Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 Pelajar 7

Baka Ni Ngajar Anak Seduai

Baka Ni Ngajar Anak Seduai

“Kingatka pesan ti diberi aku ngagai kita sehari tu. Ajar pesan nya ngagai anak kita.” Ulang Adat 6:6, 7

Maya Jehovah ngaga atur ba ruang bilik, Iya ngasuh apai indai ngajar anak sida iya. (Kolosi 3:20) Nya alai, endang tanggungjawap apai indai ngajar anak ngambika sayauka Jehovah, lalu nyadi orang ti menyana. (2 Timoti 1:5; 3:15) Seduai mega patut nemu nama utai ti dipikir anak seduai. Endang amat, seduai empu patut nyadi teladan ti manah. Seduai empu patut nitihka ajar Bup Kudus sebedau seduai ngajar anak pasal Bup Kudus.Masmur 40:8.

 1 NGASUH ANAK SENANG BEJAKU ENGGAU NUAN

NAMA DIPADAH BUP KUDUS: “Jampat mending, lubah mansutka jaku.” (James 1:19) Nuan deka anak nuan senang bejaku enggau nuan. Sida patut nemu nuan deka ningaka sida. Giga meh maya ti lantang ngambika bala anak senang agi madahka utai ba ati sida. (James 3:18) Enti nuan kasar tauka semina ngiga penyalah, sida engka enggai beterus terang enggau nuan. Sabar enggau anak nuan, lalu seruran ngayanka penyayau ngagai sida.Matthew 3:17; 1 Korint 8:1.

NAMA PATUT DIGAGA NUAN:

  • Seruran bisi awak maya anak deka bejaku enggau nuan

  • Seruran bejaku enggau anak nuan, ukai semina maya anak bisi penusah

2 BERATIKA UTAI KU SIDA

NAMA DIPADAH BUP KUDUS: “Peratika utai ti diajar ngagai nuan, nya baru nuan deka mujur.” (Jaku Dalam 16:20) Kekadang nuan patut beratika nama utai ba ati anak nuan, ukai semina utai ti dipadahka iya. Orang ke biak selalu nyebut utai enggau enda berunding. “Mending dulu sebedau nuan nyaut. Enti nuan enda mending dulu, nuan beli.” (Jaku Dalam 18:13) Anang jampat lengkar.Jaku Dalam 19:11.

NAMA PATUT DIGAGA NUAN:

  • Dingaka enggau manah, lalu anang beguai nganu maya anak nuan bejaku

  • Kingatka, baka ni asai ati nuan maya nuan rambau iya menya, lalu nama utai ti dikerindu nuan

 3 NGAYANKA DIRI BESAUP

NAMA DIPADAH BUP KUDUS: “Anak, dingaka utai ti dipadahka apai indai nuan.” (Jaku Dalam 1:8) Jehovah ngasuh apai indai nyaga anak. Seduai patut ngajar anak ngambika bebasa sereta ningaka jaku seduai. (Epesus 6:1-3) Anak ulih nemu enti apai indai enda “sepenemu.” (1 Korint 1:10) Enti seduai enda sepenemu, anang ngayanka nya ba mua anak enggai ke sida enda bebasaka seduai.

NAMA PATUT DIGAGA NUAN:

  • Berandau sereta setuju enggau chara ngajar anak

  • Dingaka penemu kaling nuan enti seduai enda sepenemu pasal chara ngajar anak

 4 CHARA NGAJAR

NAMA DIPADAH BUP KUDUS: “Ajar anak mit jalai idup.” (Jaku Dalam 22:6) Anak begunaka chara ngajar ti betul ngambika mujur. (Masmur 127:4; Jaku Dalam 29:17) Ngajar ukai reti iya semina ngukum aja, tang nulung anak nuan nemu kebuah atur nya digaga. (Jaku Dalam 28:7) Pia mega, ajar sida ninga sereta beratika Jaku Jehovah. (Masmur 1:2) Tu ulih nulung sida ngelala bida entara utai ti badas enggau utai ti jai.Hebrew 5:14.

NAMA PATUT DIGAGA NUAN:

  • Nulung anak nuan ngelala Petara ngambika sida ulih arapka Iya

  • Nulung sida nemu sereta nyeliahka ulah ti tau ngemedis, baka ke bisi ba Internet. Ajar sida nyeliahka diri ari orang ke ngereja ulah ti kamah

“Ajar anak nuan nitihka jalai ti betul”