Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

‘Meruan Dalam Pengerindu Petara’

 PELAJAR 4

Nama Kebuah Bebasaka Penguasa?

Nama Kebuah Bebasaka Penguasa?

“Bebasaka semua orang.”1 PETER 2:17.

1, 2. (a) Nama kebuah kitai tusah bebasaka penguasa? (b) Nama tanya deka diperundingka kitai?

KALA nuan beratika baka ni gaya anak mit enti iya diasuh ngereja utai ti dikenggai iya? Ari mua iya nuan nemu iya enggai. Iya ninga utai ku apai indai, tang iya enggai ngereja utai ti diasuh sida. Kekadang, tu nyadi ba semua kitai.

2 Bebasaka penguasa enda senang. Bisi nuan ngasaika nya? Enti bisi, nuan mega sama enggau orang bukai. Kitai diatu diau ba maya orang ke enda entu bebasaka penguasa. Tang Bup Kudus madah, kitai patut bebasaka sida. (Jaku Dalam 24:21) Enggau tu, kitai ulih meruan dalam pengerindu Petara. Nama kebuah kitai tusah deka bebasaka penguasa? Nama kebuah Jehovah ngasuh kitai bebasaka sida, lalu nama ulih nulung kitai? Baka ni kitai ulih nunjukka diri bebasaka sida?

NAMA KEBUAH TUSAH?

3, 4. Baka ni dosa enggau pengidup ti enda sempurna belabuh, lalu nama kebuah dosa ngasuh kitai tusah bebasaka penguasa?

3 Aram kitai meda dua kebuah kitai tusah bebasaka penguasa. Kesatu, kitai enda sempurna; kedua, mensia ke bekuasa megai kitai mega enda sempurna. Mensia  belabuh bedosa enggau enda sempurna pengudah Adam seduai Hawa ngelaban kuasa merintah Petara ba kebun Eden kelia menya. Nya alai, dosa bepun ari ngelaban Petara. Nyentuk ke diatu, kitai bisi ati deka ngelaban.—Pemungkal 2:15-17; 3:1-7; Masmur 51:5; Rome 5:12.

4 Ketegal bedosa, kitai jampat sumbung. Mimit aja orang ke baruh ati, nya alai kitai patut bebendar ngemansangka sereta ngetanka pemanah tu. Taja pan udah betaun tetap ati ngereja peneka Petara, kitai engka ulih nyadi sumbung enggau kih. Chunto, Korah udah tetap ati enggau nembiak Jehovah ngelaban mayuh penusah. Tang iya inginka kuasa mayuh agi, lalu berani nguluka orang ngelaban Moses, orang ke pemadu baruh ati maya nya. (Penyampau 12:3; 16:1-3) Pikirka mega Raja Usiah. Iya tama ngagai Rumah Sembiang, lalu ngereja pengawa ke semina ulih digaga sida imam. (2 Bansa Israel 26:16-21) Ketegal sumbung sereta ngelaban, seduai iya diukum. Chunto tu ulih nyadika lalau kitai. Kitai patut nyeliahka penyumbung ti ngasuh kitai tusah bebasaka penguasa.

5. Baka ni mensia ke enda sempurna ngena kuasa enggau chara ti salah?

5 Kelimpah ari nya, mensia enda sempurna ke bekuasa ngasuh orang enda entu bebasaka sida. Sida jai, kasar tauka udu nekan. Nambahka nya, sejarah nunjukka mayuh orang ngena kuasa sida enggau chara ti salah. (Bacha Pengajar 8:9.) Chunto, Saul nya orang ke manah sereta baruh ati maya Jehovah milih iya nyadi raja. Taja pia, iya nyadi sumbung enggau chemuru, lalu merinsa David. (1 Samuel 9:20, 21; 10:20-22; 18:7-11) Udah nya, David nyadi raja ti pemadu  manah ba Israel. Iya pan ngena kuasa enggau chara ti salah. Iya ngambi bini Uriah orang Iti, lalu ngatur ngambika Uriah mati maya beperang. (2 Samuel 11:1-17) Endang amat, mensia ke enda sempurna tusah deka ngena kuasa enggau manah. Enti sida ke bekuasa enda bebasaka Jehovah, sida balat agi ngena kuasa enggau chara ti salah. Seiku lelaki ke gawa enggau perintah ba Britain madahka, sepemanjai sejarah sida tuai Gereja Katolik udah ngena kuasa sida nekan enggau merinsa mayuh orang. Ketegal tu, aram kitai berundingka tanya: Nama kebuah kitai patut bebasaka penguasa?

