Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 PELAJAR 16

Laban Meh Sitan Sereta Chara ti Dikena Iya Nipu

Laban Meh Sitan Sereta Chara ti Dikena Iya Nipu

“Laban meh Sitan, lalu iya deka rari.”JAMES 4:7.

1, 2. Pengawa maptisa ngagaka ati sapa?

ENTI NUAN udah nyembah Jehovah bepuluh taun, nuan tentu udah ninga mayuh ceramah pasal baptisa ba gempuru besai kitai. Tang, enda ngira ni penyuah nuan udah ninga ceramah nya, nuan tentu agi diperansang maya nuan meda orang ke deka dibaptisa bediri ba mua bala mayuh ke datai maya gempuru nya. Lebuh nuan meda sida ke dibaptisa pansut ari ai, nuan gaga ati sereta betempik jari. Nuan engka labuh ai mata meda sida udah nyukung Jehovah. Kitai semua balat amat gaga ati maya nya!

2 Kitai engka ulih meda pengawa maptisa beberapa kali aja dalam setaun. Tang, bala melikat suah meda pengawa tu. Ulih nuan ngambarka bala melikat “rami gaga ati” maya sida meda beribu iku orang nyukung gerempung Jehovah ba dunya tu ninting minggu? (Luke 15:7, 10) Naka meh pengaga ati bala melikat meda orang majak nambah nyukung Jehovah!Hagai 2:7.

SITAN “BEJALAI SEGAU-SEGAU BAKA SINGA TI NEGUNG”

3. Nama kebuah Sitan bejalai segau-segau baka “singa ti negung,” lalu nama deka digaga iya?

3 Taja pia, bisi bala melikat bukai ke ringat meda pengawa maptisa nya. Sitan enggau bala antu pedis  amat ati meda beribu iku orang ninggalka ulah ti jai ba dunya tu. Pia mega, Sitan udah enggau sumbung madahka nadai mensia deka nyembah Jehovah ari ati, lalu nadai seiku sida deka meruan tetap ati maya kena penguji ti besai. (Bacha Jop 2:4, 5.) Tiap kali orang nyerahka diri ngagai Jehovah, tu nunjukka Sitan bula. Tu ngasuh Sitan balat ringat. Nya kebuah iya “bejalai segau-segau baka singa ti negung, begigaka orang ke deka diempa iya”! (1 Peter 5:8) Baka “singa” ke deka makai orang, Sitan bebendar deka ngerusak kaul kitai enggau Petara.Masmur 7:1, 2; 2 Timoti 3:12.

Tiap kali orang nyerahka diri ngagai Jehovah, tu nunjukka Sitan bula

4, 5. (a) Nama dua sekat ari Jehovah ngagai Sitan? (b) Nama utai ti ulih dipechaya orang Kristian ti bendar?

 4 Taja pan Sitan disempamaka baka “singa ti negung,” kitai enda ibuh kelalu takut. Nama kebuah? Laban Jehovah udah meri dua sekat ngagai Sitan. Kesatu, Jehovah udah madah “mayuh amat orang” iya nya orang Kristian ti bendar deka selamat maya “penusah ti besai” datai. (Pemandang 7:9, 14) Jaku Petara seruran dikeamatka. Nya alai, Sitan nemu ukai semua nembiak Petara ulih dilimpangka iya.

5 Sekat kedua ulih ditemu kitai ari jaku nabi Asariah ngagai Raja Asa: ‘Jehovah bisi enggau kita, seagi-agi kita meruan enggau Iya.’ (2 Bansa Israel 15:2; bacha 1 Korint 10:13.) Kitai bisi mayuh teladan ari kelia, ke nunjukka Sitan endang enda ulih nesatka orang ke meruan semak enggau Petara. (Hebrew 11:4-40) Kemaya hari tu, orang Kristian ke meruan semak enggau Petara ulih ngelaban sereta ngalahka Sitan. Pia mega, sida ulih pechayaka Jaku Petara: “Laban meh Sitan, lalu iya deka rari ari kita.”James 4:7.

