansak orang nitihka ati iya, iya baka seiku deriba ba jalai besai ke ngansak deriba bukai nitihka pengelaju iya. Peneka iya nya enda ulih diterima. Orang Kristian ke bisi pengerindu patut bebasaka ati enggau runding bala sama pengarap, enti pemerindang nya enda ditagang Bup Kudus. Enggau nya, iya ngasuh “semua orang nemu penyiru” iya.—Pilipi 4:5; Pengajar 7:16.

23. Baka ni nuan nentuka nuan milih pemerindang ti badas?

23 Baka ni nuan nentuka nuan milih pemerindang ti badas? Nulak semua pemerindang ke ngayanka pengawa ti enda manah, iya ke ditagang Bup Kudus. Titihka ajar Bup Kudus kena milih pemerindang ke enda dipadah enggau terang, sekalika ditagang tauka dikemendarka. Seliahka pemerindang ti ulih ngerusak ati nuan, lalu sanggup nyeliahka pemerindang ti tau ngasuh orang bukai kelebih agi bala sama pengarap enda nyamai ati. Arapka pemutus nuan ngenataika mulia ngagai Petara, lalu ngasuh nuan enggau diri sebilik meruan dalam pengerindu Iya.

^ per. 19 Sekeda ajar Bup Kudus ke ulih dikena bekaul enggau pemerindang bisi ba Jaku Dalam 3:31; 13:20; Epesus 5:3, 4; enggau Kolosi 3:5, 8, 20.