NAMA KEBUAH BEBASAKA PENGUASA?

6, 7. (a) Pengerindu kitai ngagai Jehovah meransang kitai ngaga nama, lalu nama kebuah? (b) Baka ni kitai ngayanka diri tunduk?

6 Chara ti pemadu manah bebasaka penguasa, iya nya bisi pengerindu—pengerindu ngagai Jehovah, orang bukai enggau kitai empu. Ketegal kitai rinduka Jehovah lebih ari semua utai, kitai deka ngagaka ati Iya. (Bacha Jaku Dalam 27:11; Mark 12:29, 30.) Kitai nemu kuasa merintah Iya udah dilaban ba kebun Eden menya, lalu mayuh mensia udah nyukung Sitan sereta nulak Jehovah nyadi pemerintah. Kitai gaga ati deka nyukung Jehovah. Lebuh kitai macha Pemandang 4:11, kitai nemu semina Jehovah ke patut nyadi Pemerintah ba dunya! Kitai nyukung kuasa merintah Jehovah enggau nerima perintah Iya ba pengidup ninting hari.

7 Bebasa ukai semina ngasi aja. Kitai ngasika Jehovah laban kitai rinduka Iya. Tang bisi maya iya kitai tusah deka ngasi, baka anak mit ba genteran keterubah  tadi. Maya nya kitai patut tunduk. Jesus pan tunduk ngagai peneka Apai iya, taja pan tusah. Ku Jesus madahka Apai iya, ‘Ukai nitihka peneka aku, tang awakka peneka Nuan nyadi.’—Luke 22:42.

8. (a) Kemaya hari tu, tunduk ngagai kuasa merintah Jehovah nyengkaum nama, lalu baka ni asai ati Jehovah pasal pekara tu? (b) Nama ulih nulung kitai mendingka jaku lalau enggau nerima jaku ajar? (Peda kutak “ Pendingka Jaku Lalau, lalu Terima Jaku Ajar”.)

8 Kemaya hari tu, Jehovah bejaku ngagai kitai ngena Bup Kudus enggau bala pengari Iya ba dunya tu. Nya alai, kitai patut tunduk ngagai kuasa merintah Jehovah enggau bebasaka sida ke dipilih Iya megai kitai. Enti kitai ngelaban sida—chunto, enggai nerima jaku ajar enggau lalau ari Bup Kudus ke diberi sida—kitai ngemediska ati Petara. Lebuh orang Israel mutap sereta ngelaban Moses, Jehovah ngumbai sida ngelaban Iya.—Penyampau 14:26, 27.

9. Nama kebuah pengerindu ngagai pangan diri meransang kitai bebasaka penguasa? Terangka.

9 Kitai mega nunjukka diri bebasaka penguasa ketegal kitai rinduka orang bukai. Nama kebuah? Chunto, pikirka enti nuan nya soldadu. Pengelikun semua soldadu bepanggai ba pengawa sida ke begempung, ngasi sereta nitihka jaku tuai soldadu. Enti nuan ngelaban kuasa tuai soldadu nya, semua soldadu deka bulih penusah. Pia mega, Bup Kudus madahka Jehovah bisi “bala soldadu.” (Isaiah 13:4) Iya Tuai Soldadu bejuta iku melikat. Kekadang, Jehovah ngumbai nembiak Iya ba dunya tu mega soldadu. (Esekiel 37:1-10) Enti kitai ngelaban tuai gempuru ke dipilih Jehovah, bala menyadi Kristian ke bukai mega deka bulih penusah. (1 Korint 12:14, 25, 26) Enti anak ngelaban apai indai, diri sebilik deka tusah. Nya alai, kitai ngayanka  pengerindu ngagai orang bukai enggau nunjukka basa sereta begempung enggau pangan diri.

10, 11. Nama kebuah tunduk ngagai penguasa meri penguntung ke kitai?

10 Kitai mega bebasaka penguasa laban nya mai penguntung ke kitai. Lebuh Jehovah ngasuh kitai bebasaka sida, Iya selalu nyebut penguntung ke diulih kitai enti ngereja nya. Chunto, Iya ngasuh anak ngasika apai indai enti deka bulih pengelantang. (Ulang Adat 5:16; Epesus 6:2, 3) Iya ngasuh kitai masa tuai gempuru ngambika kitai kering ba pengarap. (Hebrew 13:7, 17) Lalu Iya ngasuh kitai tunduk ngagai perintah mensia kena nyaga pengelikun kitai.—Rome 13:4.