KITAI BEPERANG NGELABAN KUASA ROH TI JAI

6. Baka ni Sitan ngelaban genap iku orang Kristian?

6 Sitan enda ulih menang ba perang tu, tang iya ulih ngemediska genap iku kitai enti kitai enda bejimat. Sitan nemu iya ulih nesatka kitai enti iya ulih ngerusak kaul kitai enggau Jehovah. Baka ni Sitan ulih ngereja tu? Iya nyerang kitai enggau bebendar, nyerang kitai seiku-seiku sereta ngena chara nipu. Aram kitai beratika chara dikena Sitan tu.

7. Nama kebuah Sitan bebendar nyerang orang ke nyembah Jehovah?

7 Nyerang enggau bebendar. Rasul John madah: “Semua  dunya di baruh kuasa Sitan.” (1 John 5:19) Tu jaku tangkan ngagai semua orang Kristian ti bendar. Ketegal dunya tu udah dibaruh kuasa Sitan, nya alai iya semina bebendar nyerang orang ke nyembah Jehovah. (Mikah 4:1; John 15:19; Pemandang 12:12, 17) Sitan balat pedis ati, laban iya nemu timpuh diri nyau deka abis. Nya alai, iya bebendar agi nyerang. Kemaya hari tu, kitai napi serang ti pemadu balat ari Sitan.

8. Nama reti utai ku rasul Paul, maya iya madahka kitai “beperang ngelaban” bala antu?

8 Nyerang seiku-seiku. Rasul Paul nangkan bala ke sama pengarap: “Kitai ukai beperang ngelaban isi enggau darah, tang ngelaban . . . kuasa roh ti jai di langit.” (Epesus 6:12) Nama kebuah Paul ngena leka jaku “beperang ngelaban”? Laban nya nunjukka bebendar belaban ngena jari. Nya alai, ngena leka jaku tu Paul madahka genap iku kitai beperang enggau bala antu. Enda ngira orang ke semak kitai pechaya bala antu ke jai bisi tauka nadai, kitai endang patut nemu kenyau ari nyerahka diri ngagai Jehovah, kitai baka ke udah tama ngagai gelanggang belaban enggau bala antu. Nya alai, Paul meransang orang Kristian ba Epesus ngambika “bediri tegap”!Epesus 6:11, 13, 14.

9. (a) Nama kebuah Sitan enggau bala antu ngena mayuh macham “akal”? (b) Nama kebuah Sitan deka nesatka runding kitai, lalu baka ni kitai ulih nyeliahka nya? (Peda kutak “ Bejimat! sitan pintar nipu.”) (c) Nama siti agi chara ti dikena Sitan nipu kitai?

9 Ngena chara nipu. Paul meransang orang Kristian bediri tegap ngelaban “akal” Sitan. (Epesus 6:11) Ditu Paul madah bala antu ngena mayuh chara nipu  tauka nesatka kitai. Nama kebuah? Laban enti nembiak Jehovah enda ulih ditipu ngena chara siti, bala antu deka ngena chara ti bukai. Nya alai, Sitan enggau bala antu ngemataka ulah genap iku kitai, lalu ngambi ulih ari pengelemi kitai. Taja pia, kitai ulih nemu chara ke dikena Sitan nipu kitai ari Bup Kudus. (2 Korint 2:11) Ba pun bup tu, kitai udah berandauka sekeda chara ke dikena Sitan nipu baka amuka reta tengkira, begulai enggau orang ke ulih ngerusak kaul enggau Jehovah sereta ulah ti kamah. Aram kitai berandauka siti agi chara ke dikena Sitan nipu—pengawa bemanang.

PENGAWA BEMANANG —PENGAWA TI NGELABAN PETARA

10. (a) Nama reti pengawa bemanang? (b) Nama penemu Jehovah pasal pengawa bemanang, lalu nama patut digaga kitai?

