Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Kita Sebilik Ulih Gaga Ati

 Pelajar 5

Baka Ni Ngetanka Kaul ti Manah Enggau Kaban Belayan

Baka Ni Ngetanka Kaul ti Manah Enggau Kaban Belayan

“Rasukka . . . penelap, ati ti baruh, ati ti nemu nunduk ngagai pangan diri, enggau ati ti liat.”Kolosi 3:12

Jadi melaki-bini ngepunka siti ruang bilik ti baru. Taja pan nuan sayau sereta bebasaka apai indai, tang diatu kaling nuan orang ti patut dikemeratka nuan. Sekeda kaban belayan nuan tusah deka nerima tu. Tang, ajar Bup Kudus ulih nulung nuan ngetanka kaul ti manah enggau kaban belayan sereta enggau kaling nuan empu.

 1 NGETANKA RUNDING TI MANAH NGAGAI KABAN BELAYAN

NAMA DIPADAH BUP KUDUS: “Bebasaka apai enggau indai nuan.” (Epesus 6:2) Enda ngira berapa umur nuan, nuan patut bebasaka apai indai nuan. Kingatka, kaling nuan mega patut betatika apai indai iya. “Pengerindu nya . . . enda kepapas,” nya alai anang enda nyamai ati meda kaul kaling nuan enggau sida sebilik.1 Korint 13:4; Galatia 5:26.

NAMA PATUT DIGAGA NUAN:

  • Anang nyebut, “Kita sebilik selalu ngemaruhka aku” tauka “Indai nuan enggai meda aku”

  • Uji asaika ati kaling nuan

 2 PADAH ENGGAU TERANG

NAMA DIPADAH BUP KUDUS: “Lelaki ninggalka apai indai iya, lalu begulai enggau bini iya, lalu seduai iya nyadi siku.” (Pemungkal 2:24) Maya nuan kawin, apai indai engka ngasaika sida agi betanggungjawap ngagai nuan, nya alai sida engka deka masuk champur ba pengidup seduai melaki-bini.

Seduai ulih nentuka naka ni sida ulih masuk champur, lalu padahka pasal utai tu ngagai sida enggau manah. (Jaku Dalam 15:1) Pendiau nuan ke baruh ati, nelap, enggau sabar deka nulung nuan bisi kaul ti manah enggau kaban belayan, lalu terus “enggau pangan diri dalam pengerindu.”Epesus 4:2.

NAMA PATUT DIGAGA NUAN:

  • Enti nuan irau enggai ke kaban belayan kelalu masuk champur ba pengidup seduai, berandau meh pasal utai tu enggau kaling nuan maya seduai lantang

  • Besaup mutarka pekara tu