11 Enda ke nuan setuju nemu kebuah Jehovah ngasuh  kitai tunduk ulih nulung kitai bebasaka penguasa? Aram kitai beratika tiga chara nunjukka basa ngagai penguasa.

BASA BA RUANG BILIK

12. Nama tanggungjawap laki ke diberi Jehovah ba ruang bilik, lalu baka ni iya ulih ngemujurka tanggungjawap nya?

12 Jehovah empu ngaga atur ba ruang bilik. Iya ngatur ruang bilik ngambika enda charut, tang mujur. (1 Korint 14:33) Iya ngasuh laki nyadi tuai bilik. Laki bebasaka Tuai iya, Jesus Kristus, enggau neladan chara Jesus ngintu nembiak Jehovah. (Epesus 5:23) Nya alai, laki enda patut rari ari tanggungjawap iya tauka udu nekan sereta mangah. Tang iya patut megai tanggungjawap, bisi pengerindu, nemu berunding sereta nelap enggau anak bini. Iya patut nemu kuasa iya baruh agi ari enggi Jehovah.

Laki ke nyadi orang Kristian neladan Jesus maya megai pengawa nyadi tuai bilik

13. Baka ni bini ngemujurka tanggungjawap iya ngambika ulih ngerinduka ati Jehovah?

13 Bini nyadi penulung laki iya. Iya mega bisi kuasa ba ruang bilik laban Bup Kudus ngasuh anak ningaka “utai ti dipadahka apai indai.” (Jaku Dalam 1:8) Endang amat, kuasa iya baruh agi ari enggi laki iya. Bini bebasaka kuasa  laki iya enggau nulung laki iya ngemujurka tanggungjawap nyadi tuai bilik. Iya enda patut ngemaruhka, nguingka runding tauka nganti penuduk laki iya. Tang, iya nyaup sereta nyukung laki iya. Enti iya enda setuju enggau pemutus ti digaga laki iya, iya ulih madahka runding diri enggau basa, tang iya tetap tunduk. Enti laki iya enda nyembah Jehovah, iya engka bisi penanggul ba ruang bilik. Tang enti iya tetap tunduk, tu ulih meransang laki iya nyembah Jehovah.—Bacha 1 Peter 3:1.

14. Baka ni anak ngagaka ati apai indai enggau Jehovah?

14 Lebuh anak ngasika apai indai, sida ngagaka ati Jehovah enggau ati apai indai sida empu. (Jaku Dalam 10:1) Anak ke semina bisi apai tauka indai mega patut ngasika apai tauka indai iya. Sida mega patut nemu apai tauka indai beguna bendar ke saup enggau sukung  ari sida. Diri sebilik ke ngereja tanggungjawap ti udah diberi Jehovah deka bulih pengelantang. Tu meri basa ngagai Petara Jehovah, ke ngepunka ruang bilik.—Epesus 3:14, 15.

BASA BA GEREMPUNG JEHOVAH

15. (a) Baka ni kitai nunjukka diri bebasaka kuasa Jehovah ba gerempung Iya? (b) Nama ajar Bup Kudus ke ulih nulung kitai ngasika sida ke nyadi tuai? (Peda kutak ba “ Ngasika Tuai Kita”.)

15 Jehovah milih Anak Iya nyadi Tuai ba gerempung Jehovah. (Kolosi 1:13) Jesus ngasuh “ulun ke tetap ati sereta bepenemu-dalam” nulung nembiak Petara ba dunya tu semak ngagai Iya. (Matthew 24:45-47) Kemaya hari tu, ulun ke tetap ati sereta bepenemu-dalam nya dikumbai Orang ti Megai Saksi-Saksi Jehovah. Baka ba kurun keterubah, tuai gempuru ba gerempung Jehovah nerima lalau enggau ajar ari Orang ti Megai, sekalika nengah surat tauka bala pengari baka tuai ti ngabas. Enti kitai bebasaka kuasa tuai gempuru, kitai ngasika Jehovah.—Bacha 1 Tesalonika 5:12; Hebrew 13:17.