10 Enti orang enggau pengawa bemanang, iya bekaul enggau bala antu. Betilitka nasit, bedukun, bekenaka pengaruh, sereta betanya ngagai semengat orang ke udah mati nya sekeda ari pengawa bemanang. Ba mata Jehovah pengawa bemanang nya “utai ti jai.” (Ulang Adat 18:10-12; Pemandang 21:8) Ketegal kitai deka “begedika penyai,” kitai enda patut bisi kaul enggau bala antu. (Rome 12:9) Pengawa bemanang nya pengawa ti ngelaban Jehovah!

11. Nama kebuah Sitan menang enti iya ulih ngelimpangka kitai enggau pengawa bemanang? Terangka.

11 Ketegal pengawa bemanang nya pengawa ti ngelaban Jehovah, nya alai Sitan bebendar ngasuh kitai bisi kaul enggau pengawa nya. Sitan menang enti iya ulih ngelimpangka orang Kristian enggau pengawa  bemanang. Nama kebuah? Peratika chunto tu: Enti runding seiku soldadu ulih dilimpangka munsuh, tu ngasuh tuai munsuh gaga ati. Tuai munsuh mega ngena soldadu nya ngeleseka tuai soldadu iya ke dulu. Pia mega, enti orang Kristian enggau pengawa bemanang, iya udah sengaja ninggalka Jehovah, lalu betuaika Sitan. Pikirka pengaga ati Sitan enti orang ninggalka Jehovah! Deka kitai ngasuh Sitan menang? Tentu enggai!

NGENA TANYA TI NGASUH KAKANG ATI

12. Nama chara ti dikena Sitan ngelimpangka runding kitai pasal pengawa bemanang?

12 Enti kitai ulih nyeliahka pengawa bemanang, Sitan enda ulih mujur ngelimpangka kitai. Nya alai, iya deka ngubah runding kitai. Baka ni? Iya nesatka runding kitai ngambika kitai ngumbai “utai ti jai manah, lalu utai ti manah jai.” (Isaiah 5:20) Kena ngereja tu, Sitan selalu ngena siti chara ti dikena iya suba—ngena tanya ti ngasuh kakang ati.

13. Baka ni Sitan ngena tanya ti ngasuh kakang ati?

13 Peratika, baka ni Sitan ngena chara tu kelia menya. Ba kebun Eden, iya nanya Hawa: ‘Kati amat Petara enda nyagi seduai makai buah ari semua kayu ti dalam kebun tu?’ Ba jeman Jop, lebuh bala melikat datai ngadap Jehovah, Sitan nanya: “Kati Jop deka nyembah Nuan enti iya nadai bulih utai ari nya?” Lalu maya Jesus berengkah ngereja pengawa nginjil enggau ngajar ba dunya tu, Sitan ngasuh Jesus: ‘Enti nuan amat Anak Petara, asuh batu tu nyadi roti.’ Pikirka—Sitan berani ngelaban jaku ke udah disebut Petara kira-kira enam minggu sebedau nya: ‘Tu Anak ke  dikesayauka Aku. Aku rinduka iya’!Pemungkal 3:1; Jop 1:9; Matthew 3:17; 4:3.

14. (a) Baka ni Sitan ngasuh kitai kakang ati pasal pengawa bemanang? (b) Nama deka diperatika kitai diatu?

14 Kemaya hari tu, Sitan ngena chara ti sama ngasuh orang berunding sekalika pengawa bemanang nya ulih tauka enda. Sayau amat, iya ulih ngelimpangka runding sekeda Saksi. Sida kakang ati deka pechaya sekalika sekeda pengawa bemanang nya amat jai. (2 Korint 11:3) Baka ni kitai ulih nulung sida ngubah runding sida? Baka ni kitai nentuka Sitan enda ulih ngelimpangka kitai? Kena nyaut tu, aram kitai meda dua chara ke dikena Sitan ngumpan kitai ngambika enggau pengawa bemanang—pemerindang enggau pengerai.

