Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Kita Sebilik Ulih Gaga Ati

 Pelajar 8

Maya Penusah Nyadi

Maya Penusah Nyadi

“Kita rami gaga ati ke tu, taja pen kita diatu merinsa enda lama natka mayuh macham penguji.” 1 Peter 1:6

Taja pan nuan enggau naka ulih deka ruang bilik nuan lantang, kekadang utai ti enda disadang tau nyadi. Tu tau ngasuh nuan enggau diri sebilik enda lantang. (Pengajar 9:11) Petara nyediaka tulung ngambika kitai ulih ngelaban penusah. Enti nitihka ajar Bup Kudus, nuan enggau diri sebilik ulih mutarka penusah ti nuntung.

 1 BEPANGGAI BA JEHOVAH

NAMA DIPADAH BUP KUDUS: “Serahka semua pengirau kita ngagai Iya, laban Iya ngibun kita.” (1 Peter 5:7) Kingatka, kitai enda patut nyalahka Petara maya kena penguji. (James 1:13) Maya nuan semak ngagai Petara, Iya deka nulung nuan enggau chara ti pemadu manah. (Isaiah 41:10) “Padahka ngagai Iya semua penusah kita.”Masmur 62:8.

Nuan deka berasai lantang maya nuan macha sereta belajarka Bup Kudus ninting hari. Enggau tu, nuan deka ngasaika baka ni Jehovah “merindang kami lebuh kami dituntung semua macham penusah.” (2 Korint 1:3, 4; Rome 15:4) Iya besemaya meri nuan ‘pemaik Petara, ti ngelui peragam mensia.’Pilipi 4:6,7, 13.

NAMA PATUT DIGAGA NUAN:

  • Besampi minta tulung ari Jehovah ngambika sabar sereta ulih berunding enggau manah

  • Peratika semua pelan ti udah digaga, lalu pilih iya ke pemadu manah

2 NGINTU DIRI EMPU ENGGAU DIRI SEBILIK

NAMA DIPADAH BUP KUDUS: “Orang ke nemu berunding endang seruran gagit ati sereta sedia deka belajar.” (Jaku Dalam 18:15) Peratika nama utai ti diguna genap iku orang ba ruang bilik nuan. Berandau enggau sida. Dingaka sida.Jaku Dalam 20:5.

Baka ni enti orang ti dikesayau nuan udah nadai agi? Anang enggai madahka asai ati diri. Indah Jesus “nyabak.” (John 11:35; Pengajar 3:4) Belelak sereta tinduk enggau chukup mega beguna. (Pengajar 4:6) Tu ulih nulung nuan senang agi napi penusah nya.

NAMA PATUT DIGAGA NUAN:

  • Sebedau penusah nyadi, berandau enggau diri sebilik. Maya bisi penusah, sida deka senang bejaku enggau nuan

  • Berandau enggau orang bukai ke bisi penusah ti sama

 3 GIGA SUKUNG

NAMA DIPADAH BUP KUDUS: “Pangan endang seruran ngayanka pengerindu sida. Nama guna bisi kaban belayan enti sida enda enggau natka penusah?” (Jaku Dalam 17:17) Kaban nuan engka deka nulung, tang sida engka enda nemu nama patut digaga. Anang enda madah utai ti diguna nuan. (Jaku Dalam 12:25) Ngiga bantu ari orang ke bepenemu pasal Bup Kudus. Iring ari Bup Kudus ke diberi sida ulih nulung nuan.James 5:14.

Nuan deka bulih sukung ke diguna nuan enti selalu begulai enggau orang ke manggaika pengarap ba Petara, lalu arapka semaya Iya. Nuan mega deka bulih pengelantang maya nuan nulung orang ke begunaka peransang. Bekunsi pengarap nuan pasal Jehovah sereta semaya Iya enggau sida. Terus kiruh nulung orang ke begunaka bantu, lalu selalu begulai enggau orang ke sayau sereta ibuhka nuan.Jaku Dalam 18:1; 1 Korint 15:58.

NAMA PATUT DIGAGA NUAN:

  • Berandau enggau kaban rapat nuan, lalu awakka iya mantu nuan

  • Terus terang madahka utai ti diguna nuan

Belajar Lebih Agi

BERITA MANAH ARI PETARA!

Nama Kebuah Petara Ngemendarka Penyai enggau Pemerinsa Nyadi?

Baka ni penyai berengkah lalu nama kebuah Petara nejukka iya? Deka pemerinsa nadai agi?