Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

‘Meruan Dalam Pengerindu Petara’

 PELAJAR 15

Lantang Ati Meda Asil Kereja Kitai

Lantang Ati Meda Asil Kereja Kitai

“Semua kitai patut . . . ngelantangka diri ngena utai ti udah ulih kitai.”—PENGAJAR 3:13.

1-3. (a) Baka ni asai ati mayuh orang pasal kereja? (b) Baka ni Bup Kudus meransang kitai ngambika rindu bekereja, lalu nama tanya ti deka dikerandauka kitai ba pelajar tu?

MAYUH orang lembau nurun kereja. Nama kebuah? Laban sida ngereja pengawa ke dikenggai sida. Baka ni ulih meransang sida ngambika rindu bekereja?

2 Bup Kudus meransang kitai ngambika bisi runding ti manah pasal kereja. Iya madahka kereja nya berekat. Solomon nulis: ‘Semua kitai patut makai, ngirup lalu ngelantangka diri ngena utai ti udah ulih kitai, laban semua utai nya endang pemeri ari Petara magang.’ (Pengajar 3:13) Jehovah, rindu sereta ibuhka kitai. Iya deka kitai puas ati, lalu lantang ati meda asil kereja kitai. Ngambika meruan dalam pengerindu Petara, kitai patut idup sejalai enggau penemu Iya sereta ajar ari Iya pasal kereja.—Bacha Pengajar 2:24; 5:18.

3 Ba pelajar tu, kitai deka berandauka empat tanya: Baka ni kitai ulih lantang ati meda asil kereja kitai? Nama bansa pengawa ke enda ulih dikereja orang Kristian ti bendar? Baka ni kitai ulih magi jam entara kereja enggau ngereja peneka Petara? Lalu, nama pengawa ti pemadu beguna ke patut digaga kitai? Sebedau nya, aram kitai meda dua teladan pekereja ti pemadu tebilang—Petara Jehovah enggau Jesus Kristus.

 JEHOVAH ENGGAU JESUS—NYADI TELADAN KITAI

4, 5. Baka ni Bup Kudus nunjukka Jehovah nya ngereja pengawa enggau pemadu manah?

4 Jehovah nya Pekereja ti Pemadu Manah. Pemungkal 1:1 madah: ‘Ba pun iya kelia, lebuh Petara berengkah ngaga langit enggau dunya.’ Pengudah Petara ngaga dunya tu, Iya madahka asil iya “manah magang.” (Pemungkal 1:31) Jehovah amat puas ati enggau asil kereja Iya ba dunya tu. Jehovah, ‘Petara ti gaga ati,’ lantang ati laban Iya udah ngereja pengawa enggau pemadu manah.—1 Timoti 1:11, NW.

5 Petara seruran bekereja. Taja pan dunya tu enggau utai bukai udah lama tembu digaga, Jesus madah: ‘Apai aku seruran gawa.’ (John 5:17) Nama digaga Apai? Ari serega, Iya seruran ngiring sereta nyaga mensia. Iya udah milih “mensia ti baru,” iya nya orang Kristian ke diiri ngena roh kudus ngambika merintah enggau Jesus di serega. (2 Korint 5:17) Iya bekereja kena ngamatka tuju Iya ngagai mensia—orang ke rinduka Iya bulih pengidup ti meruan belama iya ba dunya baru. (Rome 6:23) Jehovah endang gaga ati meda asil kereja Iya. Bejuta iku orang udah nerima berita manah pasal Perintah Iya, semak ngagai Iya sereta ngubah pengidup sida ngambika meruan dalam pengerindu Iya.—John 6:44.

6, 7. Nama nunjukka Jesus ngereja pengawa enggau bagas?

6 Jesus udah lama tebilang ngereja pengawa enggau bagas. Sebedau nyadi mensia, iya nyadi pekereja “ke landik,” nulung Petara ngaga semua utai ti “di serega enggau di dunya.” (Jaku Dalam 8:22-31; Kolosi 1:15-17) Lebuh ba dunya tu, Jesus terus ngereja pengawa  enggau bagas. Iya belajar nyadi “tukang kayu.” * (Mark 6:3) Tu kereja ti berat sereta begunaka pengelandik. Kelebih agi, maya nya nadai kilang papan enggau perengka ti moden kena betukang. Ulih nuan ngambarka Jesus nebang enggau berangkutka kayu ngagai endur iya gawa? Ulih nuan ngambarka iya ngaga rumah, ngaga kasau atap, pintu sereta perengka rumah ti bukai? Jesus tentu puas ati enggau asil kereja ti udah digaga iya enggau bagas.