NGAMBI ULIH ARI PENGINGIN ENGGAU UTAI TI DIGUNA KITAI

15. (a) Nama penemu orang ba menua Barat pasal pengawa bemanang? (b) Baka ni sekeda orang Kristian ngumbai pengawa bemanang nya hal ti mit?

15 Ba menua Barat, pengawa besebutka leka puchau, penemu ajih sereta sekeda pengawa bemanang nya hal ti mit. Cherita ba wayang tauka TV, bup enggau komputer game mayuh ngayanka pengawa bemanang nya utai ti ngerinduka ati sereta enda ngemedis. Sekeda cherita enggau bup ke bekaul enggau pengawa bemanang chukup tebilang nyentukka orang ke rinduka cherita nya nubuhka kelab peminat. Tu nunjukka bala antu udah mujur ngelamun utai ti salah pasal pengawa bemanang. Patut orang Kristian ngumbai pengawa bemanang nya hal ti mit? Enda. Nama kebuah? Chunto, pengudah orang  Kristian meda cherita ke bekaul enggau pengawa bemanang ba wayang, iya madah, “Aku semina meda cherita nya, tang aku enda ngereja pengawa bemanang.” Nama kebuah runding tu salah?

16. Nama kebuah milih pemerindang ke bekaul enggau pengawa bemanang ulih ngemedis?

16 Taja pan bisi bida entara ngereja pengawa bemanang enggau meda iya, ukai reti meda iya enda ulih ngemedis. Nama kebuah? Peratika tu: Bup Kudus madah Sitan enggau bala antu iya enda ulih nemu nama utai ba runding kitai. * Baka ke udah dipadah, kena nemu runding enggau pengelemi kitai, bala antu meratika ulah kitai—nyengkaum pemerindang ti dipilih kitai. Lebuh orang Kristian nunjukka diri rindu meda cherita tauka macha bup ke bekaul enggau dukun, besebut leka puchau, kena rasuk antu, tauka topik bukai ke bekaul enggau antu, iya madah ngagai bala antu utai ti dikerinduka iya. Enggau tu, iya madahka pengelemi diri! Nya alai, bala antu ulih bebendar agi beperang ngelaban orang Kristian nya nyentukka iya alah. Iya ke amat, orang ke rindu enggau pemerindang pasal pengawa bemanang ngujungka sida ngereja pengawa nya.Bacha Galatia 6:7.

Penguntung ari sukung Jehovah lebuh maya ti sakit

17. Nama chara ti dikena Sitan ngambi ulih ari orang ke sakit?

17 Sitan mega deka ngambi ulih ari chara kitai nyaga pengerai. Baka ni? Orang Kristian ke majak raya sakit taja pan udah ngena mayuh chara berubat, ulih lemi semengat. (Mark 5:25, 26) Tu peluang Sitan enggau bala antu deka ngambi ulih ari iya. Bala antu engka  ngasuh orang ke raya sakit nya berunding deka ngena chara ti “kamah” tauka pengawa bemanang kena ngeraika penyakit iya. (Isaiah 1:13) Enti bala antu mujur ngena chara tu, tu ulih ngerusakka kaul orang ke sakit nya enggau Petara. Nama kebuah?

18. Nama chara berubat ti patut ditulak orang Kristian, lalu nama kebuah?

18 Jehovah nangkan orang Israel ke ngena chara ti “kamah”: “Lebuh kita ngangkatka jari kita besampi, Aku enggai malik ngagai kita. Taja pen kita bebendar besampi, tang enggai meh Aku mending.” (Isaiah 1:15) Endang amat, kitai seruran deka nyeliahka utai ti ngasuh sampi kitai enda didinga sereta utai ti ngasuh kitai lenyau sukung ari Jehovah, kelebih agi maya sakit. (Masmur 41:3) Nya alai, enti orang Kristian ngasaika chara ke dikena iya berubat bekaul enggau pengawa bemanang, iya patut nulak. (Matthew 6:13) Enggau tu, iya tau pechaya iya meruan bulih sukung ari Jehovah.—Peda kutak “ Kati Nya Amat Pengawa Bemanang?