16. Nama kebuah kitai ngumbai tuai gempuru dipilih ngena roh kudus?

16 Tuai gempuru enggau penulung sida sama enda sempurna baka kitai. Tang, tuai gempuru nya “pemeri” kena nulung nembiak Jehovah ngambika kering ba pengarap. (Epesus 4:8) Tuai gempuru dipilih ngena roh kudus. (Kereja Rasul 20:28) Baka ni? Laban sida patut nitihka syarat ke dipadah ba Bup Kudus. (1 Timoti 3:1-7, 12; Titus 1:5-9) Bala tuai gempuru ke milih bala menyadi Kristian ke lelaki, iya ke ulih nyadi tuai gempuru, besampi minta iring ari roh kudus Jehovah.

17. Nama kebuah menyadi Kristian ke indu betudung pala maya ngereja pengawa ba gerempung Jehovah?

 17 Bisi maya iya nadai tuai gempuru tauka penulung sida ke ulih ngereja pengawa ke patut dikereja sida. Chunto, ngatur gempuru sebedau nginjil. Nya alai, bala menyadi Kristian lelaki ke bukai iya ke udah dibaptisa ulih nganti sida. Enti nadai, nya baru menyadi Kristian indu ke udah dibaptisa ulih ngereja nya. Tang, iya patut betudung pala. * (1 Korint 11:3-10) Atur tu meri peluang ngagai bala menyadi Kristian ke indu ngayanka diri bebasaka atur Jehovah pasal orang ke bekuasa, sekalika ba ruang bilik tauka ba gerempung Jehovah.

BEBASAKA PERINTAH MENSIA

18, 19. (a) Baka ni nuan nerangka ajar ba Rome 13:1-7? (b) Baka ni kitai bebasaka perintah mensia?

18 Orang Kristian ke bendar nentuka sida nitihka ajar ba Rome 13:1-7. (Bacha.) Seagi-agi Jehovah ngelakka perintah mensia bisi, sida beguna kena nyaga pengelikun enggau nyediaka utai ti diguna rayat. Kitai bebasaka sida enggau nitihka undang-undang ti udah ditetapka sida. Kitai mayar chukai, enda nipu maya ngisi pom ari perintah, lalu nitihka undang-undang ti bekaul enggau kitai, diri sebilik, pengawa dagang tauka reta. Tang kitai enda tunduk ngagai perintah mensia, enti sida ngasuh kitai enda ngasika Petara. Kitai nitihka teladan sida rasul: ‘Kami enda tau enda ngasika Petara, ukai ngasika mensia.’—Kereja Rasul 5:28, 29; peda kutak “ Kuasa Sapa Patut Dititihka Aku?

 19 Kitai mega bebasaka perintah mensia ari ulah kitai. Kekadang kitai betemu enggau bala perintah. Rasul Paul betemu enggau Raja Agripa enggau Gabenor Pestus. Seduai iya mayuh pengurang, tang Paul bebasaka seduai iya. (Kereja Rasul 26:2, 25) Kitai nitihka teladan Paul enti kitai bebasaka bala perintah enda ngira sida bepangkat besai tauka mit. Ba sekula, nembiak Kristian bebasaka cikgu enggau semua orang ke gawa dia. Endang amat, kitai ukai semina bebasaka orang ke nerima pengarap kitai; kitai mega bebasaka orang ke ngelaban Saksi-Saksi Jehovah. Sida ke enda nyembah Jehovah ulih meda basa kitai.—Bacha Rome 12:17, 18; 1 Peter 3:15.

20, 21. Nama sekeda berekat ke diulih enti bebasaka orang ke bekuasa?

20 Aram kitai bebasaka orang bukai. Rasul Peter nulis: “Bebasaka semua orang.” (1 Peter 2:17) Lebuh orang meda kitai bebasaka sida, sida rindu ati. Kemaya hari tu, orang jarang bebasaka orang bukai. Enti bebasaka orang bukai, kitai nitihka pesan Jesus: “Awakka penampak kita manchar ngagai orang, ngambika sida meda pemadas pengawa kita lalu ngemuliaka Apai kita ti di serega.”—Matthew 5:16.

21 Kemaya hari tu, orang ke baruh ati nerima pemendar pasal Petara. Enti kitai ngayanka basa ba ruang bilik, ba gerempung Jehovah enggau ba dini-dini endur, tu ulih meransang sekeda orang nyembah Petara enggau kitai. Naka meh pemanah tu! Taja pan orang nya enda nyembah Jehovah enggau kitai, tang kitai pechaya bebasaka orang bukai ngerinduka ati Petara Jehovah, lalu nulung kitai meruan dalam pengerindu Iya. Tu berekat ti besai!

^ per. 17 Peda Penerang “Betudung Pala—Kemaya Lalu Nama Kebuah?” kena nemu ni maya betudung pala.