7 Jesus mega bagas ngereja pengawa nginjil enggau ngajar. Dalam timpuh tiga taun setengah, iya bebendar ngereja pengawa tu. Iya ngereja pengawa tu ari tumu pagi nyentuk ke malam, ngambika iya ulih ngajar mayuh agi orang. (Luke 21:37, 38; John 3:2) Iya bejalai ‘nengah nengeri enggau genturung pendiau, nusui berita manah pasal Perintah Petara.’ (Luke 8:1)Jesus bejalai beratus kilometer nengah jalai ti bedebu ngambika orang ulih ninga berita manah nya.

8, 9. Baka ni Jesus meda asil kereja ti udah digaga iya enggau bagas?

8 Kati Jesus lantang ati meda asil pemagas iya nginjil enggau ngajar orang? Ya! Iya udah nanam pemendar pasal Perintah Petara, lalu nyediaka “umai nyau mansau, sedia deka diketau.” Ngereja peneka Petara meri pengering ngagai Jesus nyentukka iya sanggup ninggalka pemakai iya ketegal deka nembuka pengawa iya. (John 4:31-38) Jesus endang puas ati enggau pengawa iya ke nginjil sereta ngajar orang ba dunya tu. Nya alai, iya ulih madah ngagai Apai iya: ‘Aku  udah ngemuliaka Nuan di dunya tu, laban aku udah nembuka pengawa ti diasuh Nuan kereja aku.’—John 17:4.

9 Jehovah enggau Jesus endang teladan ti pemadu manah. Seduai iya lantang ati meda asil kereja ti udah digaga seduai iya enggau bagas. Pengerindu kitai ngagai Jehovah meransang kitai ‘nunda teladan Petara.’ (Epesus 5:1) Pengerindu kitai ngagai Jesus meransang kitai ‘nitihka singkang iya.’ (1 Peter 2:21) Aram kitai meda baka ni kitai ulih lantang ati meda asil kereja kitai.

BAKA NI KITAI ULIH LANTANG ATI MEDA ASIL KEREJA KITAI

Nitihka ajar Bup Kudus ulih nulung nuan lantang ati meda asil kereja nuan

10, 11. Nama ulih nulung kitai ngembuan runding ti betul pasal kereja?

10 Orang Kristian ti bendar patut bekereja. Kitai deka puas ati enggau kereja kitai, tang kekadang tu enda senang enti kereja nya ukai kereja ti dikerinduka kitai. Baka ni kitai ulih bekereja enggau lantang ati taja pan bisi penanggul?

11 Ngembuan runding ti betul. Kekadang kitai enda ulih ngubah penanggul ba endur kereja, tang kitai ulih ngubah runding kitai. Berundingka penemu Petara enggau dalam, ulih nulung kitai ngembuan runding ti betul pasal kereja. Chunto, enti nuan tuai bilik, enda ngira nama penanggul, nuan tetap bekereja kena nyediaka utai ti diguna diri sebilik. Nya alai, nyediaka utai ti diguna diri sebilik ukai pekara ti mit ba mata Petara. Bup Kudus madah orang ke enda nyediaka utai ti diguna diri sebilik “jai agi ari orang ke enda arap.” (1 Timoti 5:8) Nuan deka puas ati enti kereja nya ulih  nulung nuan bejalaika tanggungjawap nyadi tuai bilik, ke udah diberi Petara.

12. Nama berekat enti kitai bagas sereta lurus ngereja pengawa?

12 Bagas sereta lurus ngereja pengawa. Bekereja enggau bagas sereta belajar ngereja utai enggau manah ulih mai berekat. Orang ke bagas sereta landik gawa selalu iya dikerindu bala tuke. (Jaku Dalam 12:24; 22:29) Orang Kristian ti bendar patut lurus maya ngereja pengawa. Sida enda ngenchuri duit, barang, tauka “ngular” maya gawa. (Epesus 4:28) Baka ke udah dipelajar  kitai, pengelurus mai berekat. Orang ke ngereja pengawa enggau lurus tau dikearapka. Sekalika tuke meda kitai bagas bekereja tauka enda, kitai ulih puas ati laban nemu “ati diri beresi,” lalu nemu kitai udah ngerinduka ati Petara.—Hebrew 13:18; Kolosi 3:22-24.

13. Nama asil iya enti kitai bisi ulah ti manah ba endur kereja?

13 Ulah kitai ulih ngemuliaka Petara. Enti kitai bisi ulah ti manah ba endur kereja, orang bukai ulih beratika iya. Nama asil iya? Kitai ‘mai puji ngagai ajar ti diberi Petara ti Juruselamat kitai.’ (Titus 2:9, 10) Amat, ulah kitai ti manah ulih nulung orang bukai meda pemanah pengarap kitai. Tu ulih narit ati orang ngagai pemendar. Nuan tentu gaga ati enti orang ke sama kereja enggau nuan deka nerima pemendar ketegal ulah nuan ti manah ba endur kereja. Nuan tentu lebih agi gaga ati laban ulah nuan udah ngemuliaka Jehovah sereta ngasuh Iya gaga ati!—Bacha Jaku Dalam 27:11; 1 Peter 2:12.