LEBUH ORANG BECHERITA PASAL ANTU

19. (a) Nama utai ti dipechaya mayuh orang pasal kuasa Sitan? (b) Nama cherita ti enda patut ditampung orang Kristian?

19 Ba menua Barat, mayuh orang ngambarka kuasa  Sitan nya hal ti mit. Tang ba sekeda menua, Sitan udah ngasuh mayuh orang pechaya iya bisi kuasa ti besai. Nya alai, sida takutka antu. Pia mega cherita pasal antu bisi ba dini-dini endur. Cherita nya selalu dilangkungka orang; ngambika orang rindu ati ninga iya. Patut kitai nampung cherita nya? Enda! Bisi dua iti kebuah ti berat nembiak Petara ti bendar enda nampung cherita nya.

20. Baka ni orang nulung Sitan ngerembaika pemula?

20 Kesatu, enti nusui cherita pasal antu, orang nunjukka diri bisi minat pasal Sitan. Nama kebuah? Bup Kudus madahka Sitan bisi kuasa ngaga tanda pelesu enggau mayuh “macham tipu ti jai.” (2 Tesalonika 2:9, 10) Ketegal Sitan nya landik nipu, iya nemu chara nesatka runding orang ke bisi minat enggau pengawa  bemanang sereta ngasuh sida pechayaka utai ti bula. Sida engka kala meda sereta ninga pasal antu, lalu madah ngagai orang utai ke amat nyadi ba sida. Nyau kelama, cherita sida dilangkungka orang ke nampung iya. Enti orang Kristian nampung cherita nya, iya ngereja peneka Sitan—“apai pemula.” Iya nulung Sitan ngerembaika pemula.John 8:44; 2 Timoti 2:16.

21. Nama utai patut dikerandauka kitai?

21 Kedua, taja pan orang Kristian amat kala meda tauka ninga pasal antu, iya patut nyeliah ari nampung tauka nusui cherita nya ngagai bala menyadi ke sama pengarap. Nama kebuah? Kitai ditangkan: “Merening ngagai Jesus ke ngemunka lalu ngaga pengarap kitai nyadi pemadu badas.” (Hebrew 12:2) Endang amat, kitai patut nujuka ati kitai ngagai Jesus, ukai ngagai Sitan. Lebuh ba dunya tu suba, Jesus enda kala merindang bala murid iya enggau cherita pasal antu, taja pan iya nemu mayuh utai pasal Sitan. Tang, Jesus beberatka berita manah pasal Perintah Petara. Nya alai, kitai patut neladan Jesus enggau bala rasul iya. Kitai patut berandau pasal ‘pemesai pengawa Petara!’Kereja Rasul 2:11; Luke 8:1; Rome 1:11, 12.

22. Baka ni kitai ulih terus ngagaka ati sida ti di serega?

22 Endang amat, Sitan ngena mayuh macham chara nipu, nyengkaum pengawa bemanang, kena ngerusak kaul kitai enggau Jehovah. Enti kitai begedika utai ti jai, lalu rinduka utai ti manah, kitai enda meri peluang ngagai Sitan ngelemika tuju kitai ke deka nulak semua pengawa bemanang. (Bacha Epesus 4:27.) Pikirka pengaga ati sida ti di serega enti kitai “ulih ngelaban akal Sitan”!Luke 15:7; Epesus 6:11.

^ per. 16 Bup Kudus madahka Jehovah ulih “meresa runding sereta nguji ati mensia,” lalu Jesus “mansik runding enggau ati.”Jeremiah 17:10; Pemandang 2:23.