BERUNDING ENGGAU MANAH MAYA MILIH KEREJA

14-16. Nama dua iti tanya ti patut diperundingka kitai maya milih kereja?

14 Bup Kudus nadai madah enggau terang bansa kereja ke tau enggau ke enda tau dikereja. Tu ukai reti iya kitai ulih nerima sebarang kereja. Tang, Bup Kudus ulih nulung kitai milih kereja ti manah ke ulih ngerinduka ati Petara. (Jaku Dalam 2:6) Bisi dua iti tanya ti berat ke patut diperundingka kitai maya milih kereja.

15 Kati kereja nya bekaul enggau utai ti ditagang Bup Kudus? Bup Kudus enggau terang nagang pengawa ngenchuri, bula, sereta ngaga engkeramba. (Pemansut  20:4; Kereja Rasul 15:29; Epesus 4:28; Pemandang 21:8) Kitai patut nyeliahka kereja ke baka nya. Pengerindu ngagai Jehovah ulih nagang kitai nerima kereja ti bekaul enggau pengawa ke ngelanggar pesan Petara.—Bacha 1 John 5:3.

16 Kati kereja nya ngasuh kitai nyukung tauka meransang pengawa ti salah? Peratika chunto tu. Bekereja  nyadi kerani enda salah. Tang, baka ni enti kitai diasuh nyadi kerani ba kelinik bebuai anak? Kitai engka enda enggau sida lutur bebuai anak, tang bekereja dia nunjukka kitai nyukung pengawa bebuai anak, pengawa ti ditagang Bup Kudus. (Pemansut 21:22-24) Enti kitai rinduka Jehovah, kitai enggai nerima kereja ti ditagang Bup Kudus.

17. (a) Nama agi patut diperundingka kitai maya milih kereja? (Peda kutak “ Patut Aku Milih Kereja Nya?”) (b) Baka ni ati ulih nulung kitai ngaga pemutus ti ngerinduka ati Petara?

17 Enti kitai berundingka saut ngagai tanya ba genteran 15 enggau 16, kitai ulih nemu bansa kereja ke tau enggau ke enda tau dikereja. Nambahka nya, bisi utai bukai mega patut diperundingka kitai maya milih kereja. Kitai enda ulih ngarapka ulun ke tetap ati sereta  bepenemu-dalam nyediaka semua iring ke ulih dikena maya milih kereja. Nya alai, kitai patut berunding enggau manah. Baka ke udah dipelajarka ba Pelajar 2, kitai patut belajar matih ati kitai nitihka ajar ari Bup Kudus ba pengidup ninting hari. Ketegal “udah matihka diri ngelala bida entara utai ti badas enggau utai ti jai,” kitai ulih ngaga pemutus ti ngerinduka ati Petara sereta nulung kitai meruan dalam pengerindu Iya.—Hebrew 5:14.

TETAP NGEMBUAN RUNDING TI MANAH PASAL KEREJA

18. Nama kebuah tusah deka mengkang teguh ba pengarap?

18 Bup Kudus madah “ba hari ti penudi mayuh macham penusah deka nyadi.” (2 Timoti 3:1) Kekadang tusah deka ngiga kereja tauka mengkang bekereja ba siti-siti endur. Orang Kristian ti bendar nemu, sida patut bekereja kena nyediaka utai ti diguna diri sebilik. Tang enti kitai enda bejimat, kitai ulih dilimpangka pengingin deka nyadi kaya, ke ulih ngasuh kitai tusah deka ngereja peneka Petara. (1 Timoti 6:9, 10) Diatu, aram kitai berandauka baka ni kitai ulih nentuka “utai ti pemadu badas.”—Pilipi 1:10.

19. Nama kebuah kitai patut arapka Jehovah, lalu baka ni tu ulih nulung kitai?

19 Bepanggai ba Jehovah enggau pengabis ati. (Bacha Jaku Dalam 3:5, 6.) Kitai patut arapka Jehovah laban Iya ibuhka kitai. (1 Peter 5:7) Iya nemu utai ti manah agi ke kitai, lalu seruran deka nulung kitai. (Masmur 37:25) Nya alai, kitai patut ningaka pesan Iya: ‘Anang angkunka duit. Kita patut nemu puas ati ke utai ti dikemisi kita, laban Petara udah nyebut, “Aku enggai  sekali-kali ninggalka kita, tauka ngelengkaka kita.”’ (Hebrew 13:5) Mayuh Saksi ke semina bekereja ke Jehovah aja ulih arapka Iya nyediaka utai ti diguna sida ba pengidup. Pia mega, enti kitai arapka Jehovah ulih  nyaga kitai, kitai enda kelalu irau pasal utai ti diguna diri sebilik. (Matthew 6:25-32) Kitai enda ngelakka kereja ngachau kitai ngereja peneka Petara baka nginjil enggau datai gempuru.—Matthew 24:14; Hebrew 10:24, 25.

20. Nama reti nyaga mata ngambika “menyana,” lalu baka ni nuan ulih ngereja iya?

20 Beberatka peneka Petara. (Bacha Matthew 6:22, 23.) Jesus madah mata kitai patut “menyana.” Reti iya, kitai enda patut beberatka utai ti enda entu beguna. Orang Kristian patut beberatka peneka Petara. Enggau tu, kitai enda kelalu inginka pengaya sereta kereja ti begaji besai. Kitai mega enda mudah dilimpangka enggau barang baru ke dikumbai ulih meri pengelantang. Nama ulih nulung nuan ngereja peneka Petara? Anang berutang ketegal meli utai ti enda entu beguna. Anang bebelika utai ti begunaka mayuh jam kena ngintu iya. Titihka jaku lalau Bup Kudus ti ngasuh kitai puas ati ke “pemakai enggau gari.” (1 Timoti 6:8) Idup meh enggau pengumbas iya.

21. Nama kebuah kitai patut bisi utai ti dikenuluka, lalu nama patut dikenuluka kitai ba pengidup?

21 Netapka juluk ati ba pengarap, lalu anang limpang ari iya. Ketegal enda ulih ngereja mayuh utai ba pengidup, kitai patut bisi utai ti dikenuluka. Enti enda pia, utai ke enda entu beguna deka ngelimpangka jam kitai ari ngereja utai ti beguna agi. Nama patut dikenuluka kitai ba pengidup? Mayuh orang ba dunya tu beberatka belajar tinggi agi ngambika bulih kereja begaji besai. Tang Jesus ngasuh murid iya, ‘giga dulu Perintah Petara.’ (Matthew 6:33) Ya, orang Kristian ti bendar patut ngenuluka Perintah Petara ba  pengidup. Chara pengidup kitai—pemutus ke digaga, tuju ati sereta pengawa ke dikereja kitai—nunjukka kitai ngenuluka Perintah Petara enggau peneka Iya, lebih agi ari reta sereta kereja.

BEBENDAR NGINJIL ENGGAU NGAJAR

Kitai ulih nunjukka pengerindu kitai ngagai Jehovah enggau ngenuluka pengawa nginjil ba pengidup

22, 23. (a) Nama pengawa ti patut dikemeratka orang Kristian ti bendar, lalu baka ni kitai nunjukka diri beberatka pengawa tu? (Peda kutak “ Pemutus ti Digaga Aku Mai Pengelantang Sereta Ngemuaska Ati.”) (b) Nama penemu ti betul pasal kereja?

22 Kitai nemu kitai diau ba pengujung dunya. Nya alai, orang Kristian ti bendar patut beberatka pengawa nginjil enggau ngajar. (Matthew 24:14; 28:19, 20) Baka Jesus, kitai deka bebendar ngereja pengawa ti nyelamatka nyawa tu. Baka ni kitai nunjukka diri beberatka pengawa tu? Mayuh nembiak Petara bebendar enggau nginjil. Sekeda ari sida nyadi pengerintis tauka pengerintis seberai tasik. Mayuh apai indai mega meransang anak sida semina bekereja ke Jehovah aja. Kati sida lantang ati meda asil ti manah ketegal bebendar nginjil enggau ngajar? Ya! Ngereja peneka Jehovah enggau pengabis ati amat ulih mai pengelantang, ngemuaska ati sereta mayuh berekat.—Bacha Jaku Dalam 10:22.

23 Mayuh ari kitai ngena mayuh jam bekereja kena nyediaka utai ti diguna diri sebilik. Kingatka, Jehovah deka kitai lantang ati meda asil kereja kitai. Enti runding enggau ulah kitai sejalai enggau penemu sereta ajar ari Petara, kitai ulih puas ati enggau kereja kitai. Taja pia, anang ngelakka kereja ngelimpangka kitai ari ngerembaika berita manah pasal Perintah Petara. Enggau ngenuluka pengawa tu ba pengidup, kitai nunjukka diri rinduka Jehovah, lalu meruan dalam pengerindu Iya.

^ per. 6 Nitihka leka jaku Gerika, “tukang kayu” ulih dikumbai “pekereja ke bekenaka kayu, enda ngira iya ngaga rumah tauka perengka rumah ti bukai ke digaga ari kayu.”